Vaj Qhia

Vaj Qhia thov kom txhua lub teb chaws txhob nyob twj ywm tsis quav ntsej txog cov neeg tab tom nrhiav kev tiv thaiv

Default User Image
By Hmong Service, 30 June, 2026
Hnub Chiv tim 21 lub 6 hli tas los, tom qab hais zaj tus Tshiab xa moo tas, Vaj Qhia Les Os 14 nco txog cov neeg thoj nam nyob thoob ntiaj teb. Nws thov Ntuj rau cov neeg raug xwv txheej los ntawm tsheb nyob Nplas Xis teb, thiab nws hais lus tos txais cov Plos Tes Taas npuab lub Koom Txoos Tsib Caug (Pentecostal Church).

Hnub tim 21 lub 6 hli tas los no, Vaj Qhia Les Os 14 thov kom tas ntiaj teb ua raws cov lus lees txais hais txog cov neeg thoj nam thiab cov thov ua neeg thoj nam. Nws thov kom cov tseem hwv thiab ib tsoom neeg txhob nyob twj ywm tsis quav ntsej txog cov neeg uas lawv xav tau kev tiv thaiv thiab kev nyab xeeb. 

Vaj Qhia nco txog cov neeg thoj nam hnub nyob ntiaj teb thiab hnub txwm 75 xyoo ntawm cov lus cog hais txog neeg thoj nam hauv xyoo 1951. Yog cov lus cog tseem ceeb ntawm cov teb chaws uas tsa tom qab tsov rog ntiaj teb zaum ob, kom tau txuag cov pej xeem uas raug quab yuam kom khiav tawm hauv lawv tej vaj tse mus txoj cai, xws li kev raug hiam, kev ua phem thiab kev tsis sib haum xeeb. 

Vaj Qhia hais txog kev cia siab fab ntsuj plig uas nyob hauv cov lus cog, yog qhov yuav coj cov thawj coj hauv ntiaj teb thiab cov sau txoj cai ntxiv mus. Nws hais tias kev nyob twj ywm tsis quav ntsej txog tib neeg kev txom nyem tsis yog qhov xaiv ua. Vaj Qhia txhawb nqa txhua haiv neeg kom tos txais cov neeg thoj nam thiab pab lawv tsim lub neej tshiab nyob hauv kev thaj yeeb thiab lub meej mom, nrog rau kev ntsia txog yav tom ntej hauv kev cia siab. 

Vaj Qhia tseem thov Ntuj rau cov xwv txheej tshwm sim nyob hauv kev tsheb tsis ntev los no, nyob hauv lub xeev Xes As Las uas nyob toob fab pej hauv Nplas Xis teb. Tsheb sib nraus thiab ua rau 7 tus tub hluas ntaus pob ntsib kev tuag. Cov neeg tuag yog cov hnub nyoog 15 txog 22 xyoos. Yog cov tub kawm ntawv thiab cov qub tub kawm hauv lub tsev kawm ntawv nyob Juazeiro do Norte. 

Dhau no lawm Vaj Qhia tseem hais lus tos txais cov neeg ntseeg hauv lub Koom Txoos Tsib Caug uas tuaj koom rooj sib tham ntawm cov Kav Tos Liv thiab cov Tsib Caug. Lub rooj sib tham no yog lub sam thiaj txhawb nqa kev sib nkag siab thiab kev sib koom tes ntawm lub Koom Txoos Kav tos Liv thiab cov neeg ntseeg hauv lub Koom Txoos Tsib Caug los ntev dua 50 tawm xyoo. 

Vaj Qhia hais txog qhov tseem ceeb hauv kev rov xav txog kev sib raug zoo ntawm cov teb chaws hauv kev teev Ntuj thiab kev ntseeg yog qhov txhawb nqa kev muaj vaj huam sib luag ntawm cov neeg ntseeg thiab kev ua pov thawj ua ke nyob hauv lub ntiaj teb zim txwv no.