Hnub tim 4 lub 7 hli tas los no Vaj Qhia Les Os 14 tawm mus ntsib thiab coj lub Txoos Txi Ntuj rau cov neeg thoj nam nyob hauv lub pov txwv Las Pes Dus Xas (Lampedusa) hauv plawv dej ntuj Mes Dis Tes Las Nes. Vaj Qhia hais rau lawv tias nws tuaj zaum no yog txhob txwm tuaj ua lub Txoos Txi Ntuj rau lawv vim lub Txoos Txi Ntuj yog lub cim loj tshaj plaws hais txog Huab Tais Yes Xus nrog peb nyob, thiab nyob ntawm no kev ua lub suab yuav nrov dua lo lus lub suab.
Thaum Vaj Qhia ua lub Txoos Txi Ntuj, nws nthuav Tswv Ntuj Lo Lus li no tias lub Moo Zoo yuav tsis tsheej tau tuaj yog tias tib neeg kaws tus kheej cia zoo li lub pov txwv nyob twm zeej tsis nrog lub ntiaj teb sib fim. Lub Moo Zoo yuav nrov ntxhe nyob ntawm cheeb tsam muaj neeg tuaj sib ntsib, muaj neeg tuaj sib tham.
Vaj Qhia vam txog Huab Tais Yes Xus zaj tus Xas Mas Lias siab zoo los nthuav ntuas sawv daws. Nws muab lub pov txwv Las Pes Dus Xas thiab lub pov txwv Lis Nos Xas (Linosa) piv rau txoj kev txaus ntshai ntawm lub tsheej Yes Lus Xas Les mus rau lub nroog Yes Lis Kos. Tos muab ob lub pov txwv no piv rau txoj kev txaus ntshai vim tias nyob ntawm no muaj ntau txhiab leej neeg raug lwg, raug ua phem, thiab raug tso pov tseg tshuav tuag zoo li tus neeg tawm rooj ntawm Yes Lus Xas Les mus rau Yes Lis Kos raws li zaj tus Xas Mas Lias siab zoo. Nyob ntawm no, muaj ntau leej raug dej ntuj tau nqos rau hauv qab thu dej, txawm li ntawd, peb paub tias yeej muaj lawv nyob tiag zoo li cov tau hla mus txog tim ntug dej ntuj.
Zaj tus Xas Mas Lias siab zoo lub plawv yog qhov tias peb ua kom peb yog tus nyob ze cov neeg txom nyem kom tau. Peb txhob maj xav txog lwm yam, txhob maj muab txoj kev ntseeg sib txawv los saib ua qhov loj. Peb tsum saib tus neeg raug txom nyem vam txog kev pab pw ntawm peb xub ntiag ua ntej.
Zaj Ntawv Moo Zoo no tsis yog hais txog tus Xas Mas Lias siab zoo pab tus neeg taug kev tshuav tuag xwb, tseem hais txog ob tus neeg taug kev tuaj txog ntawd; ib tug pom mas nws lug kev hla mus, ib tug pom mas nws ua siab deb ces nws tsis pab. Yog peb ntsia txog qhov no, pom tias vim neeg ua xyem xyav xyov yuav txiav txim siab li cas, mas thiaj ua rau muaj coob leej tog rau hauv dej ntuj.
Tsis tas li ntawd, Vaj Qhia tseem ntuas tias tsis txhob muab txoj kev ntseeg los ua laj thawj xaiv pab tus no tseg tus tod vim tias txoj kev ntseeg hu sawv daws tuaj mus txais kev cawm. Yog tus tib neeg twg tsis nyiam luag tej, nws yuav nyiam Tswv Ntuj tsis tau. Yog tus tib neeg twg tsis txav mus ze luag tej, nws yuav ua tus nyob ze luag tsis tau. Txoj kev nyiam huaj txhaij vam meej vim tib neeg muab kev ncaj maj mam txhim me ntswb me ntsis ua daim ntsa kom siab tuaj ua daim phab ntsa tawm tsam ntiaj teb neeg kev tsis ncaj ncees.
Vaj Qhia muab lus rau cov teb chaws nyob Aws Los Pas Tuam Teb tias lawv tsis txhob xav tias cia txhia lub teb chaws nyias mam daws nyias teeb meem neeg thoj nam, tab sis txhua lub teb chaws tsum tau sib tuav xam pab cawm cov neeg thoj nam txoj sia, txuag lawv lub meej mom, thiab daws kho lub laj thawj ua rau neeg thoj nam.
Vaj Qhia tseem muab lus rau cov neeg ntseeg thoob qab ntuj tias cov neeg ntseeg yuav tau kawm kom paub tos txais cov neeg thoj nam, paub nrog lawv mus kev ua ke, paub pov hwm lawv, pab lawv kom ua tau lub neej sawv ruaj, thiab pab lawv kom nyob tau nrog lub sawm fem tshiab lawv tuaj ntsib.
