Hnub Chiv tim 8 lub 6 hli tas los Vaj Qhia Les Os 14 ua tswv cuab coj lub Txoos Txi Ntuj hwm Leej Ntuj Plig nqes los nyob hauv Leej Ntshiab Pob Zeb lub tshav puam (St. Peter’ s Square) nyob Vas Tis Kas. Vaj Qhia pib nws cov lus tias hnub no cov xwm txheej thaud tshwm sim nyob saum kem tsev siab kuj tau xeeb tuaj nyob nruab nrab peb sawv daws. Leej Ntuj Plig Ntshiab lub paj tshab nqes los saum peb zoo li ib nthwv cua tshuab hla peb mus, zoo li lub suab nrov ua rau peb ceeb tas, zoo li lub cub tawg ua kom peb pom kev.
Phau ntawv Cov Hauv Paus Xa Lus Cov Hauj Lwm sau hais tias thaum Huab Taus Yes Xus tuag tas, cov thwj tim ntshai thiab tu siab, lawv nkaum nyob saum kem tsev siab, lawv kaw qhov rooj ntom nti. Vaj Qhia pom tias tom qab Leej Ntuj Plig Ntshiab los nyob saum cov thwj tim, ua rau lawv hloov lub tswv yim tshiab; lawv tsis ntsia lub ntuj txawv li yas tas, lawv to taub thiab nkag siab txog cov xwm tshwm sim nyob hauv lawv thiab lawv pom tias tus Huab Tais Sawv Rov Los nrog nraim lawv. Qhov no yog Leej Ntuj Plig Ntshiab tau ntiab kev ntshai tawm hauv lawv mus, Leej Ntuj Plig Ntshiab tau tsoo txoj saw hlau nyob hauv lawv kom tawg, Leej Ntuj Plig Ntshiab tau qhwv lawv cov qhov txhab kom qhaws, Leej Ntuj Plig Ntshiab muab lub zog pleev lawv thiab pub lub siab tawv rau lawv kom lawv muaj cuab kav tawm mus tshaj txog Tswv Ntuj cov hauj lwm rau ib zeej tsoom.
Ua ntej Leej Ntuj Plig Ntshiab yuav los nyob saum cov thwj tim, mas lub qhov rooj kaw nti cia, tab sis thaum Leej Ntuj Plig Ntshiab los nyob puv lawv lawm, lub qhov rooj kem tsev siab qhib; qhov no yog Leej Ntuj Plig Ntshiab qhib tus ciam hauv neeg nruab siab raws li Vaj Qhia Npes Nes Dis 16 tau hais tseg tias ‘Leej Ntuj Plig Ntshiab pub kev nkag siab rau peb lub tswv yim, Leej Ntuj Plig Ntshiab yeej qhov txhaum thaud neeg tau ua nyob hauv lub caij lawv txhim tus pej thuam Npas Npes; thaum ntawd, lawv sib tawg mus hais ntau xeem lus tsis sib haum, nyem no Leej Ntuj Plig Ntshiab ua kom txhua xeem lus rov sib to taub.’
Tej yam zoo li no yog yam zoo nkauj peb pom nyob hauv Hnub Tsib Caug los yog hnub Leej Ntuj Plig nqes los. Leej Ntuj Plig xub qhib tus ciam hauv peb lub siab lub plawv, thiab Leej Ntuj Plig Ntshiab qhib peb lub neej kom tau txais kev nyiam.
Li ntawd, Leej Ntuj Plig Ntshiab nrog nraim peb thaum twg, Leej Ntuj Plig Ntshiab yuav rhuav peb lub siab txhav, siab nqaim, siab dub, kev ntshai uas khi peb cia, thiab kev muab yus saib hlob pov tseg.
Dhau li hais los ntawd, Vaj Qhia hais ntxiv tias Leej Ntuj Plig Ntshiab pub kom peb nrhiav tau ib txog kev tshiab txav mus ze txoj sia thiab ntsib tau txoj sia li no; Leej Ntuj Plig Ntshiab ua kom peb pom puag hauv peb nruab siab tias qhov tiag peb yog tus neeg zoo li cas, Leej Ntuj Plig Ntshiab coj peb mus ntsib Huab Tais Tswv Ntuj nyob hauv kev xyiv fab uas yog Huab Tais Tswv Ntuj lub paj tshab. Leej Ntuj Plig Ntshiab ua rau peb pom tias yog peb coj rawv Lo Lus thiab cia Lo Lus hloov peb, mas peb txoj kev nyiam thiaj yuav nyob tau ruaj.
Leej Ntuj Plig Ntshiab tsis yog qhib tus ciam hauv peb nruab siab xwb, Leej Ntuj Plig Ntshiab tseem qhib peb kev sib txheeb sib fim nrog lwm tus neeg thiab. Huab Tais Yes Xus tau hais tseg tias Leej Ntuj Plig yuav pub Leej Txiv thiab Leej Tub txoj kev nyiam los nyob nruab nrab hauv peb. Yog li mas thaum peb txais Leej Ntuj Plig Ntshiab lawm, peb thiaj qhib siab fim nrog peb cov kwv tij nkauj muam, nraug nus, peb hla dhau qhov nkhaus nyob hauv peb, peb hla dhau lub siab ntshai cov neeg tsis zoo li peb, peb hla dhau lub tswv yim xeeb nyob hauv peb. Ib yam loj tshaj, mas yog Leej Ntuj Plig Ntshiab hloov qhov txaus ntshai zais ntshis tob tob hauv peb, yam li ‘kev txhawj xeeb’ (suspicion), ‘kev ntxub ntxaug (prejudice), los ‘kev xav ntshaw’ (desire) ua tus tswj luag.
Leej Ntuj Plig Ntshiab ua kom cov txiv li hais los no siav thiab nrhau cag ruaj hauv peb kom peb muaj kev raug zoo nrog luag tej, pab kom peb kev sib fim nthuav dav thiab muaj kev zoo siab xyiv fab xws li peb thiab luag yog ib pab kwv tij nus muag.
Vaj Qhia muab siab rau tias qhov hais los ntawd yog ib tug qauv tseem ceeb rau lub Koom Txoos, vim tias yog lub Koom Txoos hla tus ciam tawm mus, yog lub Koom Txoos qhib siab sib tham thiab sib mloog hais, thiab yog lub Koom Txoos ua kev nkag siab txog lwm pab lwm pawg qhov txawv, mas lub Koom Txoos yuav rhais ua chaw rau sawv daws los nkaum thiab ua chaw rau sawv daws tau sib fim.
Vaj Qhia tseem tau hais tias Tswv Ntuj txoj pa txuas peb sawv daws lub siab lub plawv cia ua ke, ces peb pom lwm tus yog peb tus kwv tij tus nus muag, thiab tshuab lub ntsa thaiv peb ib tug rau ib tug kom vaus. Li ntawd, Hnub Tsib Caug thiaj yog hnub rov txhim lub Koom Txoos tshiab, yog hnub rov txhim lub ntuj tshiab.
Vaj Qhia thov ntuj li no “Thov Leej Ntuj Plig nthwv cua tshuab tuaj rau peb sawv daws, kom tau qhib ciam hauv peb nruab siab, thov Huab Tais Tswv Ntuj pub lub txiaj ntsim tau ntsib Tswv Ntuj rau peb, kom peb txoj kev nyiam nthuav dav mus, thiab txhawb peb lub zog kom tsim tau kev thaj yeeb rau lub ntiaj teb.”
Tom qab coj lub Txoos Txi Ntuj hwm Leej Ntuj Plig nqes los tas, Vaj Qhia Les Os 14 coj sawv daws hais zaj ‘Poj Vaj Nyob Saum Ntuj’ (Regina Caeli prayer) thiab thov Leej Ntuj Plig Ntshiab pab cov thaj tsam muaj kev sib ntaus sib tua kom muaj kev haum xeeb.
Ua ntej yuav hais zaj poj vaj nyob saum ntuj, Vaj Qhia rov nco tias Leej Ntuj Plig Ntshiab muaj zog coj kev kaj siab lug tuaj rau peb thiab coj tau kev thaj yeeb tuaj rau lub ntiaj teb, ces Vaj Qhia thov li no tias “Leej Ntuj Plig Ntshiab yog tus pub kev thaj yeeb. Yog li peb thov Leej Ntuj Plig pub lub siab kaj lug rau peb, mas peb thiaj coj tau kev thaj yeeb mus rau qhov peb nyob, tsis hais hauv peb tsev neeg, cheeb tsham, los kev sib fim ntawm cov teb chaws.
Thov Huab Tais Yes Xus Pleev pub qhov pom kev tuaj rau cov tseem hwv kom lawv ntsia pom tias tsov rog tsuas tsim kev puas ntsoog, ces lawv tig los sib tham tsim kev haum xeeb.”
Kawg no, Vaj Qhia hais rau sawv daws tias “Cov kwv tij zoo nyiad, thov kom hnub no nej tau txais Leej Ntuj Plig Ntshiab lub zog, ces nej coj Leej Pleev chaw vam khom mus pub rau txhua tus neeg mog!”
