Mov : Yog ntsuj plig ntawm lub neej thiab zej zog (RICE: The Soul of Life and Community)

Mov : Yog ntsuj plig ntawm lub neej thiab zej zog (RICE: The Soul of Life and Community)

Mov yog qhov tseem ceeb tshaj tej txhiam xws noj, yog lub tswv yim kev xav nyob hauv zej zog. Yog qhov sawv cev ntawm tus ntsuj plig, kab lis kev cai thiab lub zog ntawm kev sib koom ua ib tug. Hais txog As Xias feem ntau, mov tsis yog tias yog txhiam xws noj yug txoj sia xwb. Nws tseem yog tus cag tob ntawm lub neej hauv kab lis kev cai thiab qhov muaj nqis hauv zej zog. Tshwj xeeb tshaj yog haiv neeg Pas Kas Yos uas yog ib haiv neeg toj siab nyob Thaib qaum teb.

Hais txog qhov no, mov yog qhov tseem ceeb tshaj tej txhiam xws noj. Nws cov yog qhov sawv cev fab ntsuj plig, kab lis kev cai thiab lub zog ntawm kev sib koom ua ib tug hauv zej zog. Yog tias qhov tseem ceeb hauv lub neej no piam sij lawm, nws yuav muaj dab tsi tshwm sim ? Nyob hauv xyoo 1970, cov Pas Kas Yos nyob hauv lub zos Khun Pae raug ntuj qhuav loj heev. Thaum lawv tsis muaj mov noj, ntau yim neeg raug mus qiv txais ntawm cov neeg nplua nuj uas lawv xav tau ntsej muag thiab huab noj huab haus. Lawv yuav tsum them paj siab txog 20 feem pua nyob hauv ib lub hlis. Tej nuj nqis thiab tej kev txom nyem no yog qhov zam tsis dhau. Chiv thawj cov txhab txhuv raug muab tawm los ua qhov chaw daws teeb meem, tab sis peev nyiaj txiag ntawm lub Koom Haum no tsis haum xeeb nrog kab lis kev cai ntawm haiv neeg Pas Kas Yos uas lawv nyiam sib faib thiab sib pab. Thiaj ua rau lub tswv yim no rais los ua lub Koom Haum “Zoo siab ntawm kev pub mov”. Yog lub Koom Haum zej zog tswj hwm thiab lawv hais txog kev pub, kev vam txog tus kheej thiab kev sib koom tes thaum muaj kev nyuab siab. Lub Koom Haum no sau txhuv ntawm cov tim xyoob hauv zej zog, kom tau pab cov neeg xav tau kev pab. Tsis hais cov poj ntsuam los sis cov me nyuam ntsuag thiab cov tsev neeg pluag txom nyem. Lawv tsis cais hais txog kev teev hawm los yog lub neej hauv zej zog. Kev pub tsis hais ntau los tsawg yeej muaj nqis ib yam. Ces ua rau cov tim xyoob uas lawv yog neeg txom nyem kuj muaj feem cuam thiab muaj meej mom thiab txaus siab kawg. Cov hauj lwm no tseem pab txuag qhov muaj nqis ntawm kev sib pab sib vam thiab txhawb nqa kev phooj kev ywg hauv zej zog. Dhau ntawm tej txhiam xws noj lawm, lub Koom Haum “Zoo siab ntawm kev pub mov”, tseem yog lub Cim ntawm kev sib koom tes daws tej teeb meem tsis sib luag thiab raug quab yuam los ntawm kev lag luam tuaj sab nraud tuaj.

Nyob hauv cov Pas Kas Yos txoj kev ntseeg, mas mov yog qhov tseem ceeb ntawm fab ntsuj plig. Muaj ib lo lus hais tias : “Mov qab, neeg zoo thiab siab zoo”. Ua kom pom txog lub tswv yim tias mov tsis yog yug lub cev xwb, nws tseem yug tus ntsuj plig thiab. Muaj kev ua kab ke kom tau hwm “mov tus ntsuj plig” ua ntej yuav hlais nplej, yog qhia txog kev ua ncaj ua zoo rau txhua yam ntuj tsim thiab lees tias mov yog qhov paj tshab dawb huv yug txoj sia uas Tswv Ntuj muab.

Lub Koom Haum “Zoo siab ntawm kev pub mov”, yog qhov txuas nrog kab lis kev cai ntawm cov Pas Kas Yos, nrog kev teev hawm Phus Thas thiab kev ntseeg. Xws li kev faib mov raws cov hauj sam los siv nrog qhov muaj nqis ntawm kev ua hauj lwm. Kev sib faib ntawm cov neeg ntseeg hauv lub Caij Plaub Caug. Kev muab los sib xyaws no pab txhawb tus cag hauv kab lis kev cai thiab tus ntsuj plig hauv lub Koom Haum. Lub Koom Haum “Zoo siab ntawm kev pub mov” tseem yoog raws kev txhawb nqa hauv cov Tswv Qhia As Xias lub rooj sab laj, uas yog lub Koom Haum muab siab rau sib txhawb kev ntseeg thiab kab lis kev cai, kom nrog txais kev txhawj xeeb txheej tshiab.

FABC lub hom phiaj muaj tus cag nyob hauv 3 yam no.

1 – Kev nrog tsoom pej xeem sib tham, tshwj xeeb tshaj yog cov neeg pluag txom nyem.

FABC txhib txog qhov zoo ntawm fab ntsuj plig thiab lub tswv yim hauv kab lis kev cai ntawm tej pab neeg raug tso tseg. Muab qhov tseem ceeb rau kev muaj feem cuam txhawb nqa, tab txawm me me xwb kuj xij. Lub Koom Haum “Zoo siab ntawm kev pub mov” yuav ntxiv zog rau cov tim xyoob txhua tus hauv zej zog, rau lub meej mom thiab kev muaj vaj huam sib luag.

2 – Kev sib tham nrog tej kab lis kev cai.

FABC txhib hais txog qhov tseem ceeb hauv kev txuag tej kab lis kev cai hauv zej zog thiab txhim kho kom haum nrog tej kev ua hauv kev teev hawm. Hais txog cov Pas Kas Yos, mas mov yog lub cim ntshiab thiab yog qhov tseem ceeb hauv lub neej niaj hnub. Yog qhov sawv cev ntawm tej kab lis kev cai thiab fab ntsuj plig.

3 – Kev sib tham nrog lub cuab tam hauv kev teev hawm.

Lub Koom Haum yog tus piv txwv ntawm kev sib koom tes hauv cov kev teev hawm, uas yog kab ke muab cov Phus Thas, cov neeg ntseeg thiab zej zog tej kev cai los siv. Lub Koom Haum siv txoj kev pub dawb xws li cov Phus Thas. Sib pub thiab sib faib xws li cov neeg ntseeg lub Caij Plaub Caug, uas yog sib faib thiab pab luag tej. Ua kom pom tias kev ntseeg uas sib txawv tuaj yeem sib koom ua ib tug nyob hauv qhov muaj nqis tau li cas.

Lub Koom Haum “Zoo siab ntawm kev pub mov”, hloov kev ntseeg los ua kev nqis tes ua. Ua yam kom nyob tau ntev hauv kev sib koom tes thiab nrog zej zog sib haum xeeb. Cov hauj lwm no tau txais kev txhawb nqa los ntawm cov thawj coj nyob hauv zej zog. Xws li Txiv Plig Niphot Thienwihan uas yog tus Txiv Plig Kav Tos Liv Bétharram thiab cov tub koom tes uas txhim tsa pawg Circle of Sacred Rice ua raws kev ntseeg hauv kev txhawb nqa. Txiv Plig Niphot txoj kev ua hauj lwm yog txuag thiab ua kom haum kab lis kev cai thiab kev ntseeg. Nws coj cov thawj coj mus tsham txhua qhov chaw nyob Thaib teb, kom lawv paub thiab pom tej yam tshiab coj los pab kev txhim kho. Hauv tej kev mus ncig tsham no yog hais txog kev mus tsham cov tuam khw, tej chaw muaj neeg coob coob thiab tej chaw peev nyiaj txiag. Ua rau sawv daws tau pom kev coj ntawm tej pab neeg thiab kev lag luam uas sib txawv. Piv txwv li lawv mus kev ntau hnub rau tej qhov chaw neeg coob coob nyob Bangkok, kom tau pom tej yam tsis sib luag uas yog tshwm sim los ntawm kev noj kev haus thiab nroog ti ti nqaim nqaim. Lub neej tshiab nyem no yuav tsum tawm tsam nrog kev tsis sib luag thiab kev ua lag luam ntau dua. Kev ua lub neej ntawm cov Pas Kas Yos kuj yog xav tsim kev lag luam kom zoo thiab txhim kho fab ntsuj plig. Lwm zaus thaum koj zaum noj mov, thov koj nyob twj ywm thiab ua zoo xav txog mov me ntsis. Vim mov tsis yog tias yog qoob loo xwb, nws tseem yog lub cim ntawm txoj sia, lub cim ntawm kev sib koom tes thiab lub meej mom ntawm tib neeg kev ua lub neej.

Kwv tij Hmoob sawv daws ! Hnub no peb tham los xaus li no xwb. Lwm zaus peb mam rov sib ntsib dua. Nej sawv daws nyob zoo !