Lo lus hauv lub neej lub 11 hlis 2025. Word of life November 2025
“Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.” (Mas Tais 5:9)
Tsis ntev los no, raws kev soj ntsuam los ntawm 3 lub tsev kawm ntawv txheej siab nyob Is Tas Lias teb pom tias ; muaj kev tso tej lus sib cav nyob hauv Online hais txog kev ntxub thiab sib thuam 1 plhom tawm kab lus nyob hauv ib xyoos. Cov lus sib cav phem tshaj yog hais txog cov neeg His Xas Lais, thiab tshwj xeeb tshaj yog cov poj niam. Hais qhov tseeb tias peb tsis tuaj yeem yuav xaus cov lus no tau, vim peb txhua tus puav leej ntsib tej lus sib cav no. Tej lo lus tsis tsim nyog thiab lus sib cav uas ua rau neeg sib cais thiab ua rau kev sib koom tes hauv zej zog tawg. Tshwj xeeb tshaj kuj yog hauv tsev neeg, hauv tej chaw ua hauj lwm, tej tshav ncaws pob thiab hauv tej tsev kawm ntawv.
Dhau no lawm, zim txwv no tseem muaj kev sib cav hais txog riam phom 56 zaus nyob thoob ntiaj teb. Yog kev sib cav ntau zaus kawg txij ntsuj tsov rog ntiaj teb zaum ob los, ua rau neeg tuag coob kawg. Nyob hauv cov xwm txheej no, Yes Xus cov lus thiaj yog cov lus txhawb siab dua, yog qhov tseeb dua thiab muaj hwj chim dua raws li yav dhau los.
“Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.”
Peb sawv daws puav leej xav kom muaj kev thaj yeeb, muaj kev sib koom tes thiab sib koom ua ib tug. Tab txawm peb muab siab rau thiab xav qhov zoo, tsis kav tom qab ntawm cov xwm txheej dhau mus ntau txhiab xyoo, peb kuj tseem pom tias tus kheej tsis tuaj yeem tsim tau kev thaj yeeb ruaj khov thiab nyob ntev mus. Yes Xus tuaj kom tau coj kev thaj yeeb tuaj rau peb. Nws hais rau peb tias ; nws txoj kev thaj yeeb txawv ntiaj teb txoj kev thaj yeeb. Vim tsis yog tias ua kom txhob muaj tsov rog, txhob muaj kev sib cav, txhob muaj kev sib tawg los yog tsis ua qhov txhab rau hauv lub siab.
Yes Xus txoj kev thaj yeeb, yog tas nrho txhua yam uas peb hais los ntawd. Tshaj ntawd lawm nws yog lub neej uas muaj kev sov siab, kev cawm puv npo ntawm tib neeg. Kev ywj pheej, kev ncaj ncees thiab ua kwv ua tij uas yog qhov tob nyob hauv tib neeg txoj kev nyiam kev hlub.
Lo lus ntawm lub neej hauv lub hlis no, yog lo lus foom hmoov zoo tim 9 hauv kev sov siab. Nws yog ib lo lus foom hmoov zoo los ntawm Yes Xus cov lus qhuab qhia nyob saum roob. Yog kab lus nyob hauv Mas Tais ntawv Moo Zoo zaj 5 qib 9.
Yes Xus tau ua lub neej raws cov lus qhuab qhia txhua nqe uas nws hais rau nws cov Thwj Tim. Qhov uas peb yuav saib, yog tas nrho hauv 8 lo lus cav txiaj ntsim no. Ua kom pom tias lub ntsiab tsis yog nyob ntawm yus txoj kev xav los kev ncaj ncees xwb, tab sis nws yog kev sib koom ua lub neej ua ke. Nws kuj yog kev ncaj ncees hauv kev sib koom ua ib tug nyob hauv zej zog.
“Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.”
Li ntawd, leej twg yog cov tsim kev thaj yeeb ? Lo lus cav txiaj ntsim no yog ib lo lus uas muaj kev khuv leej kawg nyob hauv tas txhua lo lus. Nws hais txog kev nqis tes ua, yog lo lus hais zoo li thawj lo lus nyob hauv Ntawv Ntshiab hais txog kev tsim. Ua kom pom txog lub tswv yim tsim tawm, lub tswv yim hauv kev pib thiab kev nqis tes ua. Kev nyiam kev hlub, yog kev tsim tawm. Kev nyiam kev hlub tseeb tiag, yuav nrhiav tau nyob hauv kev rov sib haum xeeb, tsis hais yuav xuas dab tsi pauv kuj xij. Tus uas raug hu ua “Tswv Ntuj Leej Tub”, yog tus tau kawm thiab xyaum txog kev thaj yeeb. Lawv paub tias kev rov sib haum xeeb yuav tshwm sim tsis tau, yog tsis muab tus kheej los nqis tes ua. Qee zaus kuj yog kev muab yus txoj sia los cev rau. Thiab lawv paub tias kev thaj yeeb yog yam uas peb nrhiav txhua lub sij hawm, tsis hais yuav xuas dab tsi pauv kuj xij. Tab sis tsis yog yam uas peb ua tau los ntawm lub zog, nws yog los ntawm lub txiaj ntsim nyob siab. Yog yam uas peb tau txais los ntawm Yes xus. Yes Xus yog peb txoj kev thaj yeeb, peb thiaj rais ua Tswv Ntuj cov me tub me nyuam.
“Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.”
Peb yuav ua lub neej raws lo lus no tau li cas ? Thawj yam yog xa kev nyiam kev hlub tseeb tiag mus rau txhua qhov chaw uas peb nyob. Dhau ntawd, thaum twg kuj xij uas yog kev thaj yeeb nyob ib ncig peb raug rhuav tshem, mas peb yuav tsum mus pab. Qee zaus peb tuaj yeem ua tau. Tsuav yog peb siv kev nyiam kev hlub los mloog tus uas tab tom sib cav, ces pab kom peb txawj ntsia pom txog yav tom ntej. Peb yuav tsis swb mus txog thaum kev sib raug zoo tawg tas. Tej yam no nws kheev kheev raug tej yam me me ua kom puas tsuaj. Peb yuav sib mloog nyob hauv kev sib txhawb, yam li hauv cov Koom Haum los yog hauv thaj tsam uas muaj cov neeg ntseeg. Peb yuav pib ua thiab yuav sib koom tes txhawb txhua yam kev pib, kom tau paub txog qhov tsim nyog hauv kev thaj yeeb ntau tuaj. Tas ntiaj teb tau muab siab rau hauv tej yam loj thiab me, uas tab tom ua nyob hauv tej yam hais los no. Tsis hais kev tawm tsam, kev hu nkauj, kev sab laj thiab kev zoo siab sib koom. Puav leej yog lub suab ntawm kev khuv leej uas tsim kev thaj yeeb. Dhau no lawm tseem muaj cov Koom Haum qhia kom paub txog kev thaj yeeb thiab. Xws li lub “Koom Haum kev thaj yeeb ciaj sia.”
Los txog tam sim no muaj cov tsev kawm ntawv thiab lwm pab neeg li ntawm 2,600 qhov chaw sib koom tes ua cov hauj lwm no. Muaj cov me nyuam yaus, cov hluas thiab cov laus li ntawm 2 plhom leej, uas lawv muaj feem cuam txog cov hauj lwm hauv kev pib ua txhua yam, nyob hauv 5 xeev ntuj.
Kwv tij Hmoob sawv daws ! Hnub no peb tham txog lo lus hauv lub neej los xaus li no xwb. Thov nej nco ntsoov tias : “Cov tau txoj hmoov zoo, yog cov tsim kev thaj yeeb, vim Ntuj yuav hu lawv ua Tswv Ntuj cov me nyuam.” Yog peb muab siab rau tsim kev thaj yeeb, mas peb kuj yog Tswv Ntuj cov me nyuam thiab.
Thov Tswv Ntuj foom hmoov zoo thiab pov hwm nej sawv daws.
Lwm zaus peb mam sib ntsib dua, nej sawv daws nyob zoo !
