Kev zam txhaum. The Forgiveness of Sinners
Peb los txog ntu kawg hauv lub Caij Plaub Caug lawm, peb los txog Hnub Chiv Nqaum Nplooj, vim tias nyob Hnub Chiv no peb yuav nyeem zaj hais txog Mas Tais, Mas Kos los yog Lus Kas tas mus li. Nyob hauv Hnub Rau Ntshiab peb yuav nyeem Zam ntawv Moo Zoo. Ntawv Moo Zoo uas yog zaj ntev heev nyob hauv lub Caij Plaub Caug. Yog hais txog lub ntsiab tiag tiag thiab yog zaj hais txog qhov xaus ntawm lub Caij Plaub Caug. Li ntawd, thiaj yog qhov peb txaus siab rau Hnub Chiv Nqaum Nplooj. Yam uas kuv xav ua yog nrhiav tej lub Cim tshwj xeeb no. Xyoo no, peb yuav los mloog zaj nyob hauv Lus Kas ntawv Moo Zoo. Thiab muaj tseeb tiag uas nws ntxhov kawg nyob hauv Mas Tais, Mas Kos thiab Lus Kas. Tab sis muaj qee yam uas tseem ceeb hauv cov sau ntawv Moo Zoo txhua tus. Kuv thiaj xav saib nyob hauv 2 yam uas yog lub Cim ntawm Lus Kas. Nyob hauv 2 yam uas hais txog kev zam txhaum, 2 yam no puav leej hais txog kev zam txhaum. Nov yog thawj zaj, nyob hauv Lus Kas phau ntawv xwb uas peb yuav pom Yes Xus nrog 2 tug tub sab dai saum Ntoo Cuam nyob ntawm Yes Xus 2 sab tham. Nyob hauv Lus Kas ntawv Moo Zoo xwb, uas peb pom ib tug txiv neej uas nws yog tub sab, tab sis nws yog neeg zoo. Nyob hauv zaj no nws tseem ceeb heev rau kuv thiab rau peb sawv daws cov uas yog neeg txhaum. Li ntawd, xav tias koj yeej paub txog zaj no zoo. Yes Xus raug ntsia nyob saum Ntoo Cuam hauv nruab nrab, ntawm nws ob sab muaj ob tug txiv neej uas lawv hu ua tub sab. Kuv xav tias nyob ntawm lwm phau ntawv Moo Zoo nws yeej yog tub sab thiab. Nkawd yog leej twg ? Nkawd lub txim txhaum yog dab tsi ? Tseem tsis tau muaj qhov meej tseeb pes tsawg, tab sis nkawd yog neeg phem thiab tab tom raug rau txim. Thawj tug hais rau Yes Xus tsiv kawg. “Koj tsis yog Leej Pleev lod ? Koj rov cawm koj thiab koj cawm wb mas !” Peb yuav nco tias peb txhua tus puav leej yog neeg txhaum, kuv yog neeg txhaum thiab sawv daws yog. Ces peb paub tias qhov chaw ntawm no yog zoo li cas. Thaum koj poob mus rau qhov chaw qis hauv fab ntsuj plig, koj yuav paub tias koj poob tsam. Qhov uas koj raug luag hais, yog raug thuam. Kev txom nyem, kev chim siab yuav ua rau koj yws thiab kiam lwm tus vim koj. Tas txhua yam ntawd xaus rau ntawm no.
Nov yog Yes Xus Pleev uas nyob ntawm ib sab. “Saib seb, kuv xav tias koj yog neeg tseem ceeb, koj yog Mes Xias, tab sis ua cas koj tsis cawm wb, thiab rov cawm koj ?”
Qhov tsis hwm, yog muaj kev thuam, kev chim siab thiab npau taws. Peb sawv daws puav leej tau ntsib tej teeb meem li ntawd los lawm. Hauv peb cov txhaum, peb pom tias peb nyob hauv txhua lub sij hawm uas lub neej zoo li tus txiv neej no. Peb yuav ntsia mus rau lwm tus tub sab uas raug rau txim seb, nws hais tias :
“Koj tseem tsis ntshai Tswv Ntuj lod ? Qhov tiag wb raug rau txim yog txoj kev ncaj, vim wb tau ua tej yam tsim nyog raug txim. Tab sis tus txiv neej no tsis tau ua dab tsi txhaum li.” Kev sib txawv ntawd nws meej tseeb kawg. Thawj tus neeg yog nyob hauv kev chim siab tsis yog lod ? Nws kiam tus nyob ntawm ib sab tias tsis lees txais yam nws ua. Nws xav nrhiav kev dim yooj yim. Tus tub sab uas yog neeg zoo, nws yuav lees txais nws txoj kev txhaum. Nws hais tias : “Saib ma ! Wb raug txiav txim, tsim nyog wb lub txim txhaum.” Hais kom yooj yim thiab zoo mloog tias : “Kuv muaj txhaum, kuv tsis tau cav kom kuv yeej, kuv tsis tau kiam lwm tus, kuv tsis tau cib nyeej, kuv lees tias kuv yog neeg txhaum.”
Qhov no nws tseem ceeb raug cov neeg txhaum npaum li cas. Peb kheev kheev xaiv thawj yam uas yog kev cawm, yuav lees txais tias peb yog neeg txhaum. Kuv thov qhia tias nws yog qhov nyuab heev nyob hauv peb lub neej zim txwv no. Kuv xav tias yog ib lub Cim txheej thaud ntawm peb uas nyiam daws tso tus kheej, thiab rov zam txim rau peb. Kuv tsis yog neeg txhaum, nov tsis yog kev txhaum ntawm kuv. Nws yog zej zog, nws yog kuv lub cuam tam, nws yog yam kuv quav thiab yog dab tsi kuj tau.
Yam kawg uas kuv yuav ua yog kuv yuav lees tias kuv yog neeg txhaum, kuv tau ua txhaum. Kev rau txim uas kuv tau txais, nws yog qhov tsim nyog kuv tau txais. Ib qho yuav tsum tau ua ua ntej, yog koj yuav lees txhaum kom tau txais kev zam txhaum. Ib qho yuav ua yog kev txawj nco txog yus cov txhaum. Ntawd yog qhov tias thaum koj mus lees txhaum, nws tsis yog ib qho kab ke me me uas tsis muaj qab hau. Thaum Txiv Plig kom koj hais koj cov txhaum, tsis hais yuav yog xeem lus twg los koj xeem lus. Hauv xeem lus Latin yog “contritio”, txhais tias zuaj los xuab. Peb yuav lees tias peb cov txhaum raug zuaj raug xuab ua hmoov tas. Peb yog neeg txhaum, peb muaj txhaum, yog tias peb lees txais tsis tau, mas kev zam txhaum kuj tsis tuaj yeem ntws mus txog hauv peb lub siab tau. Tsis yog tias Tswv Ntuj ua nruj heev, tab sis yog peb tiv nws heev dhau. Yog koj tsis tuaj yeem lees txais koj qhov txhaum, koj kuj yuav tsis tau txais kev zam txhaum. Nws yooj yooj yim li ntawd xwb. Nws yog qhov nyob hauv fab ntsuj plig. Li ntawd, saib tus txiv neej no seb, nws tab tom yuav tuag. Nws yog neeg phem. Kuv tsis paub tias nws ua dab tsi txhaum, tab sis nws paub qhov tsis zoo uas nws ua. Tam sim no nws tab tom yuav tuag thiab yog qhov kawg hauv nws lub neej. Yog qhov qhib kev rau nws mus txog kev cawm, yog nws lees txais nws cov txhaum. Li ntawd, thaum yuav xaus lub Caij Plaub Caug thov lees koj cov txhaum. Koj yog neeg txhaum, koj tau ua txhaum, koj tsis kiam leej twg. Txhob nrhab tes tawm mus vim kev chim siab. Yuav lees koj cov txhaum nyob ntawm Tswv Ntuj xub ntiag, vim nws yog qhov zoo heev. Lwm tus tub sab tig mus ntsia Yes Xus thiab hais tias : “Yes Xus, thaum koj mus txog hauv koj lub Ceeb Tsheej, thov koj nco txog kuv.”
Ntau tus kws fab ntsuj plig nco txog kev siv npe ntawm Tswv Ntuj nyob hauv ntawv Moo Zoo, nws nyuab kawg uas Yes Xus yuav siv lub npe Yes Xus. Txhais tias nws raug hu ua Xib Hwb, raug hu ua Das Vis Leej Tub. Tab sis ntawm koj, mas koj yuav hu Yes Xus lub npe. Tsis yog kev muab hlob, tab sis yog kev ua tawm txog kev sib raug zoo thiab phooj ywg. “Yes Xus, thaum koj mus txog hauv koj lub Ceeb Tsheej, thov koj nco txog kuv.” Yes Xus tsis tau hais txog kev ncaj ncees thiab kev zoo nyob hauv no, xws li “Tswv Ntuj, thov koj pub kuv chaws mus hauv koj lub Ceeb Tsheej, vim kuv tau ua yam zoo zoo.” Qhov no tsis muaj, vim nws yog neeg txhaum. Nws paub zoo thiab nws lees txais. “Yes Xus, thaum koj mus txog hauv koj lub Ceeb Tsheej, thov koj nco txog kuv.” Nov yog kev xav ntawm fab ntsuj plig uas zoo tiag tiag. Kuv thov qhia tias thaum peb pib mus rau lub Lis Piam Ntshiab, nws yog cov lus thov Ntuj zoo heev ntawm peb txhua tus uas yog neeg txhaum. Kuv yog hais txog ib feem ntawm cov lus zoo nyob hauv ntawv Cog Lus Tshiab uas Yes Xus hais tias : “Kuv hais tseeb rau koj : hnub no, koj yuav nrog kuv nyob hauv lub Nras Lom Zem.”
Muaj neeg hais tias Yes Xus xav tau ib teev kua muag ntawm kev nco txog kev txhaum, kom tau zam txhaum xwb. Sim xav txog tus neeg phem hauv kev txhaum seb, thaum txog qhov kawg nws tsuas poob tib teev kua muag hauv kev txhaum nyob saum txaj xwb. Tab sis nws kuj yog txhua yam uas Yes Xus xav tau. Lwm tus tub sab hais tias : “Yes Xus, thov koj nco txog kuv.” Thiab Yes Xus hais tias : “Hnub no, koj yuav nrog kuv nyob hauv lub Nras Lom Zem.” Lo lus thov Ntuj uas zoo tshaj ntawm peb cov neeg muaj txhaum, peb txhob swb. Peb yuav nco tias peb yog neeg phem, peb poob mus qis heev. Yes Xus tsis muaj hnub zam txhaum rau kuv. Ib yam uas kuv ua tau yog kuv chim tshee na. Thov ua raws tus txiv neej ntawd.
Nov yog yam ob los yog ib yam nyob hauv Lus Kas thiab tseem hais txog kev zam txhaum thiab. Nyob hauv Lus Kas xwb uas peb pom Yes Xus hais nyob saum Ntoo Cuam tias : “Txiv, koj zam rau lawv, vim lawv tsis paub tias lawv ua dab tsi ?” Yog Yes Xus ib lo lus hais uas raug siab kawg. Tsuas muaj Lus Kas xwb, uas peb pom lo lus ntawd. Kuv twb tau hais rau nej ntau zaus lawm tias : Yes Xus txoj kev tuag yog los ntawm neeg cov txhaum. Thaum peb nyeem zaj hais txog Yes Xus raug kev txom nyem nyob hauv Hnub Chiv Nqaum Nplooj. Mas nej yuav hnov tias kev ntxub ntxaug, kev phem, kev ruam, kev ua tsiv, kev nrhiav yaj los them txhim thiab kev tsis ncaj ncees. Tas txhua yam ntawd zoo li txhua tus nas tawm ntawm lawv lub qhov los, txhua yam kev phem raug nthuav tawm. Txhua lub hnab looj ntsej muag raug dua ntuag tas thiab peb pom neeg qhov tsis ncaj ncees tawm los ntawm Yes Xus. Yes Xus yuav ua li cas ? Yes Xus hais tias : “Txiv, koj zam rau lawv, vim lawv tsis paub tias lawv ua dab tsi ?” Puas pom tias cov neeg ntawd lawv tsis paub dab tsi li, thiab nov yog kev nthuav tawm cov lus ntawd. Yog Yes Xus yog neeg ncaj ncees, mas Yes Xus kuj yog xib hwb hauv fab ntsuj plig uas ua lub zog txhawb siab. Nco ntsoov Yes Xus lo lus no tias : “Txiv, koj zam rau lawv, vim lawv tsis paub tias lawv ua dab tsi ?”
Yes Xus yog leej twg ? Tsis yog tas li ntawd xwb. Yes Xus yog lo lus rais ua daim tawv nqaij. Yes Xus yog Tswv Ntuj lub koob meej. Yes Xus yog tus qauv ntawm lub cev xeeb los ua neeg, Yes Xus yog Tswv Ntuj ntawm Tswv Ntuj, yog sab ci ntawm sab ci, yog Tswv Ntuj tiag ntawm tus Tswv Ntuj tiag.
Li ntawd, neeg cov txhaum thiaj tiv Yes Xus. Koj puas pom tias nyob saum Ntoo Cuam, tsis yog lub txim tuag xwb. Tab sis yog kev piam sij loj kawg hauv neeg lub neej. Yog ib zaj yeeb yam tseem ceeb hauv tib neeg lub neej. Yog txim txhaum ua kom neeg ntsib Tswv Ntuj. Thov ua tib zoo xav tias : txhua yam kev txhaum txij qhov me mus txog kev tua neeg, nws muaj qhov koom nrog txoj kev txhaum no. Neeg cov txhaum uas tau ntsib Tswv Ntuj, cov txhaum uas tawm los tiv Yes Xus. Qhov uas peb yuav ntsia pom nyob hauv no, yog tas nrho peb cov txhaum. Txhua yam txhaum uas koj tau ua, txhua yam txhaum ntawm tib neeg muaj qhov sib koom ua ke, yog kev tiv Tswv Ntuj. Yes Xus cov lus tsis yog tus neeg zoo cov lus thiab kev teev hawm nruj nruj xwb. “Txiv, koj zam rau lawv, vim lawv tsis paub tias lawv ua dab tsi ? Lawv tsis paub tias lawv yog leej twg, lawv tsis paub tias kuv yog tus Tswv Ntuj ntawm Tswv Ntuj.” Yes Xus cov lus yog kev dim ntawm peb, peb yuav txav mus ze Yes Xus nyob hauv txhua yam uas peb muaj.
Peb mus nrhiav Yes Xus hauv peb txhua txoj kev tiv thaiv, ces peb yuav ntsib dab tsi ? Kev zam txhaum yog tas cov neeg ntseeg, yog qhov tshwj xeeb nyob hauv peb txoj kev ntseeg. Peb tsis tau txais kev tiv ntawm Tswv Ntuj, peb tsis tau pom Tswv Ntuj chim rau peb. Peb tsis tau ntsib kev ua pauj ntawm Tswv Ntuj, peb tsis tau ntsib kev ncaj ncees hauv kev pauj ntawm Tswv Ntuj. Qhov peb ntsib yog ntsib kev zam txhaum xwb. Ces tam sim no peb yuav muab qhov no los hloov ua kev yees tawm tuaj hauv kev sawv rov los. Thaum Yes Xus yees tawm tuaj rau cov neeg tso Yes Xus tseg, cov ntxeev siab rau Yes Xus, cov tsis lees txais Yes Xus, Yes Xus cov phooj ywg, Yes Xus cov Thwj Tim uas lawv tso Yes Xus pov tseg thaum qhov tseeb yuav tshwm sim. Yes Xus muab nws lub qhov txhab rau lawv saib. Yes Xus hais rau lawv tias : “Salom, kev thaj yeeb nyob hauv nej.” Tus tub sab zoo hais rau Yes Xus tias : “Yes Xus, thaum koj mus txog hauv koj lub Ceeb Tsheej, thov koj nco txog kuv.”
Yes Xus hais tias : “Kuv hais tseeb rau koj : hnub no, koj yuav nrog kuv nyob hauv lub Nras Lom Zem.” Lub Nras Lom Zem yog Tswv Ntuj lub Ceeb Tsheej.
Tas neeg cov txhaum tawm tuaj, kom tau tos txais Yes Xus thiab tiv Yes Xus. Tab sis Tswv Ntuj teb neeg nyob hauv kev nyiam kev hlub, kev zam txhaum. Koj puas pom tias vim li cas kuv thiaj hais tias Ntoo Cuam yog peb kev cawm seej ? Vim li cas kuv thiaj hais tias nyob saum Ntoo Cuam yog daws neeg cov txhaum ? Vim li cas kuv thiaj hais tias Leej Txiv txaus siab rau Leej Tub txoj kev tuag ? Ntawd yog qhov tias neeg cov txhaum raug daws tas lawm. Li ntawd, peb txhua tus nyob hauv lub lis piam Yes Xus raug kev txom nyem, nyob hauv Hnub Chiv Nqaum Nplooj no. Thaum peb nyeem Lus Kas ntawv Moo Zoo, peb yuav muab siab rau txog qhov Tswv Ntuj zam txhaum rau peb. Tus tub sab uas yog neeg zoo, nws tseem paub nco txog nws cov txhaum. “Tswv Ntuj, kuv tsis tau khiav los yog tsis lees kuv cov txhaum, vim kuv yog neeg txhaum.” “Yes Xus, thaum koj mus txog hauv koj lub Ceeb Tsheej, thov koj nco txog kuv.” Yog koj qhib siab tos txais kev zam txhaum, mas koj yuav tau txais kev khuv leej ntawm Tswv Ntuj tiag.
Kwv tij Hmoob sawv daws ! Hnub no peb tham txog kev zam txhaum los xaus li no xwb. Thov peb nco ntsoov tus tub sab uas nws yog neeg zoo lo lus no tias : “Yes Xus, thaum koj mus txog hauv koj lub Ceeb Tsheej lawm, thov koj nco txog kuv.”
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug !
Lwm zaus peb mam sib ntsib dua, nej sawv daws nyob zoo !
