Cov ntseeg nyob hauv lub Koom Txoos Kav Tos Liv uas muaj Vaj Qhia ua tus hloov Pob Zeb chaw txij xyoo 67 los txog rau niaj hnub nyem no. peb tau saib cov Ntawv Cog Lus Tshiab yog qhov rov tau qhia kom meej tshaj qub rau peb paub, uas yog qhov Yes Xus hais kiag ntag. Vim yeej muaj nyob hauv Ntawv Cog Lus Qub tau qhia kom caiv tsis txhob noj los tsis txhob ua lawm. Yes Xus thiaj rov qhia meej kom tsis tas yuav caiv lawm, los muaj tej yam tseem yuav caiv loj tshaj qhov qub ntxiv.
Yes Xus hu tsoom sid kom txav los ze nws. Nws hais rau lawv tias "Nej mloog kom nej to taub! Tsis yog tej yam nkag hauv neeg lub ncauj ua kom neeg tsis huv; yog tej yam uas tawm hauv lub ncauj los ua kom neeg tsis huv."
Cov thwj tim txav ze Yes Xus, lawv hais tias "Koj puas paub tias cov Fas Lis Xais hnov koj hais li ntawd, mas lawv tsis txaus siab "
Yes Xus teb tias "Tus yub twg tsis yog kuv Txiv nyob saum Ntuj cog, mas yuav muab dob pov tseg. Cia lawv chim lawv: lawv yog ib co neeg dig muag coj ib pab dig muag kev! Vim tias yog ib tug dig muag coj lwm tus dig muag kev, mas nkawd ob leeg yuav ua ke mus poob qhov."
Pob Zeb hais rau Yes Xus tias "Koj txhais lo paj lug ntawd rau peb."
Yes Xus thiaj hais tias "Nej tsis muaj tswv yim thiab lod? Nej tsis to taub tias tas ib puas tsav yam uas nkag hauv qhov ncauj, dhau mus rau hauv plab, ces mus xaus rau nraum chaw tawm rooj. Hos yam uas tawm hauv qhov ncauj los, yog xeeb hauv nruab siab tuaj, mas yam ntawd ua kom neeg tsis huv. Tej yam uas xeeb hauv nruab siab tuaj: yog kev ntaus tswv yim ua phem, tua neeg, deev luag txij nkawm, ua dev ua npua, ua tub sab, ua tim khawv cuav, thuam Ntuj. Tej no ua kom neeg tsis huv. Tab sis noj mov tsis ntxuav tes, tsis ua kom neeg tsis huv." (MT15:10-20)
Huab Tais Yes Xus hais meej kawg rau peb paub tias kev noj los rau hauv lub plab xwb mas ua tsis tau kom neeg tsis huv tuaj, los yog ua kom neeg txhaum.
Tej yam uas yog yuav ua txhaum es yuav tau caiv tiag tiag mas yog ‘lub siab xav phem, lub ncauj hais lus phem tawm, ces tes taw lub cev mus ua kiag mas yog txhaum.’ Yuav tsum caiv tiag tiag.
Huab Tais Yes Xus hais meej tias qhov ncauj poj niam mas yog qhov yuav tsum tau caiv loj tshaj qub. Los hais tias nrauj tsis tau kiag li.
“Tseem muaj tej lus qhia tias: Leej twg nrauj nws poj niam, yuav tsum muab ib daim ntawv nrauj rau tus poj niam.
Tab sis, kuv hais rau nej: Tus txiv neej twg nrauj nws poj niam, tus ntawd tso nws poj niam rau luag deev. Qhov no tsis yog hais txog tus poj niam uas mus 'nrog lwm tus txiv neej ua dev ua npua.' Hos leej twg yuav ib tug poj nrauj, mas tus ntawd yog ib tug deev luag txij luag nkawm.” (MT5:31-32)
