Nyob zoo cov kwv tij sawv daws, ob peb hnub tas los peb twb tau nyeem txog Hmoob Kev Cai Dab Qhuas uas yog yawg Nom Sauv xeem Hawj sau tseg ntu 1 thiab 2 tas los lawm; nyob hauv ntu 3 no peb yuav los paub txog cov dab nyob sab nraud peb tsev yog li nram no :
Yog hais tias koj muaj mob muaj nkeeg hnyav los yog koj yuav raug txim los yog raug xwm txheej dab tsi mas koj fiv niam txiv poj yawm tag, koj li hlawv ib teg xyab tawm mus rau nraum zoov mus hu txog tus ‘Tswv Ntuj’. Vim ntiaj teb neeg no xyov nws los nws qhov twg los ces tsis muaj leej twg paub tsuas hais tias yog ntuj tso los no xwb; ces thiaj mus fiv ntuj. Yog ntuj tuaj pov tau ces thiaj tau, yog ntuj tuaj pov tsis tau thiab ces tag li. Mas zoo li qhov kawg sawv daws kuj ntseeg ntuj pab thiab.
Tab sis fiv ntuj mas yog fiv nyuj fiv twm mas yuav tsis tshua leej. Fiv qaib xwb mas leej dua ntau, vim tias Tswv Ntuj mas nws yeej paub tias ‘tus qaib mas yus yuav tsum pauj tas xwb’. Mas qhov tawm mus fiv tus Theej Tswv no mas yog mus fiv tus Tswv Ntuj ntag.
Thawj los yus hais ces yeej hais tias ‘Tswv Ntuj’ no ntag mas yog lo lus Hmoob. Mas yus mam hais tias ‘Theeb Kooj Tim Mu’ txhais tias ‘Ntuj Txiv Teb Niam No’.
Hais txog cov ‘Dab Qus’ uas yuav tsum txi los pov hwm mas yog cov ‘Ntoo Xeeb’ los yog ‘Zeb Xeeb’. Yus yuav txi los pov hwm tej tsiaj txhu kom tsov txhob tom; muaj ob lo lus hu yog hu ua Ntoo Xeeb los Zeb Xeeb, hos ib lo lus hu ua tus ‘Ntoo Thawv Tim’ thiab lub ‘Zeb Thawv Tim’; mas yog tus tswv teb chaws tswv av ntawd ntag. Mas ib zaug yuav tsum txi ib tug nyuj los yog ib nkawg qaib los yog tib si, mas yuav tsum niaj xyoo txi. Yog yus ua yuam kev los yus tsis nco qab txi lawm mas tsov mas tom nyuj tom twm tuag pawg lug xwb.
Cov kwv tij, lawm lub lis piam peb mam los paub txog cov dab plaub ceg kaum ntuj tias muaj tus npe hu li cas.
