Muaj ib txhia hais tias ‘plaub ceg kaum ntuj muaj plaub tug txoov dab’. Yog hais tiag mas muaj 9 tus dab nyob saum lub ntuj : muaj 5 tug mas yog cov dab nyeg mus nyob rau plaub ceg kaum ntuj thiab rau saum lub ntuj lawm, hos muaj 4 tug mas mus ua dab qus dab noj neeg lawm. Mas nyo nyob es tej me nyuam cia li mob ceev ntuav ntshav pes dhawv yuav tuag, los muaj tej tus cia li vau hlo yuav tuag ces vim yog 4 tug dab no tuaj noj xwb.
Ces thiaj li mus hu 4 tug dab ntawm 4 ceg kaum ntuj mas yog 4 tug tij laug muaj lub npe li no : tus ib hu ua ‘Lwj Vis Txhee’, tus ob hu ua ‘Xwm Kuj Phij’, tus peb hu ua ‘Neem Nthee Xa’, tus plaub hu ua ‘Chij Laaj Lwm’. Plaub tug no yog tuav plaub ceg kaum ntuj xwb hos tus tsib yog tus tij laug hlob mas nws hu ua ‘Theej Tuam Yej’; nws yog tus loj nyob tuaj rau hauv nruab nrab lub plawv ntuj uas hu ua ‘Yis Txwv Ntuj’. Nws yog tus ua thawj nyob rau hauv plaub tug dab no.
Yog yus yuav vam txog lawv pab mas yus yuav tsum muab xyab muab ntawv thiab tawm rau nraum zoov mam li hu lawv tuaj pab. Vim tias cov dab qus uas tuaj noj neeg no mas yog lawv cov kwv muaj npe li nram no :
Ib tug hu ua ‘Cawv Tshuav Khawv’, ib tug hu ua ‘Kau Cooj Txhij’, ib tug hu ua ‘Puaj Tuam Cuj’, ib tug mas tsis paub npe lawm. lawv 4 tug no mus ua dab qus lawm, lawv los nyob rau hauv ntiaj teb no lawm, lawv los ua dab ruag roob ruam hav, dab hla ntuj hla teb. Cov dab no lawv los nyob roob nyob hav, nyob rau roob zeb roob tsuas tej qhov siab thiab tej qhov zeb qhov tsua. Thaum ub mas cov dab no lawv heev kawg; yog koj mus txog ze qhov chaw lawv nyob mas yuav tsum tsis txhob ua ib yam dab tsi txhaum lawv li, yog yus lam taw tes rau yus twb tuag lawm, yus mus hla lawv xub ntiag xwb mas twb ua yus mob lawm, yog lawv muaj dab tsi muaj nqis nyob tej roob siab tej qhov tus mas neeg mus kov tsis tau li; yog kov mas yeej tuag tu noob tsheej tsev neeg li ntag. Txij li luag pib ua tau cov phom loj thiab cov dav hlau yah la tej roob tej hav thiab tua phom loj mus rau tej roob tej hav mas cov dab no thiaj tsis leej thiab tsis ua heev rau neeg zoo li yav thaum ub lawm. Vim thaum ub dab hla neeg taub xwb hos nyiam no mas neeg yah la dab taub hau lawm xwb, mas thiaj ua rau neeg ntseeg tias muaj cov dab noj neeg ntawd tiag.
