Yes Xus nrog ib tug poj niam Xas Mas Lias tham (Npe 1)
124 Zam ntawv Moo Zoo zaj 4 : 5-42
Zam ib txwm tsis tau piav txog Yes Xus lub neej hauv qhov tseeb tiag. Tab sis nws muab txhua yam xwm txheej uas tshwm sim ntawd coj los teeb dua tshiab thiab siv cov ntsiab lus kom haum rau kev ntseeg. Ces tsis yog qhov yooj yim uas yuav piav tau tias dab tsi tshwm sim tiag. Tus poj niam Xas Mas Lias yog tus piv txwv zoo. Lub Cim uas tshwm sim nyob hauv zaj no meej tseeb kawg, txog qhov uas muaj qee leej teeb tej lo lus nug txog qhov tseeb ntawm cov xwm txheej ntawd. Xav tias yog ib zaj uas tus sau ntawv Moo Zoo teeb tawm los xwb. Txawm li cas los peb ntseeg tias Yes Xus tau ntsib tus poj niam Xas Mas Lias tiag. Tab txawm tej xwm ntawd raug sau dua tshiab uas siv xeem lus, siv duab thiab siv cov lus hauv Ntawv Ntshiab raws lub ntsiab hauv kev ntseeg kuj xij. Hauv peb txoj kev xav, mas peb xav tau ob yam. Yog cov liv xwm thiab kev ntseeg, tab sis yuav hais txog kev ntseeg yog qhov tseem ceeb dua.
Nyob rau txheej thaud, mas lub qhov dej yog qhov chaw sawv daws tuaj sib sau ua ke. Cov neeg yug yaj yuav tuaj sib ntsib nyob ntawm lub qhov dej, kom lawv cov yaj tau dej haus. Cov los pav yuav tuaj ua luam nyob ntawd tos cov neeg tuaj yuav. Thaum cov poj niam tuaj ce dej thiab tej zaum kuj tau nrog lawv tham pem ua si, los yog cov neeg tuaj nrhiav txij nkawm nyob rau ntawd.
Ntawv Ntshiab tau piav txog kev sib ntsib nyob ntawm lub qhov dej ntau zaus. Thov nej mus nyeem nyob hauv ntawv Hauv Paus zaj 24 qib 10-25, zaj 26 qib 15-25, zaj 29 qib 1-14 thiab ntawv Kev Tsiv zaj 2, qib 15-21. Zaj uas piav nyob hauv ntawv Moo Zoo hnub no, yog zaj hais txog Yes Xus thiab tus poj niam Xas Mas Lias. Lub qhov dej uas hais no tseem muaj nyob ntawm ntug kev txij Yus Das mus txog Nkas Lis Lais. Lub qhov dej muaj los tau 3,000 xyoo lawm thiab qhov tob yog 32 mev. Nws tseem yog lub qhov dej tsuag xws li hauv Yes Xus txheej neeg. Qhov chaw no yog qhov chaw uas cov neeg taug kev yuav tsum nres so kom tau ntxiv zog. Tab txawm Yes Xus mus kev, nws sab, nws kuj los zaum nyob ntawm lub qhov dej no. Thaum tav su muaj ib tug poj niam Xas Mas Lias tuaj ce dej. Yes Xus thov kom tus poj niam ntawd pub dej rau nws haus. Qhov uas tus poj niam ntawd xav tsis thoob, vim nws hnov Yes Xus lub suab. Tus poj niam ntawd hais tias : “Ua li cas ? Koj yog ib tug neeg Yus Das. Koj tseem yuav thov dej haus ntawm kuv. Kuv yog ib tug poj niam Xas Mas Lias.” Ib txwm los cov Yus Das tsis nrog cov Xas Mas Lias sib fim.
Cov Las Npis hais tias ; tab txawm kev sib tham xwb los yuav tsum hais lus kom tsawg. Cov xwm tshwm sim thaum tus Las Npis neeg Nkas Lis Lais nug ib tug poj niam ntawm kev tshuam tias :
“Txoj kev twg yog txoj mus rau Luz ?” Tus poj niam ntawd teb tias : “Koj hais lus nrog poj niam ntau dhau, tsim nyog koj yuav hais txog ‘Luz’ ntau dua.” Thaum Yes Xus cov Thwj Tim rov ntawm lub nroog uas lawv mus muas txhiam xws noj los txog, lawv poob siab rau qhov tias Yes Xus nrog ib tug poj niam hais lus. Tsis kav tsis muaj leej twg hais tias : “Vim li cas koj nrog nws tham ?”
Tus poj niam hais rau Yes Xus tias : “Huab Tais, kuv saib zoo li koj yog ib tug yaj saub.” Thiab tus poj niam hais ntxiv tias : “Kuv paub hais tias tus Mes Xias uas luag hu ua Leej Pleev yuav tuaj. Thaum tus ntawd tuaj txog, nws yuav tshaj ib puas tsav yam rau peb.” Yes Xus hais rau nws tias :
“Kuv yog tus ntawd, tus uas hais lus rau koj.”
Thiab tom qab nws kuj pom zoo txog qhov sawv daws hais tias :
“Yes Xus yog tus cawm lub qab ntuj neeg tiag.”
Kev mus kev hauv fab ntsuj plig ntawm tus poj niam Xas Mas Lias, Zam thiaj xav pab kom nws cov neeg ntseeg nkag siab txog txoj kev uas nws qhia rau cov thwj tim ua ntej yuav ntsib Leej Pleev. Tib neeg tsuas nrhiav tej cuab tam hauv lub neej xwb, vim tas txhua yam no tseem ceeb. Nws tseem ceeb tab sis tsis txaus. Tsis tuaj yeem ua tib lub hom phiaj thiab ua qhov siab tshaj ntawm lub neej tau. Tsuas muaj tus uas tau ntsib Leej Pleev thiab tus pom tias nws yog “tus cawm lub qab ntuj neeg.”
Thiab tus tos txais cov dej pub txoj sia ntawm nws xwb, thiaj paub tias kev tshaib thiab kev nqhis txhua yam daws tau. Qhov kawg hauv ntawv Moo Zoo qib 28-41, yog qhia txog qhov xaus kev mus kev hauv fab ntsuj plig ntawm tus poj niam Xas Mas Lias thiab cov Thwj Tim. Tus poj niam no ua dab tsi tom qab nws tau ntsib Leej Pleev ? Nws tso nws lub raj dej tseg, nws tsis xav tau ntxiv, vim tam sim no nws tau ntsib dua ib yam dej tshiab lawm. Nws khiav mus tshaj txog yam nws tau ntsib thiab nws txoj kev zoo siab rau lwm tus. Nov yog cov lus caw kom ua tub tshaj Ntuj Lus, ua thwj tim thiab ua xib hwb. Qhia sawv daws hais txog kev sov siab thiab kev thaj yeeb uas tau pom Tswv Ntuj thiab haus nws cov dej kom paub txog.
Kwv tij Hmoob sawv daws ! Hnub no peb tham txog Zam ntawv Moo Zoo zaj 4, qib 5 txog qib 42 los xaus li no xwb. Thov Huab Tais Yes Xus Pleev lub txiaj ntsim los ntxoov nej, kom nej sawv daws nyob nyab xeeb. Lw
m zaus peb mam sib ntsib dua, nej sawv daws nyob zoo !
