Lo lus hauv lub neej lub 2 hlis 2025. (Word of life February 2025)
Soj ntsuam txhua yam, tab sis khaws yam zoo tseg.
Nej hnov yam twg, mas nej tshuaj seb puas tseeb tso : yam twg zoo, mas nej khaws tseg. (1TXLN 5 : 21)
Tswv Ntuj lo lus hauv lub neej lub hlis no, yog los ntawm Paj Lug cov lus kawg uas nws hais rau cov ntseeg nyob hauv lub nroog Tes Xas Los Nis. “Txhob tua Leej Ntuj Plig xws li tua teeb, txhob thuam lub txiaj ntsim ua yaj saub. Yuav sim txhua yam thiab khaws qhov zoo tseg. Yuav zam kom dhau txhua yam kev phem.”
Kev ua yaj saub, kev ntsia pom, kev sib tham thiab kev mloog. Tas txhua yam no yog Paj Lug cov lus qhuab qhia cov nyuam qhuav tig los txais kev ntseeg tshiab.
Nyob tas hauv txhua yam uas Leej Ntuj Plig Ntshiab pub, mas Paj Lug qhuas txog lub txiaj ntsim ua yaj saub. Tus yaj saub tsis yog tus ntsia pom lub neej yav tom ntej, tab sis nws yog tus tau txais qhov pom kev thiab txawj mem txog tib neeg lub keeb, thiab muaj feem cuam txog Tswv Ntuj. Txawm li cas kuj xij, tas txhua yam Leej Ntuj Plig Ntshiab muab, qhov loj tshaj yog kev sib nyiam sib hlub xws li kwv tij.
Aus Nkus Tis Nus nyob Hippo hais tias : “Kev nyiam kev hlub xwb thiaj ua kom peb ntsia pom txog tus cuj pwm thaum ntsib tej yam txawv txav.”
Soj ntsuam txhua yam, tab sis khaws yam zoo tseg.
Peb tsis txhob xav txog tej yam paj tshab uas peb muaj xwb, peb yuav tsum xav txog qhov zoo thiab ntau ntau yam uas cov neeg nyob ib puag ncig qhia rau peb. Los yog tus neeg nrog peb ua hauj lwm thiab tus peb tau ntsib. Qhov tseem ceeb yog yuav txuag kev ncaj ncees thiab nco ntsoov txog txoj cai kav peb tas mus li. Lo lus hauv lub neej no, tuaj yeem ua qhov chaw txhib siab kom coj mus siv nyob hauv txhua lub caij thiab txhua yam thaum peb sib tham. Thaum peb mloog luag tej, mas peb lub siab yuav nthuav dav. Tab txawm peb tsis lees txais txhua yam uas luag tej hais, tsis kav peb pom yam zoo zoo nyob hauv lawv zaj tswv yim. Thaum kev nyiam kev hlub qhib peb lub siab mloog lwm tus, mas peb muaj lub caij tsim qee yam ua ke.
Soj ntsuam txhua yam, tab sis khaws yam zoo tseg.
Tswv Qhia tau xaiv Tis Mos Tes Radcliffe uas nws yog ib tug hauv cov kws Ntawv Ntshiab mus koom cov Tswv Qhia Kav Tos Liv lub rooj sab laj, nws hais tias :
“Yam muaj peev xwm tshaj uas peb ua tau nyob hauv lub rooj sab laj no, yog kev hais lus ncaj ncees txog kev ua xyem xyav thiab peb cov lus nug. Peb tsis muaj lo lus teb meej tseeb txog lo lus nug. Tab sis tom qab ntawd peb tig los ua ke hauv kev nrhiav xws li tus neeg thov khawv uas nrhiav tau qhov tseeb.”
Hauv kev nrog Focolare cov neeg sib tham, Margaret Karram tau tawm tswv yim hais txog lo lus nug no tias : “Muab xav los lawm, kuv nco tau tias ntau zaus kuv muaj cuab kav hais txhua yam uas kuv xav hais. Tab sis kuv kuj ntshai tias tsam tsis muaj neeg nkag siab, los yog vim kuv tsis xav kom txawv sawv daws. Kuv nco tau tias ‘kev ua neeg thov khawv hauv qhov tseeb’, txhais tias yuav tsum muaj kev xav zoo ib yam, kom peb sawv daws xav tawm yam Tswv Ntuj xav tau. Thiab thaum nyob ua ke, peb sawv daws yuav sib pab nrhiav yam zoo.”
Soj ntsuam txhua yam, tab sis khaws yam zoo tseg.
‘Soj ntsuam txhua yam, tab sis khaws yam zoo tseg’, nov yog kev paub ntawm Antia. Nws yog ib tug tub koom tes hauv pab neeg ua yeeb yam Mosaico, uas txhim tsa nyob Xyis Pas Yas teb xyoo 2017. Yog cov hauj lwm txhim kho zej zog ntawm pab tub paj nruag Gen Rosso uas yog cov tub ntxhais hluas Xyis Pas Yas. Lawv siv twj paj nruag thiab Workshops los qhia kev ua kwv tij rau lwm tus.
Antia hais tias : “Cov hauj lwm no xyaw nrog kuv txoj kev paub uas yog ntiaj teb kev ua kwv tij, cov uas lawv tseem yau thiab tsis tau muaj kev paub txog sawv daws muaj feem txhawb nqa cov hauj lwm no.” Mosaico ua kom kuv ntseeg tias lub ntiaj teb yog ib tug tsis yog Utopia. Utopia yog lub tswv yim kev tseev tsim, yog zej zog thiab txoj cai. “Tab txawm yuav nyuab txom nyem thiab ua hauj lwm hnyav, tsis kav kuv loj hlob nyob hauv txoj kev sib kooom tes ua hauj lwm. Qee zaus muaj kev sib tham ncaj ncees thiab kuv kheev kheev hnov qab kuv txoj kev xav uas kuv xav tias zoo tshaj plaws. Kuv pom tias cov hauj lwm no “kev zoo” raug ua tawm ib qho zuj zus kuj yog vim peb sawv daws.”
Kwv tij Hmoob sawv daws ! Vam tias Tswv Ntuj lo lus hauv lub neej uas peb tham hnub no, yuav pab ntxiv tswv yim rau nej thiab thov nej nco ntsoov Paj Lug lo lus no :
“Nej hnov yam twg, mas nej tshuaj seb puas tseeb tso : yam twg zoo, mas nej khaws tseg.” Thov kom peb tus Huab Tais Yes Xus Pleev lub txiaj ntsim nrog nej sawv daws nyob. Peb mam sib ntsib dua. Nej sawv daws nyob zoo !
