Leej twg tsis tiv peb, mas nws nrog peb. (Whoever Is not against us is for us)

By Hmong Service, 02 April, 2025

Leej twg tsis tiv peb, mas nws nrog peb. (Whoever Is Not Against Us Is For Us)

Tsab ntawv Moo Zoo uas hnub no peb nyeem nws zoo heev, vim nws yog hais txog teeb meem ntawm cov neeg ntseeg. Kuv xav tias cov neeg ntseeg tab tom nrog tus kheej sib ua rog. Dab phem tus uas nyob tas qhov txhia chaw, nws yog tus ua kom neeg sib tawg thiab nws cuab rooj ntxiab uas Xas Tas nyiam. Yog kev coj lub Koom Txoos uas nws txoj hauj lwm yog lub cuab yeej ntawm lub Moo Zoo nyob ntiaj teb, ua kom peb sib ua yeeb ncuab. Sib tawg sib faib thiab nws ua tus kav. Qhov ntawd yog lub tswv yim zoo kawg, yog tias koj xav rhuav tshem koj cov yeeb ncuab.

Nco ntsoov tej zaj qub qub ntawm Tolkien nws yog orcs. Orcs yog cov tsiv tsaim, tab sis lawv cheb ntxuav tus kheej tas mus li, vim lawv rov sib tiv lawv. Qhov kawg lawv rov sib tua. Yog tias koj ua tau kom koj cov yeeb ncuab zoo li ntawd, mas nws yog qhov zoo tshaj. Li ntawd, lub Koom Txoos tus yeeb ncuab nyiam ua si li no nyob hauv kev sib tawg, kom peb sib tawg. Tus piv txwv zoo kawg nyob hauv ntawv Cog Lus Qub yog : kev sib tawg ntawm Xas Ws thiab Das Vis. Das Vis yog Xas Ws tus tim xyoob. Nkawd nyob ua ke hauv ib pab. Nkawd koom tua tib tug yeeb ncuab. Tab sis kuj muaj ib lub suab hu yog cov poj niam lub suab hu nkauj. Xas Ws tua neeg tuag txhiab leej, tab sis Das Vis tua neeg tuag vam leej. Xas Ws ntxub Das Vis thiab nws caum Das Vis tua. Thaum koj tab tom nyeem zaj ntawd, mas koj yuav xav tias tsis yog, tsis yog, nkawd muaj tib tug yeeb ncuab. Yog koj nyob ua ke, koj tuaj yeem ntaus yeej cov Fis Lis Tias tau. Tab sis nws tsis yog li ntawd, Das Vis thiab Xas Ws nkawd rov sib ua yeeb ncuab thiab Tswv Ntuj lub hom phiaj tseem tsis tau tshwm sim.

Yuav ntsia pom meej tseeb nyob hauv phau ntawv Xam Phaj, thiab yog qhov npaj txhij tseg nyob hauv zaj no. Tswv Ntuj xav coj nws cov txiaj ntsim tuaj rau Mais Xes, kom Mais Xes coj mus qhia rau 70 tus txwj laus, kom lawv pab Mais Xes kav lawv lub teb chaws. Li ntawd lawv thiaj npaj 70 tus txwj laus li hais no. Lawv muaj npe nyob hauv cov neeg yuav tau txais txiaj ntsim thiab lub caij nyoog kuj los txog. Cov neeg li hais no kuj tau txais txiaj ntsim. Tab sis ob tug neeg tsis muaj npe, yog Es Des thiab Mis Des ntawd tsis tawm tuaj nrog lawv koom. Ces ib tsoom neeg xav tias yog nkawd hmoov tsis zoo. Tab sis qhov tiag nkawd kuj tau txais txiaj ntsim thiab. Lawv pib saib hmoov. Ces tam sim ntawd muaj ib tsab ntawv kom tuaj txog Yos Xuas thiab Mais Xes. Txhob maj, vim ob tus neeg no tsis tau tawm tuaj nyob hauv cov kab ke, ces nkawd tsis tsim nyog yuav saib hmoov. Koj puas paub tias peb tuaj ntawm no yog peb tuaj ua yam Tswv Ntuj xav kom peb ua. Peb muaj cai saib hmoov, tab sis nkawd tsis muaj cai. Li ntawd, Mais Xes yuav ua dab tsi txog zaj no ? Thawj lo lus nug, yog qhov tias ua cas lawv thiaj xav cheem nkawd. Vim li cas lawv thiaj tab meeg cheem ? Lawv tsis yog nyob ua ke hauv ib pab lod ? Lawv yog Tswv Ntuj cov neeg thiab Tswv Ntuj xav pub nws cov txiaj ntsim rau lawv. Tswv Ntuj xav kom lawv ua ib yam dab tsi loj. Qhov teeb meem tiag yog qhov tias koj qaug rau tus ntaiv, leej twg nce leej twg nqes, leej twg nkag mus thiab leej twg tawm. Kuv nyob ntawd, tab sis ob tus neeg no tsis tau nyob. Mais Xes teb lawv tias : “Puas yog koj khib kuv ?” Thov kom Tswv Ntuj cov neeg txhua tus tau tshaj lub Moo Zoo. Thov Tswv Ntuj pub Leej Ntuj Plig Ntshiab rau txhua leej txhua tus. Lawv xav ua kom sawv daws sib tawg, ces leej twg nkag mus thiab leej twg tawm, leej twg ua raws txoj cai thiab leej twg tsis ua. Mais Xes hais tias kuv tsis muaj caij nyoog rau tej zaj no, vim nov yog sawv daws kev nkim sij hawm. Yog Tswv Ntuj ua kom sawv daws txawj ua yaj saub, mas kuv yuav zoo siab heev. Kuv yuav tsis muaj kev xam khib.

Nyob hauv Ntawv Ntshiab, peb muaj zaj hais txog zaj no. Lub sij hawm ntawd, Zam hais rau Yes Xus tias : “Huab Tais, peb pom ib tug neeg tuav txog koj lub npe los ntiab dab. Peb xav cheem nws, vim nws tsis nrog peb.” Yes Xus teb tias : “Nej txhob cheem nws ! Tsis muaj leej twg ua hwj huam tau nyob hauv kuv lub npe thiab xyav txog kuv lub npe. Vim tias tus twg tsis tiv kuv, mas nws nrog kuv.” Zam yog tus sawv cov Thwj Tim chaw hais lo lus ntawd, ces Zam yog lawv ib pab. Lawv yog cov nyob ze Yes Xus dua lwm tus, ces lawv muaj cai dua. Lawv yog 12 tug Thwj Tim, lawv nyob saum tus ntsuj plig theem kawg. Tab sis muaj ib co uas lawv tsis yog nrog Yes Xus, lawv tsis nyob ze Yes Xus. Lawv tab tom tuav txog Yes Xus lub npe los ntiab dab. Cheem lawv kom txhob ua, vim lawv tsis tau ua raws txoj cai.

Kuv xav tias zaj no nws yog tshwm sim rau txheej thaud hauv phau ntawv Xam Phaj. Kuv xav tias nws yog tshwm sim nyob hauv Yes Xus thiab nws cov Thwj Tim. Tab sis ua Tswv Ntuj tsaug uas nws tsis tau tshwm sim rau lub ntuj kuv nyob. Saib mas ! Kuv ua Txiv Plig los tau 38 xyoo, kuv ua Tswv Qhia los tau 9 xyoos. Kuv nyiam cov neeg nyob hauv lub Koom Txoos. Kuv nrog lawv nyob los yuav luag tag kuv sim neej. Kuv nyiam lawv thiab nyiam cov hauj lwm. Txhua yam no yog los ntawm cov teeb meem sib khib thiab ntxub ntxaug. Peb tig rov mus saib txog Es Das thiab Mis Das, nws yog hais txog kev sib xam khib. Kuv nyob hauv cov neeg muaj npe, kuv muaj kev sib koom tes, thiab ob tug txiv neej no tsis tawm nyob hauv kev koom tes kiag. Tab sis nkawd kuj tau txais tib yam paj tshab li kuv txais, nws tsis yog lawm, kuv tsis txaus siab rau qhov ntawd. Kuv tau pom tej yam zoo li no kheev kheev tshwm sim nyob hauv ntau xyoo dhau los, lub caij kuv nyob hauv lub Koom Txoos. Muaj qee tus neeg tawm tej lub tswv yim tshiab tshiab, nws kuj raug xyav moo thiab raug rhuav tshem los yog raug hloov mus hloov los. Kuv ua hauj lwm los tau 35 xyoos lawm, vim li cas lawv thiaj tau txais tej yam zoo zoo. Xas Ws tua neeg txog txhiab leej, tab sis Das Vis tua neeg txog vam leej. Kuv tau pom tej yam li ntawd nyob hauv tsev teev Ntuj. Thaum muaj tej tus Txiv Plig hluas hluas tuaj, nws txawj nthuav ntawv Moo Zoo, mas sawv daws nyiam nws. Tej tus neeg hais tias : tus Txiv Plig ntawd nthuav ntawv Moo Zoo tau zoo kawg. Ces cov Txiv Plig qub yuav tsis txaus siab rau tej lo lus ntawd, thiab lawv yuav xav tias ua cas tus Txiv Plig tshiab ntawd lawv yuav qhuas nws ua luaj. Yog kuv tsis txaus siab yam ntawd, mas lwm zaus kuv yuav tav nws kev. Txoj kev xav li ntawd puas muaj txiaj ntsim qab hau rau leeg twg, tsuas muaj rau Xas Tas xwb. Mais Xes tau hais tias : “Kuv tsis quav ntsej rau tej ntawd, kuv xav kom txhua tus puav leej yog yaj saub.” Yes Xus, cov neeg ntawd tab tom tuav txog koj lub npe los ntiab dab. Nej txhob cheem lawv, cia lawv ua. Yog lawv tsis tau tiv peb, mas lawv nrog peb.