Hnub chiv tim 8 lub 9 hli ntuj 2024
Mas Kos. 7:31-37
Lub lis piam 23nd
Lub Caij Nyob Nruab Xyoo
“Nws ua tau ib puas tsav yam zoo: nws ua kom cov lag ntseg hnov lus, thiab ua kom cov nplaig txhav hais lus tau.”
Kwv tij hmoob sawv daws, hauv Mas Kos Ntawv Moo Zoo hnub no peb hnov tias Huab Tais Yes Xus kho ib tug neeg lag ntseg thiab nplaig txhav. Huab Tais Yes Xus muab nws ntiv tes ntxig rau tus lag ntseg ob lub qhov ntsej, nws muab aub ncaug pleev tus neeg ntawd tus nplaig. Ces tus lag ntseg thiab nplaig txhav rov los hnov lus thiab hais lus meej tau.
Cov kwv tij, tej zaum ib txhia hais tias lawv khuv leej cov dig muag thiab cov tuag ceg tshaj dua cov lag ntseg thiab nplaig txhav. Kev dig muag thiab kev tuag ceg phem dua kev lag ntseg kev nplaig txhav. Vim lawv xav tias cov lag ntseg thiab nplaig txhav lawv pom kev thiab taug kev tau. Lawv pab lawv tus kheej tau. Luag thiaj li tsis pom lawv, tsis khuv leej lawv, tsis muab siab rau lawv, tsis saib xyuas lawv, tso lawv pov tseg. Tab sis, qhov tiag mas, vim luag xav li ntawd, cov lag ntseg thiav nplaig txhav tsis muaj leej twg saib xyuas lawv, luag tso lawv pov tseg, lawv nyob lawv ib leeg xwb, tsis muaj leej twg nrog lawv sib tham vim tias lawv hais tsis tau lus, yuav tsum sau ntawv rau lawv nyeem lawv thiaj paub lawv thiaj nkag siab. Li ntawd, luag thiaj kaw lub siab tsis txais lawv, tsis muaj leej twg qhib lub siab tos txais lawv. Lawv mloog tsis tau xov tooj cua, lawv saib TV tab tsis hnov tsis tau lus, lawv lub neej dhuav kawg li.
Li ntawd, thaum tus lag ntseg thiab nplaig txhav pom Yes Xus, nws zoo siab, vim tias hnub no nws tau ntsib txoj kev cawm lawm. Yes Xus hais rau nws tias “Es fas tas” “Koj qhib los” ces nws thiaj li rov qab hnov lus thiab hais lus meej. Huab Tais Yes Xus qhib nws qhov ncauj thiab qhov ntsej, Huab Tais Yes Xus qhib sawv daws lub siab kom paub tias hnub no Tswv Ntuj ua hwj huam yees txwv pab tus lag ntseg no kom muaj txoj sia tshiab lawm.
Qhov uas Huab Tais Yes Xus ua hnub no yog lub cim hais tias Tswv Ntuj Leej Pleev los tus Mes Xias nyob nruab nrab peb lawm. Zoo xws li tus Yaj Saub His Xais hais tias “Nej txhob ntshai, Nej tus Tswv Ntuj nyob ntawm no. Cov dig muag ob lub qhov muag rov rua hlo, cov pob ntseg lag yuav qhib plho. Tus nplaig txhav qa tej suab zoo siab.”
Kwv tij zoo nyiam sawv daws, muab piv rau peb mas, tej zaus peb kuj yog zoo li tus neeg lag ntseg thiab nplaig txhav thiab. Txawm tias peb ob lub qhov ntsej tseem hnov lus tau, peb lub qhov ncauj tseem hais lus tau, tsis kav tej zaus peb yog neeg lag ntseg thiab nplaig txhav ntawm sab ntsuj plig. Peb lub pob ntseg hnov tsis tau lus luag tej xav kom peb pab, xav kom peb muab siab rau. Peb lub pob ntseg lag ntseg hnov tsis tau lus peb niam peb txiv, peb cov kwv tij neeg tsa los peb cov me tub me nyuam hais lus, los xav kom peb pab, muab siab rau lawv, hlub lawv. Peb lub qhov ncaug nplaig txhav hais tsis tau lus zoo rau lwm tus, peb nplaig txhav hais tsis tau lo lus teev Ntuj, thov Ntuj, ua Tswv Ntuj tsaug. Vim li ntawd mas, peb yuav tsum ua xws li tus lag ntseg hauv Ntawv Moo Zoo hnub no ua, yog tias muaj cuav kav thov Huab Tais Yes Xus qho peb kom “qhib” lub pob ntseg, qhib lub qhov ncaug, qhib lub siab rau Tswv Ntuj thiab luag tej. Thov kom Tswv Ntuj Lo Lus hnub no pab peb kom qhib lub tswv yim qhib lub siab mloog Ntuj Lus mog!
