Cov sawv cev ntawm 8 txoj kev ntseeg tuaj sib sau sab laj txog kev ntseeg zaum tim 16, nyob hauv lub Cheeb Koom Txoos Saigon nyob Nyab Laj teb.
Lub rooj sab laj yog npaj nyob hauv lub tsev qhia kev ntseeg hauv lub Cheeb Koom Txoos Saigon. Hauv lub ntsiab lus “Kev ntseeg xyaw AI”, uas muaj cov thawj coj kev ntseeg, cov kws txuj thiab cov tub kawm tuaj koom nrog thiab. Tswv Qhia Nguyen Nang nyob Hom Cis Mees uas nws yog tus thawj coj cov Tswv Qhia Kav Tos Liv nyob Nyab Laj teb, tuaj koom nrog Tswv Qhia Chau Ngoc Tri, uas yog tus thawj tswj sab kev muaj vaj huam sib luag thiab kev sib tham ntawm cov kev teev hawm. Cov tuaj koom yog cov sawv cev ntawm Phus Thas, Cao Dai, Islam, Hoa Hao Phus Thas, Bahai, Minh Ly Dao, Minh Su Dao thiab Khoov Fum Txws. Hauv kev qhib lub rooj sab laj, mas Tswv Qhia Nguyen Nang tau hais txog qhov tseem ceeb hauv kev txuag neeg lub meej mom nyob hauv kev txhim kho Technology mus sai heev.
Nws hais tias : “Lo lus nug tsis yog tias peb puas tsim nyog siv AI los tsis siv ? Tab sis yog qhov txhua tus neeg yuav siv AI hauv kev hwm neeg lub meej mom, txuag kev ncaj ncees thiab txhawb nqa kev sib koom siab.”
Kev sab laj zaum no tseem yog kev nco txog tus kws txawj ntse Le Quy Don uas nws yog neeg Nyab Laj lub hnub yug txwm 300 xyoo. Txwv 100 xyoo ntawm Cao Dai, thiab txwm 60 xyoo ntawm Nostra Aetate, uas yog Vas Tis Kas Ob cov lus tshaj tawm hais txog kev sib raug zoo hauv txhua txoj kev ntseeg. Tus piav tau soj ntsum txog AI lub zog hauv kev ntseeg, kev kawm ua ke thiab kev pauv ntxeev fab ntsuj plig. Kev thov Ntuj pub kev thaj yeeb ua ke, yog qhov tseem ceeb hauv lub rooj sab laj. Muaj cov sawv cev tau sib koom thov Ntuj rau lub ntiaj teb uas tsis muaj kev phem thiab kev sib tawg. Hauv cov lus xaus lub rooj sab laj, Tswv Qhia Chau Ngoc Tri thov kom cov neeg ntseeg txhawb nqa kev ua kwv ua tij thiab sib koom tes tsim cov zej zog kom nyob nyab xeeb. Cov hauj lwm no xaus rau kev hais Leej Ntshiab Fas Ntshis Kus zaj teev Ntuj ua ke, kom tau zeem tseeb txog kev muab siab rau hauv kev nkag siab thiab kev sib tham ntawm cov kev teev hawm.
