Hnub chiv tim 27 lub 10 hli ntuj 2024
Mas Kos. 10:46-52
Lub lis piam 30
Lub Caij Nyob Nruab Xyoo
“Koj mus mog! Koj lub siab ntseeg cawm koj lawm.”
Nyob zoo…
Kwv tij zoo nyiam sawv daws, Mas Kos Ntawv Moo Zoo hnub no mas piav txog Huab Tais Yes Xus kho ib tug neeg dig muag nyob Yes Lis Kos kom pom kev. Tus dig muag no hu ua Npas Tis Mes. Muaj 4 ntu loj nyob hauv Mas Kos Phau Ntawv, nqe 1 yog Huab Tais Yes Xus ua hauj lwm tshaj Ntuj Lus nyob Kas Lis Lais teb, nqe 2 yog hais txog Yes Xus txoj kev mus sab nraud Kas Lis Lais, nqe 3 yog Yes Xus ua hauj lwm tshaj Ntuj Lus nyob Yes Lus Xas Les, thiab nqe lus xaus 4 yog Yes Xus kev txom nyem thiab kev Sawv Rov Los.
Hauv txhua ntu no, ntau tus tawm tsam Huab Tais Yes Xus thiab tsis lees paub Yes Xus tias nws yog leej twg. Lawv tsis lees txais Yes Xus kuj vim tias lawv yog cov neeg dig muag ntawm sab ntsuj plig. Txawm tias lawv qhov muag tseem pom kev, tsis dig muag, tab sis, hauv lawv lub siab, lawv tsuj plig dig muag, tsis pom kev lawm, lawv tsis ntseeg txog Yes Xus, lawv txoj kev ntseeg dig muag lawm. Thaum Yes Xus kho Npas Tis Mes kom pom kev, Yes Xus thiab cov thwj tim lawv tab tom mus ua hauj lwm tshaj Ntuj Lus pem Yes Lus Xa Les. Peb paub lawm tias Yes Lus Xas Les yog qhov chaws los sis lub hauv paus ntawm lub hwj chim thiab txoj cai hauv cov Yus Das thiab yog qhov chaw ntawm kev tsis ntseeg thiab kev dig muag ntawm sab ntsuj, kev ua phem thiab kev tuag tib si nyob ntawd. Huab Tais Yes Xus tab tom mus qhov ntawd kom sawv daws pom kev. Nws yuav raug txim, raug kev txom nyem. Nws txog kev tuag yuav zoo xws li kev tsaus ntuj, kev dig muag ntawm nws cov thwj tim. Tab sis mas, nws txoj kev sawv rov los yuav ua kom sawv daws pom kev. Nws kev sawv rov los yuav kho peb kev dig muag kom pom kev zoo li nws kho Npas Tis Mes kom pom kev. Npas Tis Mes kev dig muag ploj mus kuj vim tias nws ntseeg tiag tiag tias Huab Tais Yes Xus yuav kho tau nws. “Das Vis Leej Tub, thov koj khuv leej kuv.” “Kuv tus Xib Hwb, kuv thov kom kuv qhov muag rov pom kev!” Ces Huab Tais Yes Xus teb rau nws tias: Kuj mus mog, Koj lub siab ntseeg cawm loj lawm.”
Kwv tij zoo nyiam sawv daws, Tswv Ntuj Lo Lus hnub no caw peb kom saib ntawm Npas Tis Mes tus piv txwv. Npas Tis Mes yog ib tug neeg thov khawv. Nws yog neeg pluag, nws txom nyem kawg. Nws muaj lub neej nyuaj. Nws tau ua qhov nws tau ua txhua hnub. Nws ua lub neej zoo li qub. Nws zaum ntawm ntug kev, ua lub neej thov khawv. Tsis muaj dab tsi txawv ntawm hnub no rau Npas Tis Mes. Kuv ntseeg tias yog thaum Huab Tais Yes Xus tshwm sim, peb kuj mus txog pe blub neej li qub: mus ua hauj lwm, mus kawm ntawv, mus ua liaj ua teb, mus nplai mov, cog pob kws, saib xyuas me tub me nyuam, npaj zaub npaj mov, tu vaj tu tsev. Peb tab tom ua pe blub neej li qub. Ces, Huab Tais Yes Xus tshwm sim. Nws tshwm sim hauv cov lus qhuab qhia los lus ntuas lus nthuav Ntawv Moo Zoo, hauv zaj nkauj, hauv kev xav, hauv kev sib tham, los sis hauv ib yam dab tsi uas peb nyeem. Huab Tais Yes Xus ua kom peb nco tau nws thiab mloog Nws lub suab, Huab Tais Yes Xus nkag mus rau hauv peb lub neej thiab hloov peb lub siab, hloov peb lub tswv yim, hloov peb lub neej. Qhov no yog qhov tshwm sim rau Npas Tis Mes hauv Ntawv Moo Zoo hnub no.
Li ntawd, kwv tij sawv daws, thov kom peb qhib lub siab lees txais Huab Tais Yes Xus xws li Npas Tis Mes ua, lees txais nws thiab qhib siab ntseeg txog Nws. Tswv Ntuj nrog nraim peb txhua txhia hnub.
