ZAJ NYEEM HNUB TIM 20 LUB 12 HLIS: HNUB RAU LUB LIS PIAM 3 CAIJ TOS HUAB TAIS
COV LUS NYOB PHAU NTAWV HIS XAIS (HX 7: 10-14)
LUB MOO ZOO RAWS LI LUS KAS (LK 1: 26-38)
Kwv tij Hmoob sawv daws, xyoo 1010 cov His Xas Lais xaiv Das Vis ua lawv tus vaj. Das Vis tuag tas mas nws tus tub Xas Los Moos hloov los ua vaj kav His Xas Lais teb mus txog xyoo 931 Xas Los Moos mam tuag. Thaum ntawd, His Xas Lais teb faib ua 2 lub teb chaws yam li His Xas Lais qaum teb thiab Yus Das teb. His Xas Lais qaum teb muaj lub tsheej Xas Mas Lias, hos Yus Das teb muaj lub tsheej Yes Lus Xas Les.
Xyoo 736 tus vaj Xis Lias thiab tus vaj His Xas Lais qaum teb koom siab tuaj vij Yus Das teb, ces tus vaj Yus Das hu ua As Kas tsis zoo siab, nws xa neeg mus thov tus vaj As Xis Lias tuaj pab, ces cov As Xis Lias thiaj ntaus lub tsheej Das Mas thiab Xas Mas Lias tawg ua rau cov His Xas Lais nyob qaum teb raug txim nyob As Xis Lias. Tom qab ntawd, cov As Xis Lias ho tig los txeeb Yus Das teb thiab, ces xyoo 700 cov His Xas Lais nyob Yus Das teb thiaj raug them se rau tus vaj As Xis Lias.
Cov lus peb hnov nyob hauv hnub no, mas yog Huab Tais Tswv Ntuj tshoj tus Yaj Saub His Xais kom mus ntuas tus vaj As Kas kom txhob npau taws rau qhov tus vaj His Xas Lais qaum teb tuav tes nrog tus vaj Xis Lias tuaj vij Yus Das teb. Huab Tais Tswv Ntuj cog lus tias cov His Xas Lais qaum teb yuav ua dab tsi tsis tau rau cov Yus Das, tab sis tus vaj As Kas tsis mloog, nws tseem thov cov As Xis Lias tuaj pab ntaus cov His Xas Lais qaum teb thiab, mas Huab Tais Tswv Ntuj thiaj kom His Xais tuaj hais cov lus peb hnov hnub no rau tus vaj As kas “Das Vis tsev neeg, nej mloog mas. Nej ua kom tej tib neeg sab tas nrho, los tsis txaus nej siab, nej tseem yuav ua kom Tswv Ntuj sab thiab. Vim li ntawd, Huab Tais Tswv Ntuj yuav pub ib lub cim rau nej. Nej ntsia saib, tus poj niam hluas xeeb tub lawm, nws yuav yug ib tug tub. Nws yuav tis npe rau tus tub hu ua ‘Es Mas Nus Es’.
Kwv ti, lub cim Huab Tais Tswv Ntuj pub rau cov vaj Yus Das pom yog ‘Es mas Nus Es’, Tswv Ntuj nrog nej nyob.
Thaum tus Tshiab tuaj cuag Mab Liab nyob Nas Xas Les, tus Tshiab rov qhia lub cim no ib zaug ntxiv rau Mab Liab. Tus Tshiab hais tias “Koj nyob kaj lug, Mab Liab tus tau txiaj ntsim puv siab. Huab Tais Tswv Ntuj nrog koj nyob.”
Cov lus no qhia tias lub caij Huab Tais Tswv Ntuj cov lus cog nrog cov Yus Das tuaj txog lawm tiag. Txij no mus yog lawv muaj Huab Tais Tswv Ntuj nrog nraim lawv mas lawv yuav nyob kaj lug mus li.
Kwv tij, yog peb muaj Huab Tais Tswv Ntuj nrog nraim peb mas peb kuj yuav nyob kaj lug thiab.
Tus Tshiab hais tias “Mab Liab, koj tsis txhob ntshai vim Tswv Ntuj saib koj ntxim Tswv Ntuj siab.” Lo lus no kuj zoo li tus Tshiab hais rau peb ntag, nws hais tias “Yog koj ua xis Tswv Ntuj siab, mas Huab Tais Tswv Ntuj yuav nrog nraim koj, ces koj tsis txhob ntshai txog dab tsi li, koj tsuas muaj kev kaj siab lug xwb.”
Mab Liab hnov tus Tshiab hais tias nws yuav muaj me nyuam mas Mab Liab xav tsis tas, Mab Liab hais tias “Koj hais tias kuv yuav xeeb tub, mas yuav muaj li ntawd tau li cas vim tias ib txwm los kuv twb tsis tau nrog ib tug txiv neej twg ua niam txiv li?” Ces tus Tshiab thiaj mam qhia Mab Liab tias nws xeeb tub tau zoo li cas.
Kwv tij, ntau zaus nyob hauv peb lub neej mas muaj tej yam txawv txawv tshwm tuaj raug peb mas peb kuj yuav xav tsis tas xws li Mab Liab thiab. Peb yuav thov Ntuj pab qhia peb saib yog vim dab tsi, ces Huab Tais Tswv Ntuj yuav ua ib yam tuaj kom peb paub. Tab sis thaum peb paub lawm, peb puas yuav yeem ua xws li Mab Liab, nws hais tias “Kuv yog Huab Tais tus ntxhais txib. Kuv xav kom muaj raws li koj hais.”
Raws li xav mas yog tej yam tshwm tuaj raug peb ntawd yog tej yam zoo pab peb ua neej mas ntshai peb yuav hais xws li Mab Liab, tab sis yog yam tuaj raug peb ntawd yuav ua rau peb muaj kev txom nyem los hnyav siab, mas xyov peb puas yuav hais xws li Mab Liab.
Txawm zoo thiab phem, tsuav yog tuaj ntawm Tswv Ntuj tuaj, mas xav kom peb ua xws li Mab Liab tus piv txwv no. Peb yuav tsis ntaus siab me ces muab kev ntshai los saib loj dua lub txiaj ntsim Huab Tais Tswv Ntuj yuav pub rau peb tom qab peb txais cov xwm tuaj raug peb ntawd.
Nyob hauv lub caij Tos Huab Tais no, muaj qee zaus peb poob hauv txoj kev sim siab ua rau peb lub neej raug kev txom nyem, raug kev ceeb laj; mas peb yuav ua siab kaj thiab thov lub zog pab ntawm Huab Tais Tswv Ntuj, peb yuav tso siab thiab nyob ruaj hauv Huab Tais Tswv Ntuj. Peb yuav nco tias peb muaj Huab Tais Tswv Ntuj nrog peb nyob, mas peb thiaj yuav yeej txoj kev sim siab tuaj raug peb, ces peb thiaj txais tau Huab Tais Yes Xus tuaj nyob ruaj hauv peb. Nyob zoo sawv daws.
