Yes xus yuav hla Leej Ntuj Nplig tuaj
Kwv tij Hmoob sawv daws ! Zaj ntawv Moo Zoo hnub no yog los ntawm cov lus qhuab qhia sib ncaim thawj zaug, hauv 3 zaug uas Yes Xus hais nyob hauv pluas mov kawg. Cov Thwj Tim nkag siab lawm tias ; Yes Xus tab tom yuav ncaim lawv mus. Lawv ntxhov siab thiab ua xyem xyav tias ; lawv puas tseem yuav sib koom tau ua ib tug nyob hauv Yes Xus thiab nyiam Yes Xus tau li cas, yog tias Yes Xus ncaim mus lawm.
Yes Xus cog lus tias yuav tsis tso lawv nyob twm zeej yam tsis muaj kev txuag pov hwm los yog tus coj kev. Yes Xus hais tias : “Kuv yuav thov Leej Txiv, ces nws yuav xa dua ib leej Nplij neeg tuaj nrog nej nyob mus li.” Nov yog lo lus cog ntawm qhov Leej Ntsuj Plig muab rau Yes Xus, thiab yuav los nyob saum cov Thwj Tim.
Yes Xus ua kom meej tseeb tias ; Leej Ntuj Plig raug tos txais nyob hauv tus nrog Yes Xus sib haum xeeb, haum nrog nws lub hom phiaj, haum nrog cov hauj lwm kev nyiam kev hlub ntawm nws. Vim lub ntiaj teb tsis tuaj yeem txais Yes Xus tau.
Lub ntiaj teb no yog lub ntiaj teb uas Leej Ntuj Plig tsis yog muaj rau cov neeg txawv kev ntseeg, cov neeg nyob deb, cov uas tsis yog cov Thwj Tim cov neeg, cov uas teev lwm txoj kev ntseeg lod ? Lo lus tias ‘lub ntiaj teb’ Yes Xus tsis yog hais txog ib tsoom neeg, tab sis yog hais txog ib feem hauv neeg lub siab, hauv txhua tus neeg uas nyob hauv qhov tsaus ntuj, muaj txhaum, sib ntxub thiab kev tuag npog, qaug quav thiab muaj kev plees kev yi nyob hauv. Nyob ntawd lub ntiaj teb tshwm sim nrog lub tswv yim uas tiv Yes Xus lub tswv yim. Paj Lug thiaj qhia cov Kos Lis Nthos uas neeg lub tswv yim coj kev tias : “Ntawm peb, mas lub tswv yim uas peb txais, tsis yog ntiaj teb lub tswv yim. Peb txais Leej Ntuj Plig tuaj ntawm Tswv Ntuj tuaj, kom peb paub cov txiaj ntsim uas Tswv Ntuj pub rau peb.”
Leej Ntuj Plig muaj ob lub npe, Yes Xus hu ua Leej Nplij Neeg thiab Leej Ntuj Plig ntawm qhov tseeb. Nov yog ob txoj hauj lwm uas Yes Xus ua nyob hauv cov neeg ntseeg. Leej Nplij Neeg tsis yog lo lus txhais nyob hauv xeem lus Hes Laas tias : ‘parakletos’. Leej Nplij Neeg yog lo lus hauv kev tseev tsim thiab qhia txog tus raug hu los nyob ntawm ib sab. Txheej thaud tsis muaj cov Koom Haum kws lij choj, cov neeg raug plaub ntug nyias yuav tsum daws nyias teeb meem. Nyias yuav nrhiav pov thawj tuaj kom tau zeem tseeb txog nyias txoj kev dawb huv. Qee zaus tab txawm tsis txhaum, tsis kav kuj tsis tuaj yeem soj ntsuam kev dawb huv ntawm tus kheej tau, los tab yog muaj txhaum tiag kuj tseem tau txais kev zam txhaum. Hais txog cov neeg zoo li no tseem muaj kev cia siab kawg. Qhov ntawd yog hauv lub rooj txiav txim ntawd, muaj ib tug txiv neej raug sawv daws qhuas tias nws ncaj ncees. Thiab tus neeg tsis muaj chaw tib no, tsis hais ib lo lus dab tsi sawv nyob ntawm nws ib sab. Kev ua li no yog zoo li thim kev kom plaub ntug, tsis muaj leej twg muaj cuab kav thov kom rau txim ntxiv mus. Tus neeg raug txuag pov hwm no hu ua ‘parakletos’. Ntawd yog tus raug hu kom los nyob ntawm tus poob hauv kev txom nyem ib sab.
Li ntawd, lub ntsiab lus ntawm thawj lub npe no thiaj yog hais txog tus txuag pov hwm, tus pab thiab tus tiv thaiv. Yes Xus cog lus tias nws yuav pub ib leej Nplij neeg rau nws cov Thwj Tim, vim lawv muaj ib tug pab lawm. Tus ntawd yog Yes Xus Pleev raws li Zam hais nyob hauv nws thawj tsab ntawv tias :
“Kuv cov me nyuad, kuv sau tej yam ntawd tuaj rau nej, kom nej tsis txhob ua txhaum. Txawm tias yog ib tug tau ua txhaum lawm, los peb muaj ib tug cev lus rau peb nyob ze Leej Txiv. Tus ntawd yog Yes Xus Pleev, tus siab ncaj.”
Yes Xus yog tus pab cev lus rau Leej Txiv, tsis yog vim Yes Xus pab peb dim ntawm nws kev npau taws hauv peb cov txhaum. Leej Txiv sawv nraim ntawm peb ib sab xws li Yes Xus. Vim Yes Xus txuag peb ntawm cov hiam peb thiab peb cov yeeb ncuab. Yog kev txhaum. Yeeb ncuab yog kev txhaum thiab Yes Xus paub tias yuav tiv nws li cas, yuav ua cas nws thiaj tsis muaj zog. Tus cawm seej tim ob tsis yog muaj los sawv cev tus ua ntej, tab sis yog kom tau ua cov hauj lwm tshiab. Qhov tseeb tiag nws raug xa tuaj nrog Yes Xus ua ke, tus uas tuaj nyob nrog nws haiv neeg. Yes Xus tsis tau ncaim mus, nws tsuas yog hloov nws tus yam ntxwv xwb. Nws yog lub Cim ntawm tus sawv rov los. Nov yog qhov tshiab uas Yes Xus nrog nws cov Thwj Tim nyob. Nws muaj tseeb tiag ntau dua yav tag los. Tab txawm hauv qhov ntsia tsis pom Yes Xus, tsis kav Yes Xus kuj nyob tas qhov txhia chaw. Leej Ntuj Plig yog tus cawm seej, vim Leej Ntuj Plig tuaj pab cov Thwj Tim tiv nrog lub ntiaj teb. Qhov ntawd yog tiv nrog lub hwj chim phem.
Zam qhia nws cov neeg ntseeg txog qhov tseeb no, kom thaum lawv ntsib kev txom nyem lawv tsis txhob qaug zog, txhob tag kev cia siab los yog txhob txias siab. Cov Thwj Tim ntseeg txog Leej Ntuj Plig kev pab, lawv tsis ntshai thiab tsis qaug zog. Tab txawm lawv tseem muaj qhov yuam kev hauv fab ntsuj plig, hauv kev qaug zog thiab zwm rau fab kev phem ntawm lawv. Tsis kav lawv ntseeg txog tus cawm seej lub zog thiab cia siab tias lawv yuav tsis swb. Lub npe tim ob uas qhia txog ib yam hauj lwm ntawm tus cawm seej, yog Leej Ntuj Plig ntawm qhov tseeb.
Yes Xus cov hauj lwm hauv kev ua tub txib tseeb tiag ntawd, nws muaj ntau txoj kev.
Yog pib ntawm qhov yooj yooj yim ua ntej. Peb txhua tus paub tias muaj dab tsi tshwm sim thaum ib tug hais dhau ib tug. Nws muaj qhov yuam kev, pauv ntxeev mus txog qhov nco tsis tau. Yes Xus lub Moo Zoo yog muaj tseg rau txhua tus, thiab sawv daws yuav tshaj mus txog hnub ntiaj teb kawg. Leej twg yuav zeem tseeb tias nws tsis muaj qhov yuam kev, tsis raug ntaus nqi tsis zoo ? Ntawm tib neeg, mas cov hauj lwm no saib zoo li tsis muaj kev cia siab, tab sis peb ntseeg tias txhua tus yuav tau txais lub Moo Zoo ntawm qhov chaw ntshiab, vim lub Koom Txoos yog qhov tshaj tawm lub Moo Zoo ntawd. Leej Ntuj Plig lub zog ntawm qhov tseeb uas Yes Xus cog lus tseg tab tom ua hauj lwm. Kev ua tub txib ntawm Yes Xus tsis yog hais txog qhov no xwb, uas peb hais tias yuam kev. Yes Xus tsis yog tiv thaiv kom txhob muaj qhov yuam kev hauv kev tshaj lub Moo Zoo xwb, nws tseem ua lwm yam hauj lwm zoo thiab. Qhov ntawd yog cov Thwj Tim tau mus txog qhov tseeb. Muaj qee yam uas Yes Xus tsis tau hais txog los yog piav kom ntxaws, vim cov Thwj Tim ris tsis taus. Yes Xus paub tias tas hauv ntau tiam neeg, teeb meem thiab tej lus nug tshiab yuav tshwm sim. Lo lus teb tseeb tiag uas haum rau Yes Xus txoj kev xav yuav nrhiav tau nyob qhov twg ?
Hais txog qhov no kuj ib yam, Yes Xus hais txog kev cuam tshuam ntawm Leej Ntuj Plig Ntshiab. Nws yog tus coj cov Thwj Tim mus txog txhua yam uas yog qhov tseeb. Nws tsis tau hais ib yam tshiab los yog tsis haum rau nws cov lus qhia. Nws yuav pab kom lawv nkag siab txog lub ntsiab tseem ceeb ntawm nws tiag, tab txawm yuav muaj dab tsi tshwm sim kuj xij.
Li ntawd, cov neeg ntseeg txoj hauj lwm yog qhib siab mloog qhov Leej Ntuj Plig Ntshiab qhia. Tus nthuav yam tshiab tshiab tas mus li. Hais raws qhov tseeb tias, Yes Xus yog tus ua kom npoo av rov tshiab tuaj.
Kev tiv yam tshiab tshiab, kev tsis lees txais cov hauj lwm txhawb nqa ib zeej tsoom neeg uas yuav coj neeg mus nyob ze Leej Pleev thiab nws cov kwv tij, mas tej lus thuam Leej Ntuj Plig ntawd Ntuj yuav tsis zam rau neeg. Cov uas tseem coj rawv txoj kev ntseeg qub, cov uas tsis muaj kev paub txog Tswv Ntuj lo lus, cov uas tsis lees txais kev txhim kho thaj txi Ntuj, tus txheej txheem thiab tus yam ntxwv hauv cov kab ke. Cov teb raws li qhov qub thiab cov teeb meem tshiab, cov tsis txais qhov zoo siab uas nrhiav pom nyob hauv Ntawv Ntshiab, cov neeg no yog cov tiv qhov tseeb ntawm Leej Ntuj Plig.
Hais txog Zam tus tshaj lub Moo Zoo, mas lo lus tias ‘qhov tseeb’, nws muaj lub ntsiab tob dua ntawd. Yog hais txog Tswv Ntuj kiag. Tus Tswv Ntuj uas ua tawm nyob hauv Yes Xus, nws yog qhov tseeb. Vim nyob hauv Tswv Ntuj, mas kev nthuav tawm tiav log tau tshwm sim lawm. Kev ntxias dag yog qhov tsis lees txais Tswv Ntuj. Kev xaiv ua lub neej tsis haum nrog Tswv Ntuj, yog Xas Tas tus uas yog yeeb ncuab hauv qhov tseeb. Yog kev dag leej txiv. Ua kom txhua tsav txhua yam uas peb ua nyob nrug deb Leej Pleev. Tab sis yam uas Leej Ntuj Plig Ntshiab ua nws txawv. Yog nws coj peb mus rau qhov tseeb. Nws ua nyob hauv txhua tus thiab ua kom lawv xaiv Leej Pleev ywj siab, kom lawv ruaj nreb hauv Yes Xus cov lus. Leej Ntuj Plig Ntshiab zoo li nthwv cua uas tshuab kom peb ya siab thiab coj peb mus txog kev cawm uas tsis muaj dab tsi tiv tau. Yog qhov nyuab uas yuav xav tias lub zog txhib ntawm Leej Ntuj Plig no, tsis tuaj yeem coj peb mus txog qhov tseeb tau. Vim li cas peb thiaj cia kev ua xyem xyav txog lub ntiaj teb ntawm peb txhua tus ntawd, nws ruaj khov dua lub zog txhib peb hauv kev ua lub neej ?
Kwv tij Hmoob sawv daws ! Hnub no peb tham txog Zam ntawv Moo Zoo zaj 14, qib 15 txog qib 21 los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug ! Lwm zaus peb mam sib ntsib dua, nej sawv daws nyob zoo !
