Xas Nis Aus Nkus yog tus tsim daim qauv duab Kev Tso Siab Tawm Rooj Fiv Ntuj Loj.

Kev Tso Siab Tawm Rooj Fiv Ntuj Loj (GPH) yog Rooj Tswv Qhia nyob As Xias (FABC) lub rooj sau siab loj thiab tseem ceeb nyob hauv xyoo no, lub rooj sau siab no muaj nyob hauv hnub tim 27-30 lub 11 hlis nyob Pis Naas, Mas Les Xias teb. Cov tuaj koom lub rooj sau siab no yog cov sawv cev ntawm cov Tswv Qhia, cov Leej Choj, cov Leej Qee, cov txwj laus Leej Nrog, cov tub ntxhais hluas, thiab nrog rau cov neeg As Xias ntau txhiab tus kis; lawv sawv daws tuaj sib sau ua hmoov txog lub siab ntseeg ua ke, rov xav txog sawv daws txoj kab xwm tshaj Ntuj Lus, thiab zes taws rau cov neeg ntseeg nyob cheeb tsam As Xias kev tso siab kom rov cig kub lug tuaj.

Tus duab hom thawj tseem ceeb hauv lub rooj sau siab no yog Kev Tso Siab Tawm Rooj Fiv Ntuj Loj lub Cim Thawj (GPH Logo), yog daim duab tsom txog lub Koom Txoos nyob As Xias xeev ntuj tus plig, txuj txoog, thiab txoj kab xwm. Tus neeg tsim lub cim thawj no yog tus kws tsim daim qauv duab haiv neeg Is Ntias hu ua Xas Nis Aus Nkus (Sanil Augustine). Lub cim thawj nws tsim tsom kom pom txog kev tso siab, kev koom siab, kev ua tim khawv txog lub Moo Zoo, thiab kev ua ib pab ib pawg. Tas cov hais los no puav leej yog Kev Tso Siab Tawm Rooj Fiv Ntuj lub plawv.

Daim duab hais txog Kev Tso Siab – Lub ntsiab thiab zeem muag hauv GPH lub cim thawj.

Lub 11 hlis no cov neeg tawm rooj fiv Ntuj ntau txhiab leej tuaj sib sau ua ke nyob Pis Naas kom tau koom rooj sau siab Kev Tso Siab Tawm Rooj Fiv Ntuj Loj, lawv sawv daws yuav muaj ib lub cim nyob nrog lawv mus qhov txhia chaw, tsis hais saum cov ntaub npe ntawv, cev ris tsho, lub yeem, thiab raws cov sam thiaj ntiv ntsis taw (digital platforms). GPH lub cim thawj no yog ib lub cim thawj deeg thiab phim lub zim txwv no, daim qauv no rais ua lub Koom Txoos nyob As Xias kev koom siab koom ntsws lub yeem lawm.

Raws li tau hais los tias tus tsim lub cim thawj no yog yawg Xas Nis Aus Nkus, tus tswj hauj lwm tsim txua hauv lub xeev Kes Nras Las, Is Ntias teb, nws ua hauj lwm fab kev tsim qauv duab, kev nrhiav kiab khw, thiab kev sib txuas lus los tau neeg nkaum tawm xyoo. Nws tseem yog tus txhim tsa thiab tswj lub tuam txhab Popkon Creative, thiab yog ib tug txwj laus Leej Nrog ua hauj lwm pab nws lub cheeb tsam Koom Txoos. Xas Nis muab nws lub laj lim, nws kev nyias ntsais rau fab txuj txoog, thiab nws kev mob siab rau lub siab ntseeg, los tawm tswv yim tsim GPH lub cim thawj no.

Lub zeem muag tus cag; yog kev yooj yim, tsim nyog nco qab txog, thiab As Xias.

Thaum cov neeg tsa lub rooj sau siab xaiv Xas Nis ua tus tsim lub cim thawj, lawv hais tias xav tau lub cim thawj tsim nyog nco qab txog, yooj yim, zoo nkauj ntxim ntsia, phim rau lub zim txwv no, muaj As Xias tus ntxhiab, tsom txog kev tso siab, thiab kev koom tes ua ib pab rhais ruam ntoj kev mus ua ke nyob hauv As Xias teb.

Cov lus no rais ua tus txha nqaj nqaum rau Xas Nis kev xav tswv yim. Teeb meem mas yog yuav ua li cas thiaj li yuav muab lub Koom Txoos nyob As Xias qhov sib txawv, tsis hais txuj txog, cov tsos, lub tswv yim tus plig, thiab kev nyiaj txeem, tas cov no los sib sau nyob ua ib ke tau kom haum lub ntuj tshiab no thiab ua lub cim sawv daws ntsia pom ces to taub.

Xas Nis muab tas tej li hais los no tso rau hauv lub cim thawj nws tsim tshwm tuaj, tsis hais tsom txog As Xias, phim lub zim txwv no, txhawb nqa sab ntsuj plig.

Cov tsos qhia txog As Xias.

Thawj lub niam tswv yim pom yooj yim hauv lub cim thawj mas yog cov tsos. Xas Nis tab meeg siv As Xias teb cov tsos raws li nws pom nyob hauv cov kev nquam paj nquam nruas, ntos ntaub, thiab tej chaw nuam yaj muaj sia zis. Cov tsos no coj kev sov siab, kev xyiv fab, thiab lub zog tuaj rau lub cim thawj, qhov no haum rau kev tso siab.

Cov tsos no tsis hais coj mus luam tso rau yam dab tsi los yeej haum rau tas, tsis hais luam rau sau tsho, kaus mom, cov yeem, cov hnab, los cov duab lo raws ntug kev, tej no puav leej tso lub cim thawj rau yam zoo nkauj ntxim qhov muag ntsia.

Plaub lub ntsiab ntos uab ib daim ntaub.

Qhov ci ntsa iab hauv lub cim thawj no yog cov yam ntxwv yooj yim tab sis muaj lub ntsiab tob. Xas Nis muab Kev Tso Siab Tawm Rooj Fiv Ntuj Loj plaub lub ntsiab los sib hiab sib ntos ua ke. Plaub lub ntsiab no yog li nram no:

- Kev luag ntxhi, yog lub ntsiab hais txog kev tso siab. Xas Nis muab tus yam ntxwv zooj thiab nkhaus kom pom txog lub ntsej muag xyiv fab luag ntxhi. Kev tso siab tsis yog yam ntsia tsis pom ntxiv, peb pom tau kev tso siab thiab peb sib faib kev tso siab tau.

 - Kev sib tuav, yog lub ntsiab hais txog kev koom tes. Xas Nis muab cov kab sab kos kom sib cuag ua ke kom pom tias yog ib tug cev tes mus tuav ib tug txhais tes. Qhov no tsom txog lub Koom Txoos nyob As Xias sib thooj siab koom ntsws ua ke.

- Cov kab ci, yog lub ntsiab hais txog lub Moo Zoo. Cov kab sab tawm hauv qhov nruab nrab tuaj ua rau ras txog lub hnub cov kab ci thiab pub qhov pom kev, yog lub Moo Zoo qhov pom kev tsom tuaj rau lub Koom Txoos nyob As Xias.

- Lub yeem kheej kheej, yog lub ntsiab hais txog kev ua ib pab ib pawg. Tas nrho cov keeb los yog niam tswv yim no los nyob ua ke ua lub yeem kheej kheej tsom kom pom tias lub Koom Txoos nyob As Xias yog pab pawg tawm rooj fiv Ntuj uas nyias tuaj nyias teb chaws tuaj, sawv daws tsis sib thooj tab sis sawv daws koom ua tib tug rhais ruam mus lawm tom ntej nyob hauv lub siab ntseeg.

Lub cim thawj txuas mus rau txoj sia.

Dhau ntawm qhov tob tob hauv kev ua lub cim lawm, kev tsim tawm tus qauv no tseem coj mus siv tau rau lub neej thiab. Cov tsos thiab tus qauv coj mus ntxiv rau tej toob xib kom zoo nkauj tuaj, yam li rau lub tsho thiab kaus mom, los yog cov ntaub npe ntawv ntiv ntsis taw, thiab cov twj tawm rooj fiv Ntuj. Lub cim thawj tus hom thawj los yeej rub kom loj me tau raws siab nyiam, thiab tseem deev tau neeg lub siab thiab.

Thaum ntau txhiab leej neeg mus mus los los nyob Pis Naas, lub cim thawj rais ua lus duab ntsia pom, ua daim tsom iav tsom txog lub siab ntseeg ntoj kev, kev koom siab, thiab kev tso siab lawv koom ua ke mus.

Xas Nis hais tias kev tsim txua coj mus nrhiav tau Tswv Ntuj.

Thaum lub tshaj xo Radio Veritas Asiab ntsig nug Xas Nis, mas nws hais tias “Thaum kuv hnov tias FABC fab kev tshaj lub Moo Zoo txaus siab rau kuv lub cim thawj, mas kuv zoo siab thiab ua tsaug ntau. Ntawm kuv, kev tsim txua qauv tsis yog hauj lwm, tab sis yog qhov chaw kuv tau ntsib Tswv Ntuj. Txhua tsos duab, txhua lub yeem, txhua lub tswv yim, mas kuv nrhiav saib puas pom Tswv Ntuj nyob hauv. Kuv taug txoj kev tsim txua no, muaj qab hau rau kuv vim tias nws rais ua ib txog kev rau kuv nthuav tawm txog kuv lub siab ntseeg thiab tsob hwb lub Koom Txoos raws li paj tshab Tswv Ntuj pub rau kuv.”

Xas Nis cov lus qhia kom pom tias nyob hauv nws cov hauj lwm muaj lub tswv yim tus plig nyob xyaw, yog txoj kev coj mus pom Tswv Ntuj nyob hauv kev xav duab thiab kev tsob hwb txoj kev sib tham sib txuas lus.

Lub cim hais txog lub Tuam Teb Tawm Rooj Fiv Ntuj.

Kev Tso Siab Tawm Rooj Fiv Ntuj tsis yog ib lub rooj sau siab xwb, tseem yog lub suab hu kom rov txhim kho lub siab ntseeg dua tshiab, rov nrhiav kev koom pab koom pawg dua, thiab coj lub Moo Zoo qhov pom kev mus vas tas As Xias teb thiab.

Vim Xas Nis Aus Nkus qhov hauj lwm tawm hauv nws lub laj lim tswv yim no, GPH lub cim thawj thiaj li txia los ua Kev Tso Siab Tawm Rooj Fiv Ntuj txoj kab xwm lub yeem tias yuav tsum muaj tsos muaj duab, muaj txuj txoog ua tus cag, phiam rau lub zim txwv, thiab muaj ntsiab muaj kuab. Lub cim thawj no ntuas txhua tus neeg tawm rooj fiv Ntuj kom ras tias peb taug kev mus ua ke vim peb yog tib lub Koom Txoos nyob As Xias, peb ris kev tso siab rau peb lub Tuam Teb.