Lub koob tsheej Hackathon nyob Singapore tau coj cov Kav Tos Liv 80 leej tuaj txhim kho kev daws teeb meem Digital hauv lub Koom Txoos.
Lub koob tsheej no yog lub Koom Haum Koom Txoos Digital (DCO) uas yog lub Cheeb Koom Txoos Singapore ua tus npaj. Tau sau tas 14 pab neeg tuaj sib koom ua hauj lawm ua ke hais txog teeb meem ntawm lub Cheeb Koom Txoos rau cov tsev kawm ntawv, cov Koom Haum Kav Tos Liv, cov Koom Haum qhia kev ntseeg thiab lub Koom Haum tshaj lub Moo Zoo tshiab. Hauv lub thaj txi Ntuj hnub tim 11 lub 10 hli, Txiv Plig Kesavan tus thawj tswj fab ntsuj plig ntawm lub Koom Haum Technology hauv lub Cheeb Koom Txoos tau thov kom cov tuaj koom siv nyias tej kev txawj ntse ntxiv mus, kom tau ua hauj lwm rau lub Koom Txoos yog dhau ntawm lub koob tsheej Hackathon lawm. Txiv Plig Kesavan hais txog cov teeb meem uas Vaj Qhia Zam 23 hu lub pwm tsav Vas Tis Kas Ob los sab laj hauv xyoo 1962, kom tau ua tej yam rau qhov lub Koom Txoos xav tau hauv kev muaj feem cuam nrog lub ntiaj teb uas pauv ntxeev mus. Thiab tau sib piv txog kev ua ntawm lub Koom Txoos hauv Technology uas tab tom tshwm sim tshiab. Nws hais tias : “Kev sib kis ntawm tus kab mob COVID-19 tau muab Technology los siv nrog rau thaj txi Ntuj thiab qhia kev ntseeg nyob Online, tab txawm yuav muaj kev tiv ua ntej no kuj xij.”
Nws hais txog Vaj Qhia Leo 14 tsab ntawv Magnifica Humanitas, uas yog AI lub tswv yim tsim tawm thiab teeb meem hauv kev ncaj ncees. Txiv Plig Kesavan tau thov kom cov neeg ntseeg Kav Tos Liv xyuam xim siv Technology los pab txuag lub meej mom hauv kev ua neeg. Nws hais tias : “Teeb meem tsis yog nyob ntawm kev tshaj tawm, tab sis yog nyob hauv cov ntsiab lus.”
Nws lees txais tias ntau tus Txiv Plig tej zaum yuav tsis swm nrog Technology uas tshwm sim tshiab. Nws thiaj thov kom cov neeg ntseeg faib lawv tej kev paub thiab koom tes nrog Txiv Plig hauv kev tshaj lub Moo Zoo ntawm lub Koom Txoos. “Nej yog lub Koom Txoos.” Nws hais rau cov tuaj sib koom tias : “Nej yog cov uas kuv cia siab tias ; yuav cov kev pauv ntxeev no.” Ib qhov ntawm kev txhim kho hauv kev sib tw Hackathon yog, ECHO uas yog qhov platform ua tawm los kom tau pab cov qhia kev ntseeg tshiab tshiab. George Lai ntawm lub tsev teev Ntuj Blessed Cacrament uas yog tub koom tes ntawm ECHO thiab ua tus xa lus nrog cov tub ntxhais hluas tej hauj lwm hauv tsev teev Ntuj hais tias : “Yam uas lawv ntsib zaum no pab kom nws nkag siab txog qhov xav tau hauv lub Koom Txoos kev tshaj lub Moo Zoo tob kawg.”
Nws hais tias : “Txhua yam hauj lwm phim yuav tshais ruam mus, tsis yog tias txuag cov hauj lwm uas twb muaj lawm mus txog kev tshaj lub Moo Zoo thiab nkag txog tib neeg ntau xwb. Yam uas raug lees tias yog qhov tseem ceeb hauv kev muab tej kev txawj ntse los txhawb nqa lub Koom Txoos. Nws yog qhov nco tias ; peb muaj yam Tswv Ntuj muab hauv kev siv Technology.” Lai hais ntxiv tias : “Cov Kav Tos Liv tuaj yeem muaj feem cuam nrog lub Koom Txoos tau los ntawm kev muaj peev xwm hauv txhua fab, uas yog dhau ntawm Technology lawm tsis hais yuav loj los me kuj xij.”
Joel Jonas Tan tus thawj tswj lub Koom Haum Digital Church hais tias :
“Cov hauj lwm Hackathon no, lub hom phiaj yog ua kom cov Kav Tos Liv muaj feem cuam daws teeb meem thiab tej kev txhawj xeeb hauv kev tshaj lub Moo Zoo, uas vam txog kev txawj ntse thiab kev paub ntawm cov neeg ntseeg.”
