Tswv Qhia Liab Tas Nkes hais tias lub Koom Txoos nyob As Xias xav tau tus neeg ua xws li cov kws hnub qub kom ntau thiab xav kom tus ua xws li Hes Los muaj tsawg

Nyob hauv lub rooj Kev Tso Siab Tawm Rooj Fiv Ntuj Loj nyob Pis Naas, Mas Les Xias teb, Tswv Qhia Liab Lus Is Tuam Tas Nkes sawv los txhib tsoom neeg ntseeg ntau pua txhiab uas yog cov sawv cev tuaj ntawm cov teb chaws nyob As Xias xeev ntuj kom lees txais cov kws hnub qub lub tswv yim ua tus neeg tawm rooj nrhiav, mloog, thiab ua neej nyob hauv kev tsis muab hlob, thiab kom sawv daws tsis txhob yuav Hes Los tus cwj pwm nyob nrog kev ntshai, khawm rawv lub hwj chim, thiab tuav rawv txoj kev txuag yus tus kheej.

Kev Tso Siab Tawm Rooj Fiv Ntuj Loj zaum no qhib rooj nyob hauv hnub tim 27 lub 11 hlis tas los, nyob hauv Pis Naas, Mas Les Xias teb. Nyob hauv 20 xyoo tas los no, lub Rooj Sau Siab no yog lub Koom Txoos nyob As Xias lub Rooj Sau Siab loj tshaj plaws. Tus txheej txheem hauv lub Rooj no, yog xub ua kab ke qhib, tom qab ntawd, Tswv Qhia Liab Fas Ntshis Kus Xes Npas Tis Nus tus Tswv Qhia nyob Pis Naas coj sawv daws ua lub Txoos Txi Ntuj.

Nyob hauv thawj hnub, Tswv Qhia Liab Tas Nkes tus Tuam Tswj fab kev tshaj lub Moo Zoo Thawj Lwm hauv lub Pwm Tsav tshaj Ntuj Lus ua tus tuaj tham cov lus pub rau sawv daws mloog. Cov zaj nws tham yog muaj lub hau lus tias ‘Taug Dua Lwm Txoj Kev, Cov Tso Siab Tawm Rooj Fiv Ntuj Rov Plhis Tshiab.’

1. Cov neeg ntseeg kev tso siab: Lub paj tshab ntxhua thiab hloov txoj sia.

Ua ntej yuav hais lus, Tswv Qhia Liab Tas Nkes hais lus kom sawv daws tuaj dab ros thiab sov siab, nws hais txog lus swm txheej nws tau ntsib thaum tuaj koom Rooj Sau Siab thawj lwm nyob Thaib teb hauv xyoo 2006. Nws hais tias cov Kav Tos Liv nyob As Xias yog cov neeg tsis nkees tham txog Huab Tais Yes Xus uas yog ib zag dab neeg hloov neeg txoj sia, tej txuj txoog, thiab cov pab pawg.

Muaj 3 qhov tseem ceeb Tswv Qhia Liab Tas Nkes tham txog. Qhov tim ib, mas yog lo lus hauv feem tim ob hauv nws zaj hau lus, yog lo lus tias ‘Cov Tso Siab Tawm Rooj Fiv Ntuj Rov Plhis Tshiab’. Lo lus no, Tswv Qhia Liab Tas Nkes tau muab los ua lub hauv paus nthuav txog cov neeg ntseeg kev tso siab. Nws hais tias ‘Kev Tso Siab’ tsis yog txoj kev cia siab rau qhov zoo, txoj kev xav txog qhov muaj kev cia siab los yog xav tau, los yog khiav tawm ntawm lub neej kev txom nyem. Cov neeg ntseeg kev tso siab yog Ntuj ib txoj kev tsim txiaj uas Tswv Ntuj pub rau tib neeg. Ntuj txoj kev tsim txiaj no muaj Tswv Ntuj ua lub hauv paus chiv thiab ua lub ntsis xaus.

Nyob hauv Koom Txoos cov lus qhia (CCC 1818) hais tias kev tso siab cog lub tswv yim xav tau kev zoo siab rau hauv neeg nruab siab, kev tso siab thiab neeg kom sawv taus thaum ntsib kev txom nyem, kev tso siab ntxhua neeg lub siab nyiam kom tshiab, kev tso siab coj neeg lub siab ntshaw rov mus cuag Tswv Ntuj lub Ceeb Tsheej. Tseem kev tso siab txhawb neeg kom ua siab ntev nyiaj, tseem kev tso siab ntxhua neeg lub siab cuaj khaum qia dub pov tseg, tseem kev tso siab txhim kho neeg lub siab hlub kom rov sawv ntseg.

Tswv Qhia Liab Tas Nkes caw cov sawv cev tsoom ntseeg sawv daws kom rov tig los xav tswv yim ntuas siab tias: Dab tsi ua rau kuv muaj kev zoo siab tiag? Dab tsi ua zog txhawb siab kom kuv ua tau siab ntev nyiaj mus ntxiv? Kuv lub siab hlub puas yog muaj rau Tswv Ntuj lub Ceeb Tsheej tiag, los yog kuv lub siab hlub tsuas muaj rau kuv xwb?

Cov neeg ntseeg kev tso siab ntxhua peb nruab siab kom huv tuaj, mas peb thiaj txawj nyiam tus nyob ze peb ib yam li Tswv Ntuj nyiam peb.

2. Taug Dua Lwm Txoj Kev: Cov Kws Hnub Qub thiab Kev Tso Siab Tawm Rooj Fiv Ntuj.

Tswv Qhia Liab Tas Nkes rov coj sawv daws los mloog txog thawj lo lus hauv lub hau lus, yog lo lus tias ‘Taug Dua Lwm Txoj Kev’, mas nws xav txog zaj hais txog cov Kws Hnub Qub, uas lawv tuaj hawm tus me nyuam Yes Xus tas, lawv taug dua lwm txoj kev rov mus tsev. Tswv Qhia Liab Tas Nkes hais tias cov Kws Hnub Qub ua tu qauv rau tsoom pej xeem nyob As Xias yoog raws, vim As Xias muaj qhov sib txawv ntau, sawv daws nrhiav, thiab muaj txoj kev ntshaw heev ntshiab ua qhov coj kev.

Nws muab cov Kws Hnub Qub los piv nrog Hes Los, kom pom tseeb txog 2 hom neeg tawm rooj fiv Ntuj.

- Tus tawm rooj fiv Ntuj ncaj hlo rau Huab Tais Yes Xus, mas nws muaj kev tsis muab hlob, kev qhib siab dav, thiab qhov pom kev ua twj coj kev.

- Tus tawm rooj fiv Ntuj tsis muaj Huab Tais Yes Xus, nws muaj kev ntshai, nws qeeb siab, thiab muaj kev kub ntxhov.

Puag thaum xub pib los, cov Kws Hnub Qub tau xaiv ‘lwm txoj kev’ taug lawm. Tab txawm lawv yog pej kum neeg, los lawv ntsia tawm mus deb dua ntawm lawv, lawv nyeem cov hnub qub, lawv muab siab rau yam Ntuj tsim teb raug, thiab lawv mloog cov Yaj Saub cov lus ceeb toom lub suab ntxhe txog lawv pob ntseg. Lawv qhib siab dav fo zoo li ntawd, mas lawv thiaj nyob hauv txoj kev saib pom ntsia paub.

Ntawm Hes Los, nws tsis txav chaw. Hes Los qaug qav rau lub hwj chim ua vaj tswj tsoom pej xeem, mas nws thiaj li ntsia tsis pom yam Ntuj tsim teb raug, saib tsis taus Ntawv Ntshiab, thiab thuam luag tej kev xyiv fab. Tswv Qhia Liab Tas Nkes hais tias “Yog koj muaj hwj chim, mas lub hwj chim tsuam koj, ces koj yuav hnyav. Thaum koj hnyav, mas koj yuav ceeb laj tig taus cev, txav taus chaw.” Hes Los ua tus neeg nkees tig cev li no, nws kuj ua rau cov nyob ncig nws kis nws tus cwj pwm no thiab; lawv nyob hauv txoj kev ntshai thiab tsis xav ua dab tsi.

3. Kev Ua Neeg Me, Kev Ua Leej Choj, thiab Kev Ua Siab Tawv Kawm

Tswv Qhia Liab Tas Nkes hais txog qhov tseem ceeb tim ob; yog qhov tias cov Kws Hnub Qub lawv lees tias lawv paub tsis tas, ces lawv thov lwm tus pab qhia. Lawv tawm rooj zaum no, lawv tsum ua tus neeg me, zoo siab kawm cov lus hauv Ntawv Ntshiab thiab kawm ntawm cov txwj laus coj kev teev hawm nyob Yes Lus Xas Les. Kev ua neeg me tsis muab hlob li no, tsom kom pom txog kev ua Leej Choj tus plig.

Txawm li cas los xij, Hes Los thiab nws cov neeg, lawv muaj kev paub tab sis lawv tsis ua dab tsi rau lawv txoj kev paub. Lawv khaws lawv kev txawj kev ntse cia ua cuab yeej txuag lawv lub hwj chim xwb, lawv tsis muab lawv kev txawj coj lawv mus ntsib qhov tseeb. Hais txog qhov no, mas Tswv Qhia Liab Tas Nkes kuj muab coj los ntuas kom tsis txhob cia muaj kev nkees xeeb txawm nyob hauv Koom Txoos txoj sia tias “Thaum peb tsis liam fab rau Leej Ntuj Plig Ntshiab lub paj tshab, los thaum peb muab Leej Ntuj Plig Ntshiab lub paj tshab los tsob hwb peb kev ntshaw, tsis yog ua hauj lwm pab tsoom sid, mas thaum ntawd yuav nkim Leej Ntuj Plig Ntshiab lub paj tshab.”

4. Nrhiav kom pom kev xyiv fab nyob hauv Npes Les Hes, tsis yog nyob Yes Lus Xas Les.

Qhov tim peb uas Tswv Qhia Liab Tas Nkes qhia rau sawv daws, yog qhov tias cov Kws Hnub Qub maj zeeg ua raws li qhov lawv paub. Thaum lawv kawm tau cov Yaj Saub cov lus, lawv sawv kev tsees, lawv tuaj raws li Ntawv sau thiab lub hnub qub coj lawv kev tuaj ntsib nkaus tus me nyuam. Lawv kev xyiv fab ntws pwj yaws tuaj, ces lawv khoov cev hawm thiab thau cov paj tshab tsim nyog tus Pleev raug txom nyem yuav tau siv los cev rau tus me nyuam.

Hes Los hnov hais txog tus vaj yug los nyob hauv lub me nyuam zos Npes Les Hes, mas nws lub siab nphau npog, Hes Los thiaj xa neeg mus tua cov me nyuam nyob Npes Les Hes thiab ib ncig. Qhov no pom tias tus neeg tsis muaj kev tso siab, mas nws lub siab tsis xyiv fab, nws kuj tsis kheev cia lwm tus tau txais kev xyiv fab thiab.

Li ntawd, Tswv Qhia Liab Tas Nkes thiab txhib cov tuaj koom lub Rooj Sau Siab zaum no, tshwj xeeb rau cov Leej Choj thiab cov thawj coj lub Koom Txoos, kom lawv kawm hauv zaj hais txog lub zos Npes Les Hes no. “Muaj qee zaus ntau txoj kev thoob tsib thiab xyiv fab muaj nyob hauv tej pab pawg neeg me me uas peb tsis nco pom txog.”

5. Peb xav tau cov Kws Hnub Qub kom ntau, hos Hes Los mas peb xav tau kom tsawg.

Tswv Qhia Liab Tas Nkes hais txog tej yam nws tau ntsib thaum nws tawm rooj tsham txawv teb chaws tias muaj ib zaug nws mus nrog tus thawj tswj teb chaws tham, tab sis nws yuam kev. Txoj kev ntawd coj nws mus ntsib ob tus neeg Fis Lis Pees tshais chaw tuaj ua hauj lwm txawv teb chaws. Nkawd nco tau nws, ces nkawd thov nws thov Ntuj pub rau nkawd thiab nkawd tau piav txog nkawd kev txom nyem rau nws mloog. Tswv Qhia Liab Tas Nkes hais tias “Ces kuv paub tseeb tias tsis yog kuv yuam kev. Yog Huab Tais Yes Xus coj kuv los raws txoj kev no.”

Nws zeem tseeb tias yam no yog cov neeg ntseeg kev tawm rooj fiv Ntuj lub siab lub plawv tseem ceeb; Huab Tais Yes Xus xaiv dua lwm txoj kev. Huab Tais Yes Xus yog txoj kev, qhov tseeb, thiab txoj sia. Huab Tais Yes Xus yog peb lub hnub qub, yog peb lub hom phiaj, thiab yog peb chaw tso siab.

Yog li mas, Tswv Qhia Liab Tas Nkes thiaj li txhib lub Koom Txoos nyob As Xias kom ua xws li cov Kws Hnub Qub, nws hais tias “Peb xav tau tus ua li cov Kws Hnub Qub kom ntau; yam li cov neeg tawm rooj fiv Ntuj uas lawv nrhiav, mloog, kawm, thiab hawm Tswv Ntuj. Hos tus ua xws li Hes Los mas peb xav kom muaj tsawg; yam li cov neeg kaw lawv nyob hauv txoj kev ntshai, khawm rawv lawv lub hwj chim tsis pub plam, thiab tsis muaj kev tso siab.”

Tswv Qhia Liab Tas Nkes hais lus xaus li no “Nej tuaj thiab koom nrog Huab Tais Yes Xus tawm rooj fiv Ntuj mog.”