Kev Tso Siab Tawm Rooj Fiv Ntuj Loj 2025 qhib nyob hauv lub 11 hlis tim 27 tas los, nyob Pis Naas, Mas Les Xias teb, muaj cov thawj coj lub Koom Txoos li 200 tawm leej tuaj koom qhib lub Rooj Sau Siab no; xws li 10 tus Tswv Qhia Liab, 104 tus Tswv Qhia, 155 tus Leej Choj, 74 tus Leej Phauj, 8 tus Tub Tsob Hwb, nrog rau 422 tus thawj coj Leej Nrog, 32 tus tub leg hauj lwm, thiab 90 tawm tus tub ntxhais tuaj yeem tuaj ntawm 32 lub teb chaws.
Nyob hauv cov kab ke qhib lub Rooj Sau Siab, Tswv Qhia Liab Fas Ntshis Kus Xes Npas Tis Nus tus Tswv Qhia nyob Pis Naas, ua tus hais lus qhib rooj, nws hais tias zoo siab tos txais sawv daws tuaj koom ‘kev tso siab lub caij nplooj ntoos hlav tiag’ rau lub Koom Txoos nyob As Xias.
Nws vam txog lo lus hauv kev tawm rooj fiv Ntuj lub hau lus tias “Tsoom pej xeem nyob As Xias lawv ntoj kev mus ua ke… thiab lawv taug dua ib txog kev rov mus lawv teb chaws” (MT 2: 12) los ntuas sawv daws kom ras tias lub Koom Txoos zoo li cov Kws Hnub Qub uas lawv raug hu los ua ke taug dua ib txog kev nyob hauv lub rooj tuav xam cov Leej Choj (synodality), kom puag qawm lub Koom Txoos nyob As Xias cov kev tshiab uas cog cag nyob hauv kev ua kwv ua tij.
Tswv Qhia Liab Fas Ntshis Kus hais ntxiv tias lub Rooj Sau Siab no muaj tuaj nyob hauv ib lub zoo sij hawm hauv Koom Txoos liv xwm vim yog lub sij hawm Kev Tso Siab lub Xyoo Ntshiab 2025 tab tom yuav dua, cov Hluas Thoob Ntuj Hnub 2027 nyob lub nroog Xes Us lub caij nyoog tab tom los yuav txog, thiab yog theem kawg ntawm lub rooj tuav xam cov Leej Choj hauv xyoo 2028.
Nws tseem hais ntxiv tias “Peb cov neeg As Xias nyiam piav dab neeg tawm puag hauv nruab siab tuaj. Thiab zaj dab neeg tseem ceeb muaj qab hau tshaj cov, mas yog zaj hais txog Huab Tais Yes Xus Pleev, uas niaj hnub no tseem nyob hauv peb vim Leej Ntuj Plig Ntshiab ua hwj huam.”
Mas Les Xias tus nom tuav hauj lwm fab haiv neeg kev haum xeeb hu ua Das Tus Aas Loos As Nkus Das Nkaas, sawv los hais lus rau cov tuaj koom Rooj Sau Siab thiab cav txog pawg ntseeg Kav Tos Liv kev mob siab txhawb txoj kev haum xeeb thiab kev sib tham.
Nws hais tias Mas Les Xias tuav rawv lo lus “Kev sib koom ua ib tug yog lub zog” vim kev sib txawv tsis yog rooj vag thaiv kom sib cuag tsis tau, tab sis kev sib txawv yog lub zog qhov txhawv. Kev haum xeeb pab tsim kev cia siab, kev haum xeeb cob qhia kom sib nkag siab, kev haum xeeb pab kom peb sib pom xws li koj thiab kuv wb yog tswv koom txhim tsa lub teb chaws.
Dhau ntawd, nws tseem nthuav txog Mas Les Xias txoj hauj lwm pab txhawb kev thaj yeeb ntawm cov kev teev hawm kev sib tuav tes, ntawm pab pawg kev muaj feem xyuam, thiab ntawm kev daws kho tej teeb meem me me, Yam li chaw teev hawm tsum yog lub hauv paus chiv kev koom tes, tsis yog chiv kev sib tawg. Pab pawg tsum sib nkag siab, sib hwm, sib lees, thiab sib koom ua hmoov ua ke. Tej li hais los no, yog yam cheem tsum rau As Xias lub sawm fem.
Tswv Qhia Tsom Pas Lis Pas Las Npis SDB, tus Tswj lub Rooj Tswv Qhia nyob As Xias fab kev tshaj lub Moo Zoo, tau hais tias “As Xias teb yog xeev ntuj xeeb cov kev teev hawm tseem ceeb nyob hauv lub qab ntuj no, thiab As Xias teb yog kev sib txawv ntau tsav yam lub tsev, txawm li ntawd, los As Xias teb kuj koom taug tib tug qauv coj; yam li kev hwm cov laus neeg, kev ua neej poo pab raws pawg, kev kawm ntawv, thiab qhov tob tob hauv sab ntsuj plig.
Nws hais txog qhov tseem ceeb hauv kev tawm rooj fiv Ntuj tias “Peb kev tuaj sib sau ua ke no yog kev tawm rooj tuaj ua lub Xyoo Ntshiab kom tau ua Tswv Ntuj tsaug uas tau pub lub siab ntseeg thiab cov txuj txoog rau peb. Peb rau siab ua cov ntsev, ua poov xab, ua lub teeb kaj, ua kev pauv ntxeev tus kis pab tsim lub ntiaj teb muaj chaw rau sawv daws sawv.”
Qhov kawg, nws hais cov lus ua tsaug ntau rau lub Ceeb Koom Txoos Pis Naas, cov nom tswv tswj lub xeev, thiab Mas Les Xias cov tseem hwv, nrog rau cov tub leg qav num thiab cov tub ntxhais tuaj yeem txhua tus; yog tsis muaj lawv mas lub Rooj Sau Siab no yuav sawv tsis tau.
Qhov kab ke tom qab qhib rooj, yog Tswv Qhia Liab Lus Is Tuam Tas Nkes ua tus taws Kev Tso Siab Tawm Rooj Fiv Ntuj Loj tus tswm ciab.
Lub Rooj Sau Siab no yuav ua mus ntxiv li 3 hnub sib law, cov hauj lwm tseem ceeb yog kev thov Ntuj, kev sib hloov txuj txoog, rooj cob qhia, thiab rooj sib tuav xam hais txog kev zov Huab Tais Yes Xus cov yaj; txhua yam no puav leej taw mus rau lub Koom Txoos lub luag huaj lwm tsob hwb As Xias teb.
