Kev hem lub Koom Txoos nyob Yos Nyas Kas Tas rov ua kev txhawj xeeb txog kev thaj yeeb hauv kev ntseeg nyob Is Ntos Nes Xias teb
Hnub tim 24 lub 5 hlis tas los no, cov neeg ntseeg npuab lub Koom Txoos Plos Tes Taas nyob Yos Nyas Kas Tas (Yogyakarta) hauv Is Ntos Nes Xias teb raug neeg tso hem thawj thaum lawv tab tom ua kab ke teev hawm Hnub Chiv ua rau rov qab muaj kev txhawj xeeb hais txog kev thaj yeeb hauv kev ntseeg, thiab kev txuag cov neeg ntseeg uas yog cov haiv neeg tsawg.
Cov neeg ntseeg hauv lub Koom Txoos Nkes Nres Ntsas Mis Xis Xes Ntsas Tes Las (Gereja Misi Sejahtera) los yog GMS nyob hauv lub nroog Xes Voos (Sewon) hauv Npas Tus (Bantul) hais tias cov neeg tawm tsam tau tuaj txog qhov chaw lawv teev hawm thiab thov kom tso tseg txhob teev hawm ntxiv. Tom qab ntawd muaj cov lus tshaj tawm nyob hauv Social Media tias cov neeg tawm tsam qee leej tso hem thawj tias yuav hlawv lub tsev teev hawm.
Pab neeg sib koom tes tiv thaiv kev tsis lees txais qhov sib txawv los yog GEMAYOMI hais tias cov tub ceev xwm raug xa mus saib xyuas kev ruaj ntseg hauv cheeb tsam thiab tiv thaiv kom txhob muaj xwm txheej sawv, ces kev teev hawm thiaj ua tau mus txog qhov xaus yam tsis muaj dab tsi.
GEMAYOMI qhuas txog cov tub ceev xwm tej kev ua, tab sis lawv ceeb toom tias cov xwm txheej no ua kom pom tias kev txhawj xeeb tseem muaj nyob hauv kev twj lij xaiv ntseeg nyob Is Ntos Nes Xias teb. Lub Koom haum no thov kom cov tseem hwv daws kho kev ua hauj lwm hauv txoj cai los hloov kev tso hem thawj, thiab txhib kom cov thawj coj hauv zej zog txhawb nqa kev sib tham thiab kev sib haum xeeb hauv zej zog. Cov tub ceev xwm hauv zej zog hais tias lawv tau tiv thaiv zoo tom qab lawv hnov tias yuav muaj kev tawm tsam. Thiab tab tom soj ntsuam tias muaj dab tsi ntxiv uas yuav ua nyob hauv thaj tsam cov neeg ntseeg yuav ua kev teev hawm. Cov tub ceev xwm hais tias lub tsev teev hawm no yeej muaj daim ntawv lees txais nce npe lawm. Cov xwm txheej nyob Xes Voos yog qhov xwm txheej kawg hais txog kev uv ntawm kev ntseeg uas nyob Npas Tus thiab Ys Nyas Kas Tas ob peb xyoos dhau los.
Tab sis zej zog hais tias “Cov xwm txheej kheev kheev tshwm sim li no, yog qhov tsim nyog yuav txuag kev twj lij xaiv ntseeg kom nruj dua qub. Kev sib tham ntawm cov kev teev hawm kom muaj ntau dua qub thiab kev muab siab rau ua ntu zus hauv kev hwm ntau txoj kev ntseeg nyob hauv zej zog.”
