Cov muaj kev tso siab tawm rooj fiv Ntuj: Tswv Qhia Liab Tas Nkes lo lus hu tuaj txog As Xias

Tswv Qhia Liab Lus Is Tuam Tas Nkes qhib lub Rooj Sau Siab Kev Tso Siab Tawm Rooj Fiv Ntuj Loj nyob Pis Naas, mas nws tau nqua hu lub Koom Txoos nyob As Xias kom txia ua ‘cov tso siab tawm rooj fiv Ntuj rov plhis tshiab’ tias tseem kev tso siab tsis tau txawb rau saum txoj kev cia siab rau qhov zoo, tab sis yog txawb saum Tswv Ntuj lub txiaj ntsim thiab zaj hais txog Huab Tais Yes Xus, uas yog lub moo uas lub rooj xov xwm RVA xa tuaj txog cov mloog nyob thoob As Xias.

Tswv Qhia Liab Tas Nkes hais tias “Ua ntej no, kuv thov ua tsaug lub Rooj Tswv Qhia nyob As Xias (FABC) tshwj xeeb rau fab lis kab xwm kev tshaj lub Moo Zoo uas tau txhim tsa kom muaj kev tso siab tawm rooj fiv Ntuj rau tsoom pej xeem nyob As Xias nyob hauv lub Xyoo Ntshiab 2025 no. Thaum kuv hais mus qhia rau Vaj Qhia Les Os 14 tias yuav muaj lub Rooj Sau Siab no, mas Vaj Qhia hais tias nws thov xa lo lus hais nyob zoo thiab lo lus foom koob foom hmoov tuaj rau sawv daws. Kuv tseem coj lub Pwm Tsav tshaj lub Moo Zoo thiab lub Koom Txoos tshwj cia rau cov hluas lo lus nyob zoo tuaj rau nej sawv daws thiab.

Hais tau tias yog txiaj ntsim thiab koob hmoov rau kuv uas tau ua thawj tus sawv los hais lus nyob hauv lub rooj tuav xam no. Xyoo 2006 yog thawj zaug uas tsa kom muaj lub Rooj Sau Siab Kev Tshaj Ntuj Lus rau As Xias teb nyob Tsheej Maim, Thaib teb, mas sawv daws cia kuv ua tus hais txog ‘Kev Tshaj Ntuj Lus nyob As Xias: Piav txog Huab Tais Yes Xus zaj dab neeg.” Thaum ntawd, kuv tseem yog ib tug Tswv Qhia hluas hluas, thiab kuv tshee ntshai kawg thaum kuv sawv mus hais lus. Tus twg yuav tsis tshee tau yog tias nws mus sawv nyob ntawm Tswv Qhia Liab Rhes Xees Xis Os - Xes Pes tus Thawj Tswj laus lub Pwm Tsav tshaj Ntuj Lus rau haiv neeg, thiab Tswv Qhia Liab Is Vaas - Dis As tus Thawj Tswj tshiab xub ntiag? Zaum no kuv sawv nyob ntawm nej sawv daws xub ntiag, mas kuv tseem tshee, thiab tshee dua qhov qub. Tab txawm yuav nyob rau lub zwj ceeb twg, los peb tseem tham txog Huab Tais Yes Xus zaj dab neeg rau As Xias teb mloog thiab rau qab ntuj mloog. Peb tsis nkees piav txog Huab Tais Yes Xus. Huab Tais Yes Xus yog tus kws piav dab neeg thiab yog zaj dab neeg hloov tau leej neeg zaj dab neeg, hloov tau pab pawg neeg, hloov tau cov neeg muaj txhaum, hloov tau cov neeg raug raws, thiab hloov tau lub qab ntuj neeg.

Hnub no, zaj lus kuv yuav tau coj tuaj hais rau nej mloog, yog zaj muaj lub npe tias ‘Taug Dua Lwm Txoj Kev, Cov Tso Siab Tawm Rooj Fiv Ntuj Rov Plhis Tshiab.’ Lub hau no haum rau Rooj Tswv Qhia nyob As Xias lub Rooj Sab Laj zaum tim 50 nyob Npaas Koj hauv xyoo 2022 lub hau lus tias ‘Tsoom pej xeem nyob As Xias lawv ntoj kev mus ua ke… thiab lawv taug dua ib txog kev rov mus lawv teb chaws’ (MT 2: 12). Nqe lus hauv Mas Tais Ntawv Moo Zoo no yog hais txog thaum cov Kws Hnub Qub tuaj hawm tus me nyuam Yes Xus tas, tus Tshiab qhia lawv hauv npau suav kom txhob mus cuag Hes Lis, ces lawv taug dua lwm txoj kev rov mus lawv tsev. Peb tsoom pej xeem nyob As Xias zoo li cov Kws Hnub Qub, peb raug hu kom ua cov neeg tso siab tawm rooj fiv Ntuj taug dua ib txog kev. Tab sis peb taug dua ib txog kev tsis yog vim peb xav qhia, peb taug dua ib txog kev vim peb txoj kev npau suav ntshiab.

Kuv cov lus hais rau nej, mas muaj 2 ntu mus raws li zaj hau lus lub Rooj Sau Siab xav kom kuv hais.

Ntu 1. Kuv xav kom peb tig mus saib lo lus hauv feem tim ob ua ntej tso, yog lo lus tias ‘Cov Tso Siab Tawm Rooj Fiv Ntuj Rov Plhis Tshiab’. Tseev kom peb rais ua tus neeg tso siab tawm rooj fiv Ntuj tiag, mas peb tsum ris zaj hais txog Huab Tais Yes Xus. Peb rais mus ua zaj dab neeg ciaj sia hais txog kev tso siab rau Huab Tais Yes Xus, mas kawg peb tsum hais lus, ua yeeb yam, sib khaub zig, thiab muaj tus yam ntxwv xws li ib tug neeg ntseeg. Peb ua tawm kom pom tias Huab Tais Yes Xus zaj dab neeg tau pauv peb lub neej, thiab tau sau zaj dab neeg tshiab hais txog lub siab ntseeg, kev tso siab, thiab kev nyiam.

Kuv thov hais rau nej sawv daws tias peb tab tom txob siab txog cov neeg ntseeg kev tso siab (Christian hope). Tsis yog kev cia siab rau qhov zoo, los ntseeg tias txhua yam yuav tawm los zoo. Nws kuj tsis yog txoj kev xav txog qhov muaj kev cia siab los xav tau, los khiav tawm ntawm lub neej kev txom nyem. Tsis yog khiav kom deb qhov tseeb uas phem thiab kev sim lub neej. Kuv pom tias thaum peb siv lo lus ‘kev tso siab’ (hope) mas ntau zaus peb siv tsis raug lub ntsiab, vim peb xav tias kev tso siab yog ‘kev vam’ (wish). Piv li muaj tej tus tab tom xav tuaj nruab siab tias “Pluas hmo no kuv tso siab tias yuav tau me ntsis kua txiv cawv haus.” Qhov tseem mas yog hais tias “Pluas hmo no kuv vam tias yuav tau me ntsis kua txiv cawv haus” mas yuav raug lub ntsiab lus dua. Cov neeg ntseeg kev tso siab yog Ntuj ib txog kev tsim txiaj uas muaj Tswv Ntuj lub txiaj ntsim ntws sib laub sis lug nyob hauv peb thiab muaj Tswv Ntuj yog lub hom phiaj. Kev tso siab lub hom phiaj tsis yog ib yam tab sis yog ib tus, yog tus Tswv Ntuj nqes los yuav cev nqaij neeg uas yog Huab Tais Yes Xus Pleev. Peb rov tig mus saib tus piv txwv, kuv xav tias thaum peb mus xyuas tus neeg mob, tsim nyog peb yuav hais rau nws tias “Kuv tso siab rau Tswv Ntuj tias koj yuav zoo” mas yuav zoo mloog dua hais tias “Kuv tso siab tias koj yuav zoo.” Qhov zoo nkauj nyob hauv cov neeg ntseeg kev tso siab mas yog vim Tswv Ntuj nyob hauv Huab Tais Yes Xus nws yog kev tso siab lub hauv paus chiv thiab yog kev tso siab lub ntsis xaus, kev tso siab thiaj zoo xws li tib neeg thiab muaj nuj nqis rau neeg. Koom Txoos Kav Tos Liv cov lus qhia, qib 1818 hais txog cov neeg ntseeg kev tso siab “Kev tso siab txoj kev tsim txiaj teb lub tswv yim ntshaw txais kev zoo siab uas Tswv Ntuj cog rau hauv neeg nruab siab; nws coj kev tso siab uas yog lub zog txhawb neeg kom ua neeg cov hauj lwm thiab ntxhua neeg kom ntshiab txaus mus nyob hauv Ntuj lub Ceeb Tsheej, nws txheem neeg kom sawv tau taus thaum neeg poob rau kev me siab, nws thiab neeg nyob hauv lub caij raug tso pov tseg, nws qhib peb siab kom cia siab ntsoov tos txais txoj hmoov zoo nyob mus li. Thaum peb muaj kev tso siab, peb yuav hla dhau kev cuaj khaum qia dub rooj ntxiab thiab peb yuav txais tau kev zoo siab uas phwj ntawm kev sis hlub los.”

 Li ntawd, cov neeg ntseeg kev tso siab thiaj li txhim tsa, ntxhua, thiab txhab ntxiv 3 yam rau neeg lub siab ntshaw kom tau txais kev zoo siab, kev ua siab ntev nyiaj, thiab tseem kev sis nyiam sis hlub. Coob leej ntau tus raug daim duab cuav hais txog kev zoo siab plooj lawv qhov muag, yam li kev huas nyiaj txiag, nrhiav yuav tsoos tsho zoo nkauj muaj nqis kim, ua vaj tse loj zoo nkauj, coj npauj nyiag npauj kub, thiab siv cuab twj kim kim. Yog txoj hmoov phem, muaj ib txhia tub kawm ntawv ntxhais kawm txuj lawv tsis ua siab ntev kawm, lawv tsuas khib lav rau xwb. Cov nom tswv lawv ntxias dag tias yog tsoom pej xeem xaiv lawv ua nom, mas lawv yuav pab li ub li no, lawv tsis muaj lub siab hlub tiag rau tsoom sid. Li no, mas tsis yog kev sis nyiam sis hlub lawm, tsuas yog kev qia dub hlub tus kheej xwb, muaj qhov phem zais nyob hauv lawv kev ua qhov zoo. Tej piv txwv tau muab piav los no coj neeg mus rau lub chaw khoob lug thiab tsis muaj chaw tso siab. Yog kom paub tias kuv puas ua lub neej mus raws li kev tso siab txoj kev tsim txiaj, mas kuv yuav tau muab cov lus no rov los nug kuv: Dab tsi ua rau kuv muaj kev zoo siab? Dab tsi ua zog txhawb siab kom kuv ua tau siab ntev nyiaj mus ntxiv? Kuv lub siab nyiam ntshiab npaum li cas? Thaum kuv rhais ruam los yog tawm rooj fiv Ntuj, mas kuv puas muab kev tso siab ua lub zog rub kuv kom mus taus ntxiv, thiab kuv mus zoo li cas kom txog kuv qhov chaw tso siab? Kuv kev tso siab puas taw mus rau Huab Tais Yes Xus thiab nws lub Ceeb Tsheej?”

Ntu 2. Kuv coj nej los mloog hais txog lo lus hauv feem tim ib yog lo lus tias ‘Taug Dua Lwm Txoj Kev’, uas yog kev xam pom tseem ceeb nyob hauv cov Kws Hnub Quv kev tawm rooj, yog lawv kev tso siab tawm rooj fiv Ntuj.

Zaj hais txog cov Kws Hnub Qub mas qhov tiag kuj yog hais txog Huab Tais Yes Xusm nws yog qhov pom kev los yog ua lub hnub qub, yog  txoj kev los yog txoj lw taug mus txais txoj sia. Huab Tais Yes Xus hu thiab sau tsoom neeg tuaj ntawm ntau lub teb chaws thiab ntau cov txuj txoog sib txawv tuaj, Huab Tais Yes Xus coj lawv tuaj ntsib Huab Tais Yes Xus thiab Huab Tais Yes Xus lub Ceeb Tsheej. Cov Kws Hnub Qub kev tawm rooj fiv Ntuj yog kev tso siab ib zaj dab neeg zoo nkauj kawg kiag. Zaj dab neeg no nthuav kom pom tias Huab Tais Yes Xus qhov pom kev tsim kev tawm rooj fiv Ntuj uas muaj txheej muaj theem, tsim kev tawm rooj fiv Ntuj ua nqua hu kom muaj kev xam pom ntsia paub, muaj kev nyiaj, muaj lub hom phiaj pom tau tseeb.

Zaj hais txog cov Kws Hnub Qub cuam tshuam nrog zaj hais txog Hes Los. Ob zaj no sib txhab sib chaws. Ob zaj no qhia kom pom tias muaj kev tawm rooj fiv Ntuj sib txawv; ib mas taw ncaj hlo rau Huab Tais Yes Xus, thiab ib mas tawm tsam Huab Tais Yes Xus. Ob zaj no ib zaj hais txog tus neeg muaj kev tso siab tawm rooj fiv Ntuj thiab ib zaj hais txog tus neeg tsis muaj chaw tso siab kawm rooj fiv Ntuj. Kuv xav hais txog zaj cov Kws Hnub Qub thiab zaj Hes Los qhov sib cov nyom no nyob hauv Huab Tais Yes Xus zaj dab neeg. Kuv yuav hais tias cov Kws Hnub Qub xaiv dua ib txog kev tsis yog qhov peb pom tom qab no xwb, tab sis lawv twb xub tau xaiv thaum lawv pib tawm rooj lawm. Cov Kws Hnub Qub xaiv txoj kev txawv Hes Los txoj. Cov Kws Hnub Qub xaiv txoj kev muaj kev tso siab, uas yog txoj kev txawv Hes Los txoj kev tsis muaj chaw tso siab cuag li qab ntuj thiab hau ntuj. Thov cia kuv taw rau nej kom pom txog 3 lub poov keeb hauv cov zaj no.

Lub poov keeb tim 1. Cov Kws Hnub Qub tuaj Toob Fab tuaj. Cov Yus Das saib lawv cov no yog pej kum neeg. Muaj tej tus kws txuj hais tias cov Kws Hnub Qub yog cov neeg ua Leej Choj, lwm tus hais tias cov Kws Hnub Qub yog Txiv Khawv Koob txheeb neeg ntsuj plig thiab npau suav, lwm tus tseem hais tias cov Kws Hnub Qub yog Kws Faj Lem txawj nyeem lub ntuj thiab cov hnub qub. Txawm lawv yuav yog dab tsi los xij, qhov pom tseeb nyob hauv lawv mas yog lawv paub cov Yus Das cov Ntawv hais txog tus vaj Yus Das tshiab yuav yug los. Lawv txoj kev paub me me no nrog rau lawv kev paub saib hnub qub, mas lawv thiaj li ntseeg cov lus sau nyob hauv cov Yus Das phau Ntawv Ntshiab. Cov neeg txheej laus ntseeg tias ib tug neeg muaj ib lub hnub qub nrog. (Qhov no tsis tau txhais tias sawv daws yog hnub qub! Yog sawv daws muaj hnub qub!) Kev txawj nyeem yam ntuj tsim teb raug nrog rau lawv kev paub Ntawv Ntshiab los yog Tswv Ntuj lo lus, ob qhov no ua zog txhawb lawv kom tawm rooj tuaj fiv Ntuj. Lawv lub hom phiaj yog tus vaj tshiab uas lawv xav tuaj hawm. Lawv tsa muag ntsia lub hnub qub nyob siab saum taub hau, lawv mloog lub suab ntxhe tuaj txog lawv pob ntseg, lawv yuav cov Yaj Saub lawv tsis paub txog lub suab ntxhi rau lawv.

Ntawm Hes Los nws ua li cas? Nws tsis tig cev ua dab tsi. Ua cas nws thiaj yuav tig cev? Nws muaj hwj chim. Lub hwj chim ua lub nra hnyav rau nws, ces nws tig cev tsis taus. Hes Los tsis tas yuav tig cev tab sis nws ua kom luag lwm tus tig cev. Hes Los yuav txuag nws lub hwj chim cia kom nyob ntseg thiab nyob ruaj nrog nws. Lub tswv yim tawm mus nrhiav tus vaj tshiab tsis muaj nyob rau hauv nws lub hlwb. Qhov kawg, nws tseem yog vaj. Yog tias Hes Los sawv kev tawm rooj fiv Ntuj, kuj yog nws taug kev mus nrhiav nws xwb. Tab sis qhov tseeb tej ntawd tsis yog kev tig cev tiam sis yog kev nkees, qhov no maj mam ua kev puas tsuaj rau txoj sia kom tuag mus. Hes Los tsuas ntsia tus kheej xwb, nws thiaj ua neeg dig muag ntsia tsis pom yam ntuj tsim teb raug thiab ua neeg lag ntseg tsis hnov lo lus hauv Ntawv.

Kwv tij nkauj muam sawv daws, peb puas tseem ntsia ntsoov cov hnub qub, lub ntuj, cov toj roob, tej hav ntoo, cov hav dej thiab tsoom neeg, thiab ntsia txog lwm tus? Peb puas muaj sij hawm ntsiab, pom thiab mloog? Peb puas nkim lub sij hawm dag? Los peb puas muab peb khi rawv rau cov xov tooj thiab peb kev ntxhov siab? Txawm tias peb ua tiag ntsia yam ntuj tsim teb raug, mas peb puas tseem ntsia pom cov hnub qub los yog muaj iab oo npog tas lawm? Puas tseem muaj hav noo thiab tej toj roob hauv pes thiab hav dej rau peb tau ntsia lawm? Los yam peb pom ntawd tsuas yog yam nco rau nruab siab txog cov ceeb tsheej cuav tau cog lus rau peb tias yuav pab kom lub sim ceeb huaj txhaij tsav vam tab sis qhoa tiag yog coj kev puas tsuaj tuaj rau lub ntiaj teb? Yog tsis muaj tsav ntuj tsim teb raug, peb puas yuav paub txog tus tseem Tswv Tsim thiab tus Vaj kav sim ceeb tau?

 Lub poob keeb tim 2. Cov Kws Hnub Qub kev tawm rooj fiv Ntuj nrog rau qhov lawv lees tias lawv paub tsis tas. Kev nyeem hnub qub thiab txhais ua zem zuag li ntawd tsis txaus pab kom lawv kev tawm rooj fiv Ntuj tiav txhij. Yog li mas lawv thiaj tsum mus nug txog qhov tseeb nyob Yes Lus Xas Les, uas yog cov Yus Das thaj chaw ntshiab cia rau tau tuaj fiv Ntuj. Cov Kws Hnub Qub kev tso siab tawm rooj fiv Ntuj no mas lawv tsum ua neeg me tsis muab hlob, qhib siab dav kawm ntawm luag thiab cia luag qhia. Yog tias lawv lub hom phiaj yog mus kom txog tus vaj tshiab raws li cov Yaj Saub hais tseg, mas kawg yog mus rau Yes Lus Xas Les xwb lawv thiaj li yuav tau ntsib, vim tias cov thawj leej choj, cov kws ntawv, thiab cov coj kev teev hawm yam li cov Fas Lis Xais thiab Xas Dus Kais puav leej nyob hauv Yes Lus Xas Les. Cov Kws Hnub Qub tau lub npe tias yog cov neeg thoob tsib, lawv nyiam nug thiab nyiam mloog kom muaj tswv yim. Txoj kev thoob tsib tseeb tiag tsis yog nyob ntxawm hauv tus neeg qhuas tias nws paub tas txhua yam lawm. Cov phooj ywg, nej puas hnov rooj tuav xam thiab rooj sab laj nyob hauv Leej Ntuj Plig lub suab ntxhe tuaj txog nej pob ntseg?

Hes Los thiab nws cov neeg nyob hauv lub tsheej lawv ua li cas? Nyob ib ncig Hes Los yog cov thawj leej choj thiab pej xeem cov kws ntawv, lawv cov no paub Ntawv Ntshiab thiab cov Yaj Saub cov lus zoo heev tab sis lawv tsis quav ntsej txog yam lawv paub. Lawv txoj kev paub Ntawv Ntshiab tsis pab tau lawv. Qhov no yog ib qho hais txog kev tsis yeem tig cev. Hes Los tus kab mob tau kis mus rau lawv lawm. Yog li mas lawv cov no tab tom ua dab tsi nyob hauv Hes Los lub tuam tsev vaj? Lawv kawg yog tej twj nyob rawv hauv lub tsev kom pom tias lub tsev ntawd yog lub tsev muaj hwj chim vaj xwb, puas yog? Khuv xim lawv lub paj tshab thiab lub laj lim kawg li! Los txog rau peb lub zim txwv, peb muaj hmoo vim tias muaj cov laj txheej xyaum kav txoj hauj lwm saib xyuas pawg ntseeg kom mus raws qhov ncaj thiab pab kev lis dej num saib xyuas tej cuab yeej cuab tam. Tab sis muaj ntau zaus kuv xav twj ywm tias cov laj txheej no puas qhia peb kom txawj coj Leej Ntuj Plig Ntshiab cov paj tshab ntau ntau ntawd mus siv kom txi txiv nyob hauv peb pab pawg? Peb cov paj tshab yuav yaj ntshis yog tias peb tsis liam fab rau thiab peb tsis thau coj mus siv. Peb cov paj tshab kuj yuav tsis muaj txiaj ntsim dab tsi, yog peb tsis coj mus siv raws li Leej Ntuj Plig Ntshiab lub hom phiaj pub rau peb, ib yam lib peb pom nyob hauv zaj hais txog Hes Los ntshai tsam nws poob lub hwj chin vaj, ces nws hu pej xeem cov kwv ntawv tuaj nug saib tus vaj tshiab yug los nyob qhov twg. Tab sis Leej Ntuj Plig Ntshiab cov paj tshab muaj tuaj rau peb tau muab los sib ntxiv qhov zoo kom tsa tau lub Cev, tsis yog cia rau txhawb peb txoj hauj lwm thiab peb lub siab ntshaw ua tus loj xws li Hes Los thiab nws cov neeg.

Lub ppov keeb tim 3. Hes Los thiab cov Kws Hnub Qub tau paub ntawm cov thawj leej choj thiab cov kws ntawv tias Leej Pleev yug los nyob Npes Les Hes, Yus Das teb raws li tus Yaj Saub Mis Kes tau sau tseg (MiK 5: 2). Cov Kws Hnub Qub paub li ntawd, lawv maj zeeg mus. Lawv rov tawm rooj fiv Ntuj mus raws li cov lus tus Yaj Saub hais, tab sis lawv tseem muaj lub hnub qub coj lawv kev mus thiab. Thaum lawv tuaj txog qhov chaw tus me nyuam vaj nyob, lawv zoo siab, lawv hawm tus me nyuam, thiab lawv cev paj tshab phim ib tug Vaj Mes Xias raug txom nyem rau tus me nyuam. Li ntawd, cov Kws Hnub Qub thiaj rais ua Yaj Saub. Lawv kev kawm thiab kev mob siab rau tau tiav lawm nyob hauv Huab Tais Yes Xus. Lawv tau hawm thiab hwm Huab Tais Yes Xus, lawv tau zeem tseeb tias Huab Tais Yes Xus yog Tswv Ntuj lub paj tshab pub rau ntiaj teb neeg tiag. Huab Tais Yes Xus yog Tswv Ntuj kev xyiv fab thiab Tswv Ntuj kev nplij neeg. Huab Tais Yes Xus txais tos sawv daws. Cov Kws Hnub Qub ua pov thawj tau tias tus vaj tshiab nthuav tes tos sawv daws.

Ntawm Hes Los nws ua li cas? Hes Los pob siab nthav thaum nws paub lawm tias cov Yus Das tus vaj yug los lawm. Tseem muaj ib yam txaus poob siab thiab yog qhov tias tus vaj tshiab yug los nyob Npes Les Hes tsis yog nyob Yes Lus Xas Les! Tsis yog nws yuav nrog sawv daws zoo siab vim muaj tuaj raws li cov lust us Yaj Saub hais tseg, nws thiab tas Yes Lus Xas Les ua siab nphau npog. Zaum no yam tawm tsam lawv tawm tuaj lawm. Li ntawd, Hes Los thiab nrog cov thawj leej choj thiab cov kws ntawv tuav tswv yim nrhiav tus me nyuam vaj tua pov tseg. Hes Los nyob tsis taus, nws ntxhov siab, nws ntshai, mas thiaj li muaj neeg raus tes nrog nws txov cov me nyuam nyob Npes Les Hes thiab ib ncig txoj sia. Lawv cov ua niam quaj nyiav lawv cov me nyuam. Tas txhua yam no yog Hes Los ua los tiv thaiv nws lub hwj chim ua vaj nyob hauv nws lub ceeb tsheej thiab nyob Yes Lus Xas Les kom txhob plam. Nyob rau lub ntuaj tshiab zim txwv no, kev tsis muaj chaw tso siab los yog tag kev cia siab ua rau neeg rov sib txov txoj sia, tsis hais lawv tua cov neeg tsis paub dab tsi, tua cov me nyuam, tua cov ua niam, thiab tua cov neeg koom zej koom zos. Lub neej hauv cov kab sab thiab cov txuj tshiab ntiv ntsis taw, yog yam pab tau kom neeg muaj kev kawm, kev sib txuas lus, thiab kev hloov lub sawm fem, ziag no tab tom raug cov neeg tsis muaj kev cia siab siv los txo luag lwm tus lub tsim, nyiag luag tej lub hom thawj, tshaj tej xwm cuav, tseb kev sib cov nyom, thiab ntxias dag kom tau txiaj ntsim rau tus kheej. Cov neeg tsis muaj kev tso siab lawv lub siab nyob tsis xyiv fab. Lawv tsis tseb kev xyiv fab thiab lawv tseem tsis cia lwm tus txais kev xyiv fab thiab. Peb thov caw Hes Los thiab nws cov npawg, kom nej tawm hauv Yes Lus Xas Les qhov chaw plooj nej qhov muag mus. Vim tias muaj kev thoob tsib thiab kev xyiv fab ntau nyob tom Npes Les Hes, thaj chaw uas nej tsis quav ntsej txog thiab nej saib tsis taus.

Ziag no kuv thov muab ib lo lus nug los hais ua chaw xaus; muaj pes tsawg tus Kws Hnub Qub? Niaj zaus mas peb teb tias muaj peb tus Kws Hnub Qub. Tab sis Mas Tais Ntawv Moo Zoo tsis tau hais tias muaj li ntawd. Nws tsuas hais tias muaj peb yam paj tshab. Tej zaus kawg muaj 2 tus xwb. Tab sis kuv xav mas ntshai muaj tshaj ntawd. Kuv npau suav tias nyob rau txhua tiam yeej muaj cov Kws Hnub Qub ntau pua, ntau txhiab, ntau plhom, thiab ntau heev suav tsis txheeb leej neeg, nrog rau peb sawv daws tuaj nyob ua ke ntawm no thiab hauv peb pab pawg ua peb tau tsob hwb lawv, muaj coob npaum cov hnub qub sau ntuj! Nyob hauv peb kev tawm rooj fiv Ntuj nyob hauv lub qab ntuj no, peb xav kom muaj cov Kws Hnub Qub ntau ntau, tab sis Hes Los mas peb xav kom muaj tsawg.

Ob peb hlis tas los, kuv tau mus koom lub rooj hais txog cov kev teev hawm nyob hauv ib lub teb chaws, kuv thov tsis hais txog lub npe teb chaws. Peb cov coob so nyob hauv ib lub tsev txais qhua loj. Hnub ob thaum sawv ntxov, cov tub lis dej num hais rau kuv tias lawv xaiv kuv ua ib tug nyob hauv pab sawv cev mus ntsib tus nom tswj teb chaws nyob hauv tus Txoov Tim Tswv lub tuam tsev lis kab xwm, thiab kuv tsum tau npaj kom txhij cia, lawv yuav coj tsheb tuaj tos. Kuv tsis nco faj, ces kuv cia li maj zeeg nqes mus nyob hauv chav tsev tos. Vim kuv maj dhau, ces kuv tsis nco saib kev, zoo li kuv yim mus mas yim nrug deb ntawm chav tos tsheb lawm. Thaum kuv mus li ntawd raws cov chaw muag toob xib, kuv hnov ib lub suab poj niam hu tias “Aub Ntuj e! Aub Ntuj e!” Nws lub suab zoo li mob heev, ces kuv nres thiab tig mus ntsia saib lub suab ntawd nrog qhov twg tuaj, kuv pom ces kuv hais rau nws tias “Phauj, koj puas uas li cas?” Nws ntsia kuv, ces nws hais tias “Vuam! Koj puas yog Tswv Qhia Liab Tas Nkes na?” Kuv poob siab nthav, kuv teb nws tias “Yog kuv mas. Kuv tab tom nrhiav chav tos tsheb.” Ces nws hais tias “Kuv tsuas pom koj hauv Youtube xwb. Zaum no kuv tau pom koj tiag tiag lawm ntag! Vim kuv txoj hauj lwm ua rau kuv mus koom lub Txoos Txi Ntuj hauv Hnub Chiv tsis tau. Tab sis kuv saib thiab mloog koj nthuav Tswv Ntuj Lo Lus los pab kuv thov Ntuj tas txwv. Tswv Qhia Liab e! Kuv ua koj tsaug os. Thov koj foom hmoov zoo rau kuv puas yuav tau?” Kuv hais tias tau kawg, ces kuv foom hmoov zoo rau nws. Tus poj niam no tuaj ntawm Fis Lis Pees teb tuaj. Thaum kuv thov Ntuj rau nws, mas nws quaj. Thov Ntuj tas, nws hais tias “Kuv thov nrog koj thau duab puas tau?” Kuv tias tau, ces wb thau duab ua ke. Nws hais ntxiv tias “Kuv thov hu xov tooj rau kuv tus phooj ywg tuaj Fis Lis Pees teb tuaj, kom nws tau txais lus foom hmoov zoo ntawm koj thiab.” Thaum pom tej no, ua rau kuv ras tau tias tsis yog kuv yuam kev, tab sis qhov tseeb yog Huab Tais Yes Xus coj kuv los rau txoj kev no, kom kuv tau ntsib Huab Tais Yes Xus nyob hauv ob tug poj niam tsiv teb tuaj ua hauj lwm nyob txawv teb chaws uas muaj lub siab ntev nyiaj thiab muaj kev tso siab no. Kuv cia li tsis nco txog kev mus ntsib tus tswj teb chaws li lawm. Lwm txoj kev qhib rau kuv lawm.

Kuv tau hais los lawm tias zaj dab neeg hais txog cov Kws Hnub Qub mas qhov tseeb yog hais txog Huab Tais Yes Xus. Huab Tais Yes Xus tau xaiv taug dua ib txog kev. Huab Tais Yes Xus tau coj cov Kws Hnub Qub mus taug dua lwm txoj kev. Huab Tais Yes Xus xaiv txoj kev txawv Hes Los txoj kev. Huab Tais Yes Xus yog Tswv Ntuj Leej Tub, nws hle nws lub hwj chim Tswv Ntuj los nyob hauv lub cev tsis muaj zog. Huab Tais Yes Xus yug los ua ib tug me nyuam txom txom nyem nyob hauv lub dab nyuj. Huab Tais Yes Xus ua tus Xib Hwb tsis muaj chaw rau ncoo. Huab Tais Yes Xus xaiv cov neeg cov Las Npis tsis txais lawv los ua nws thwj tim. Huab Tais Yes Xus qhia txog qhov tseeb tab sis nws raug lo lus dag thiab ua tim khawv cuav. Huab Tais Yes Xus nyob saum tus Ntoo Cuam thiab raug tham tias nws yog tus vaj cuav. Huab Tais Yes Xus tseem nyob nrog cov neeg tshaib, cov neeg nqhis, cov tsis muaj chaw so, cov raug kaw hauv tsev loj faj, cov neeg txawv. Yog lawm, Huab Tais Yes Xus txaiv lwm txoj kev taug. Tab sis thov kom nco tias Huab Tais Yes Xus yog txoj kev, qhov tseeb, thiab txoj sia. Huab Tais Yes Xus yog lub hnub qub, Huab Tais Yes Xus yog peb lub hom phiaj. Huab Tais Yes Xus yog peb chaw tso siab. Tuaj mas, peb koom nrog Huab Tais Yes Xus tawm rooj mus ua ke!”