Lub Koom Txoos cov hauj lwm pab neeg thoj nam.
“Lub Koom Txoos yuav nrog nraim tib neeg mus ua ke, kom tau mus txog txoj kev cawm.”
Vaj Qhia Fas Ntshis Kus ib txwm txhib hais txog kev muab siab rau saib xyuas cov neeg pluag txom nyem. “Yuav tsis tso leej twg tseg rov tom qab” nyob hauv txoj kev mus kev ua ke, vim sawv daws yog kwv yog tij. Vaj Qhia hais ntxiv tias :
“Lub Koom Txoos yuav ua lub tsev kho mob tshav puam, vim yuav saib xyuas cov neeg pluag, cov neeg txom nyem thiab cov neeg tsis muaj zog nyob hauv zej zog.”
Ua rau peb rov mus xav txog cov hauj lwm hauv lub Koom Txoos hais txog kev pab cov neeg thoj nam. Yog lub tswv yim sib koom ua cov hauj lwm no zoo li cas ?
Rov mus xav txog xyoo 1891, uas yog cov xyoo muaj kev sib txeeb ntawm cov Koom Haum nyob sab hnub poob thiab lub Koom Txoos pib muaj kev ras txog teeb meem zej zog. Vaj Qhia Pis Os 13 thiaj tau sau ib tsab ntawv Rerum Novarum hais txog cov tub zog txoj cai, kom tau ua ncaj ncees cheem kev sib tawg thiab tsim kev thaj yeeb hauv kev ncaj ncees. Muab siab rau saib xyuas cov neeg pluag, ces thiaj teeb tsa kom muaj lub Koom Haum pab cov neeg pluag. Tom qab xyoo 1958 txog 1963 thiaj muaj lub Rooj Ncauj Lus Vas Tis Kas Ob uas yog lub Koom Txoos Kav Tos Liv tsim tawm. Lub hom phiaj yog kho lub Koom Txoos kom haum rau lub ntuj txheej tshiab. Vaj Qhia Zam 23 thiaj hais txog neeg lub meej mom, neeg kev ncaj ncees thiab kev sib raug zoo ntawm tib neeg thiab zej zog. Kom sawv daws sib koom tes thiab ua ib tug.
Xyoo 1965, Vaj Qhia Zam Paj Lug 6 thiaj sau tsab ntawv hais txog kev qhia kev ntseeg, hais txog lub ntuj nyem no tias : lub Koom Txoos cov hauj lwm yuav tsum saib lub Cim ntawm lub caij nyoog tias yog ntsev, yog qhov pom kev, yog cov keeb nyob hauv ib tsoom neeg ntiaj teb. Piav txog Ntawv Ntshiab thiab neeg lub neej. Kev qhia kev ntseeg hauv zej zog thiaj yog qhov chiv keeb ntawm kev muab siab rau saib xyuas, pab cov neeg uas raug teeb meem thiab ntsib kev txom nyem.
Vaj Qhia tseem sau ntau tsab ntawv hais txog txhim kho neeg thiab kev ncaj ncees nyob ntiaj teb. Vaj Qhia ceeb toom txog kev tshaj lub Moo Zoo lub zim txwv no.
Xyoo 1975, Vaj Qhia txhib txog kev txhawb nqa tib neeg. Kev ntseeg qhia txog lub neej thiab daws neeg li teeb meem. Xyoo 1971, lub Koom Txoos nyob As Xias thiab cov Tswv Qhia thiaj sib koom tsa kom muaj lub rooj Tswv Qhia As Xias uas yog FABC.
Xyoo 1972 thiab 1973 Thaib teb thiaj tsim lub pwm tsav Kav Tos Liv (CCTD) kom tau txhim kho zej zog thiab txhawb nqa lub Koom Txoos kev mus ua ke nrog ib tsoom neeg nyob hauv txoj kev cawm. Muaj cov neeg hauv lub Koom Haum ua hauj lwm fab neeg thoj nam, kev ncaj ncees, kev thaj yeeb, kev noj qab haus huv thiab lwm yam hauj lwm nrog rau COERR. COERR yog ncaj qha ua hauj lwm pab cov neeg thoj nam. Kev ua hauj lwm fab zej zog ntawm lub Koom Txoos, lub Cheeb Koom Txoos Chiangmai yog ib feem ntawm txoj hauj lwm qhia kev ntseeg hauv lub Koom Txoos.
Tus kws txuj Sunthorn Wongchomphon ntawm lub Koom Haum txhim kho hauv Cheeb Koom Txoos Chiangmai tau piav txog kev muaj feem cuam nrog lub Koom Txoos cov hauj lwm pab neeg thoj nam uas lub Cheeb Koom Txoos Chiangmai tau ua, nws piav tau ntxim siab kawg thiab nws hais tias : lub 2 hlis xyoo 2021, yog lub caij cov tub rog Mias Mas txeeb teb chaws. Peb soj ntsuam thiab mloog xov xwm tas li. Thaum lub 3 hlis, cov tub rog Mias Mas tau siv dav hlau mus pov hoob pob tua Mias Mas qaum teb, ces cov Pas Kas Yos sib tw khiav hla ciam teb mus rau Thaib teb. Thaum ntawd peb thiaj txiav txim siab cev tes mus pab cov neeg thoj nam. Peb tau pab lawv nyob hauv lub 4 hlis, 5 hlis thiab lub 6 hli. Feem coob yog cov me nyuam, cov poj niam thiab cov laus. Lawv khiav tuaj rau Thaib teb nyob hauv lub nroog Mae Sariang, lub xeev Mae Hongson. Lub 6 hli nrab, yog lub caij uas muaj cov neeg thoj nam khiav tuaj Thaib teb coob tshaj nyob hauv lub nroog Mae Sariang. Cov nom tswv Thaib thiaj kheev kom cov Pas Kas Yos uas yog neeg thoj nam kav tsij rub tsev ntaub thiab ua tsev nruab nyob hauv lub zos Saohin, vim yog thaj tsam ntuj tab tom los nag. Tej lub tsev muaj neeg nyob li ntawm 5 leeg txog 10 leej. Lawv ua zaub ua mov noj thiab dej haus dej siv yog tos tsheb xa tuaj thiab cug ntawm tej kwj ha los. Tab txawm li ntawd, tsis kav peb kuj tseem pom tau tias lawv muaj txhiam xws tsis txaus noj. Lub Cheeb Koom Txoos Chiangmai thiaj tshaj tawm thiab thov kev pab. Tsis hais txhiam xws noj thiab toob xib siv, thov vam txog cov neeg ntseeg huv tib si. Peb yog tus choj tuam mus pab cov kwv tij uas yog neeg thoj nam no. Kuj tseem muaj kev sib ntaus rog txij lub 12 hlis xyoo 2022 los txog zim txwv no. Ua rau cov neeg Pas Kas Yos khiav hla ciam teb tuaj nyob raws tus ciam teb Thaib thiab Mias Mas coob kawg txij lub xeev Mae Hongson mus txog lub xeev Rakburi. Nyob hauv lub nroog Maesod uas nyob hauv lub xeev Tak, muaj cov Pas Kas Yos ntau pua leej tsis kam rov qab mus Mias Mas teb. Tsis tas li ntawd, kev sib ntaus rog kuj tsis muaj qhov hais haum thiab yuav tso tseg sai sai.
Cov thawj coj fab qhia kev ntseeg, cov pab neeg txom nyem, COERR koom nrog Caritas thiab fab zej zog hauv lub Cheeb Koom Txoos Chiangmai, lub Cheeb Koom Txoos Nakhon Sawanh thiab lub Cheeb Koom Txoos Rakburi thiab lwm pab neeg thiaj sib koom tes txog kev pab cuam zaum no. Yav tag los, cov Cheeb Koom Txoos li hais no tau mus pab cov neeg thoj nam nyob hauv lub nroog Maesod, Rakburi thiab Mae Hongson. Ua rau txhua yam pib zoo zuj zus tuaj thiab cov tub rog Thaib tau hais kom cov neeg thoj nam maj mam rov qab mus lawv teb chaws. Tab sis lawv tsis tuaj yeem rov mus tau hauv lawv tej qub zos, vim lawv ntshai tsam cov tub rog Mias Mas rov qab siv dav hlau tuaj pov hoob pob tua lawv. Ces lawv thiaj txiav txim siab nkaum nyob ntawm ciam teb. Lawv ua tsev nyob raws tus ntug dej Salawin.
Lub Cheeb Koom Txoos Chiangmai nco ntsoov txog kev ua kwv ua tij thiab tib neeg lub meej mom thaum poob nyob hauv kev kub ntxhov, ces lawv nyob twj ywm tsis tau. Txij lub 5 hlis xyoo 2022, uas yog lub Caij Plaub Caug thiaj pib muaj kev pab los ntawm Caritas, ntawm cov Txiv Plig thiab cov Leej Phauj, cov tsev kawm ntawv thiab cov tsev teev Ntuj.
Tus kws txuj Sunthorn Wongchomphon hais tias : hais txog kev pab, peb yuav xub xav txog cov neeg nyob ntawm cov yeej thoj nam sab nraud, xws li cov me nyuam, cov poj niam thiab cov laus uas lawv khiav nyob raws ciam teb thiab cov neeg muaj mob ua ntej. Lub Cheeb Koom Txoos Chiangmai tau xa txhiam xws noj mus pab rau tsoom pej xeem uas lawv tau txais kev kub ntxhov los ntawm khiav tsov rog nyob raws ciam teb. Lawv coj txhuv, pam vov chaw pua thiab tshuaj mus pab thiab tej yam pab ua kom lawv tau tsev nyob. Lawv tseem qhia txog kev ua liaj ua teb thiab kev ua lub neej yav tom ntej rau cov neeg thoj nam thiab.
Kuv tau hla mus rau sab tid thiab qhov chaw ntawd lawv hu ua lub yeej thoj nam qub. Muaj me nyuam kawm ntawv, muaj tsev rau lawv nyob, thiab thaum kuv mus tsev kawm ntawv twb qhib lawm. Tab sis tsis muaj leej twg yuav kam mus kawm ntawv nyob hauv cov tsev kawm ntawv. Peb thiaj coj cov me nyuam kawm ntawv los nyob hauv lub yeej thoj nam qub qub, vim nws yog qhov chaw tso siab thiab tsis ntshai. Nws nyob npuas tus niam dej Salawin, nyob ze Thaib teb. Qhov chaw peb nyob no cov tub rog Mias Mas tsis tso dav hlau tuaj pov hoob pob, vim nws nyob ze Thaib teb ces tsam ho raug Thaib teb. Peb tau mus pab cov me nyuam li hais no, peb nqa ntawv nqa mem thiab qhia cov me nyuam kom paub ua noj ua haus, paub pab tus kheej. Vim kev ua noj ua haus tseem ceeb heev, nws ua kom lwm tus tsis ntxhov siab thiab pab tus kheej tau. Peb qhia kom lawv xuas nplooj ntoos los ua chiv, kom pab txo kev hlawv toj thiab txhob muaj iab oo ncho. Yav tag los cov neeg thoj nam uas lawv nyob hauv lub xeev Mae Hongson tau txais kev pab kev qhia ntau yam los ntawm lub Cheeb Koom Txoos Chiangmai. Txiv Plig Boonlerk uas nws yog tus Txiv Plig nyob hauv lub tsev teev Ntuj Leej Ntshiab Paj Lug, nroog Mae Sariang hais tias : txhua txhia zaus uas muaj kev kub ntxhov nyob sab Mias Mas teb, mas lub Cheeb Koom Txoos Chiangmai xa kev pab mus rau lawv tas li. Vim nws yog tus nyob ntawm thaj chaw tso siab thiab yooj yim rau kev nrog lwm pab neeg sib txuas lus. Tswv Qhia Veera ntawm lub Cheeb Koom Txoos Chiangmai tau qhib lub Cheeb Koom Txoos ua qhov chaw tos txais kev pab cuam hauv 3 qhov chaw 3 lub nroog, xws li lub nroog Mae Sariang, lub nroog Khunyuam thiab lub xeev Mae Hongson kom ua qhov chaw txais tej txhiam xws luag pab tuaj thiab ua qhov chaw sib txuas lus nrog lwm cov neeg. Muaj cov neeg ntseeg Kav Tos Liv, cov Plos Tes Taas thiab lwm pab neeg sib koom tes pab cuam. Nyob hauv 30 xyoo dhau los no, peb tau pab ua ntu zus los txog zim txwv no.
Tus kws txuj Sunthorn hais ntxiv tias : kev pab yog tau txais los ntawm txhua pab neeg nyob hauv lub Cheeb Koom Txoos Chiangmai. Qhov txaus siab tshaj yog qhov lub Cheeb Koom Txoos Chiangmai txoj kev pab tau nthuav dav mus txog lub xeev Karen thiab lub xeev Karenni uas yog cov Pas Kas Yos qhov chaw nyob sab Mias Mas teb. Peb muaj sij hawm zaum nrog Txiv Plig Alfons Day Phe uas yog tus Txiv Plig nyob hauv lub nroog Loi Ko, lub xeev Karenni sib tham. Tab sis nyem no lawv los sib sau nyob hauv lub yeej thoj nam nyob ze ciam teb Thaib. Tam sim no nyob hauv lub nroog Loi Ko tseem muaj kev sib ntaus sib tua, ces tsoom pej xeem thiaj khiav mus nkaum nyob raws ciam teb.
Lawv tsis tuaj yeem rov mus nyob hauv lawv tej zej zog, vim cov tub rog Mias Mas tseem xij tso dav hlau tuaj pov hoob pob. Hlawv lawv tej vaj tse, hlawv cov tsev teev hawm, ces ua rau cov pej xeem thiab Txiv Plig yuav tsum khiav mus nyob raws ciam teb. Lawv ua tej lub yeej thoj nam los sis hu ua IDP Camp. Vim pab neeg thoj nam no tsis tuaj yeem khiav nkaum rau sab Thaib teb, lawv feem coob thiaj nkaum nyob hauv hav zoov thiab lawv tsis kam rov mus hauv lawv tej zej zog. Lawv ntshai cov tub rog Mias Mas rov tuaj tua thiab hlawv lawv tej vaj tse. Nyob thaj tsam ntawd kuj tsis muaj dab tsi yuav ceeb toom xwm txheej rau lawv paub.
Txiv Plig Alfons Day Phe piav txog kev txom nyem nyob hauv lub yeej thoj nam tias : tam sim no qhov peb txhawj yog ntshai tsam sib kis kab mob thiab cov me nyuam uas lawv tab tom kawm ntawv, lawv kuj tsis muaj khaub ncaws hnav, tsis muaj txhiam xws noj, tsis muaj ntawv thiab mem. Lawv nyob tau txom nyem ntsuav, vim lub yeej thoj nam tsuas yog nyob ib ntus xwb. Yam uas lawv xav tau kev pab kom sai ces muaj 4 yam, xws li txhuv noj, txhiam xws, tshuaj kho mob thiab khaub ncaws. 4 yam li hais no yog qhov tsoom pej xeem xav tau tshaj plaws. Hais txog kev kawm nyob hauv hav zoov, mas lawv xav tau txhua yam toob xib. Niaj hnub no cov me nyuam muab siab rau kawm thiab nyeem ntawv. Yog leej twg muaj dej siab xav pab txhawb nqa thiab koom tes, mas thov txuas lus rau lub Cheeb Koom Txoos Chiangmai.
Txiv Plig Alfons Day Phe piav tias : yav tag los lawv raug quab yuam, raug cov tub rog Mias Mas ntes, ua rau sawv daws tsis nyiam, hais dab tsi tsis tau thiab lawv tsis pom zoo txog kev kav teb chaws ntawm cov tub rog. Txiv Plig thiaj txiav txim siab nyob nrog tsoom pej xeem yog qhov zoo dua. Tam sim no peb vam thiab cia siab tias yav tom ntej yuav muaj kev faib ciam dej ciam av, kom nyias tau kav nyias haiv neeg thiab tus kheej tiag tiag. Nyob hauv Loi Ko muaj ntau txoj kev teev hawm, xws li Phus Thas, kev ntseeg thiab lwm yam. Tab sis ntawm peb cov Kav Tos Liv tam sim no, mas yog sib koom thov Ntuj pub kev thaj yeeb ib hlis ib zaug. Lwm txoj kev teev hawm los peb kuj pab ib yam nkaus. Peb pab txhiam xws noj rau lawv thiab thov kom sawv daws muaj kev ywj pheej ua ke. Txoj kev hlub neeg, yog qhov peb txhib thiab hais txog tas mus li. Leej twg yog tus txheeb ze peb, niaj hnub no peb tsis yog hais txog cov nyob ze peb xwb, peb yog hais tas nrho cov teb chaws nyob sib npuab ciam teb huv si. Kev ua neeg nyob ntawm txhua tus neeg, ua rau peb ntsia pom qhov sib txawv. Yog qhov tias ua cas lub teb chaws sab tid lawv ntsia tsis pom cov neeg thoj nam txoj kev ua neeg. Peb nyob Thaib teb, yuav nug tias peb puas tau zoo nyob ? Peb yeej tau zoo nyob dua lawv. Qee zaus lwm tus txoj kev txom nyem peb ntsia tsis pom. Lub sij hawm no peb qi muag tau, vim nws yog kev sib pom dej siab nyob hauv qhov peb ua tawm. Tab txawm pab tau tsis ntau thiab pab tau tsis tas txhua yam, tab sis peb kuj xav ua raws li qhov peb ua tau thiab peb yuav tsis nkim zog rau qhov peb tau pab neeg. Tab txawm yog tej pab neeg tsawg tsawg, tsis kav peb pab raws li peb pab tau. Cov neeg pab peb feem ntau kuj yog cov neeg txom nyem, tab sis peb tau txais kev pab los ntawm lawv lub dej siab. Tej yam no ua rau peb nco txog Vaj Qhia Fas Ntshis Kus cov lus hais nyob hauv cov neeg thoj nam hnub nyob ntiaj teb zaum 108.
Xyoo 2022 Vaj Qhia tau txhib hais tias : “Li ntawd, yuav tsis muaj kev txiav ib tug twg tawm hauv zej zog mus. Tswv Ntuj lub hom phiaj yog saib cov neeg pluag txom nyem yog qhov tseem ceeb. Vim nyob hauv cov neeg ntawd muaj cov neeg thoj nam thiab muaj cov poob hauv txoj kev kub ntxhov los ntawm kev ua luam neeg. Tswv Ntuj lub Ceeb Tsheej yog nyob hauv lawv. Yog tsis muaj lawv, yuav tsis muaj qhov chaw ua Tswv Ntuj lub Ceeb Tsheej raws li Tswv Ntuj lub hom phiaj. Kev sib sau cov neeg pluag txom nyem los nyob ua ke, yog sau Tswv Ntuj cov neeg los nyob hauv Tswv Ntuj lub Ceeb Tsheej.”
