Kwv tij Hmoob, ua ntej peb yuav los saib tias peb Hmoob cov kab lis kev cai twg thiaj siv tau rau txoj kev ntseeg Ntuj, mas peb tsum paub ua ntej tso tias kev ntseeg Ntuj thiab peb Hmoob txoj kev teev dab qhuas zoo li cas tso.
‘KEV NTSEEG’ yog kev lees tias yam uas neeg soj ntsuam tsis tau ntsuas tsis tau thiab txhawb fawb tsis tau ntawd, yog yam muaj tseeb tiag.
Raws txoj kev teev hawm Tswv Ntuj mas Koom Txoos Kav Tos Liv teeb tias ‘kev ntseeg yog peb muab tas lub tswv yim thiab tas siab tas ntsws cev rau Tswv Ntuj thiab yeem ua raws Tswv Ntuj Lo Lus hais rau peb.’
Li ntawd, kev ntseeg thiaj yog ib qhov kev paub thiab kev tso siab li no:
1. kev ntseeg yog Tswv Ntuj lub txiaj ntsim tseeb tiag uas neeg txais tau thaum neeg muab siab tiag los thov.
2. kev ntseeg yog lub hwj chim loj tas nrho uas cawm neeg tau.
3. kev ntseeg ua rau neeg lub siab twj lij thiab thoob tsib.
4. kev ntseeg pab kom neeg tso siab lug rau lawv txoj sia.
5. kev ntseeg yuav txawm tau nyob hauv kev sib nyiam sib hlub.
6. kev ntseeg loj hlob taus nyob hauv kev mloog Tswv Ntuj Lo Lus thiab kev thov Ntuj.
7. kev ntseeg ua kom neeg tau saj Ntuj Ceeb Tsheej kev xyiv fab nyob hauv ntiaj teb no.
Yog li cov ntseeg Kav Tos Liv ntseeg txog dab tsi? Nyob hauv zaj lees ntseeg hais tias:
“Kuv ntseeg txog Tswv Ntuj, yog Leej Txiv muaj hwj huam tas nrho, yog tus tsim ntuj tsim teb.
Kuv ntseeg txog Yes Xus Pleev, yog Tswv Ntuj Leej Tub twm zeej, yog peb tus Huab Tais.
Leej Ntuj Plig Ntshiab ua kom nws xeeb los ua neeg. Nws yug ntawm Nkauj Ntshiab Mab Liab los.
Lub caij Pis Las Tos ua nom, Yes Xus raug luag hiam thiab ntsia saum ntoo cuam.
Nws tuag mus zwm av, mus txog ntuj txias teb tsaus. Hnub peb, Yes Xus sawv hauv cov tub tuag rov los.
Nws nce mus lawm saum ntuj, zaum ntawm Leej Txiv phab xis.
Nws yuav rov los txiav txim rau cov neeg ciaj neeg tuag.
Kuv ntseeg txog Leej Ntuj Plig Ntshiab.
tseeg txog lub Koom Txoos Ntshiab cia rau lub qab ntuj neeg. Ntseeg txog tsoom Leej Ntshiab sib koom Ntuj lub Txiaj Ntsim.
Ntseeg txog kev daws txhaum.
Ntseeg txog leej neeg lub cev kev sawv rov los.
Ntseeg txog muaj Txoj Sia nyob mus li.
Ua li.”
Zaj no qhia tias cov Kav Tos Liv ntseeg txog Leej Txiv Tswv Ntuj, ntseeg txog Leej Tub Yes Xus, ntseeg txog Leej Ntuj Plig Ntshiab, ntseeg txog lub Koom Txoos thiab tsoom Leej Ntshiab, ntseeg txog kev daws txhaum, ntseeg txog kev tuag sawv rov los, ntseeg txog kev txiav txim thiab ntseeg txog txoj sia nyob mus li.
Hais txog Hmoob txoj kev ntseeg muaj feem los ntawm txoj kev teev hawm, kev ua hwj huam yeev ntxwv, kev dab kev qhua thiab Hmoob cov keeb kwm. Hmoob hais tias ntseeg ‘DAB QHUAS’.
Lo tias ‘DAB’ txhais tias “Qhov muag pom tsis tau, tab sis lub siab thiab lub tswv yim xav tau tias yeej muaj ib yam zoo li ntawd tiag.” (LTH. Lauj Vam Thaiv) Yog li Hmoob lo lus ‘DAB’ thiaj yog lo lus hais rau 2 yam: ‘tej ntsuj tej plig’ thiab ‘vij sub vij sw’.
Hmoob tseem siv lo ‘DAB’ los hais rau tej txheeb ze los yog tej neeg nruab zej zog uas tsis paub npe thiab. (XH. Yaj Zoov Ntxheb)
Lo lus ‘QHUAS’ yog los ntawm lo tias ‘QHUA’ uas muaj 2 lub ntsiab. Lub ntsiab tim ib, yog hais txog tus uas yus paub txog thiab hu lawv tuaj. (XH. Yaj Zoov Ntxheb) Lub ntsiab tim ob, mas lo ‘Qhua’ yog ib lo lus Hmoob siv los quas Hmoob lub xeem los yog pab pawg. Xib Hwb Yaj Zoov Ntxheb hais tias lo lus ‘Qhua’ los ntawm poj niam sab los. (Zoo Tswv Zov Yaj)
Yog li ‘DAB QHUA’ los ‘DAB QHUAS’ thiaj yog hais txog pab pawg neeg ntawd cov neeg txheeb ze lawv paub thiab tsis paub txog uas tau tso ntiaj teb no tseg lawm, los yog hais tau tias ‘POJ YAWM TXWV KOOB’.
Dhau ntawm kev teev poj yawm txwv koob lawm, Hmoob kuj teev Huab Tais Tswv Ntuj thiab, tiam sis Hmoob lo lus mas yog hais tias ‘DAB XEEB TEB XEEB CHAW’, vim Huab Tais Tswv Ntuj yog tus tsim ntuj tsim teb, tsim tas ib puas tsav yam hauv lub sim ceeb. (HP1:1-31)
Thaum Hmoob ntsib xwv txheej ces Hmoob hu dab niam dab txiv, dab pog dab yawm los pov hwm. Hmoob fiv ib lub yeem rau kom zoo ces Hmoob yuav pauj rau. Yog tias muaj mob muaj nkees mas Hmoob hais tias dab los looj koov ces thiaj tsum tau teev tau tiam rau. Ua mus ua lo ces thiaj txia ua Hmoob txoj kev teev ‘DAB QHUAS’.
Vim kev teev dab qhuas muaj ntau yam kev ntseeg tsis mus raws txoj kev ntseeg Ntuj ces thaum ib tug neeg twg txiav siab los ntseeg Ntuj mas thiaj tsum tau tso txoj kev teev dab qhuas pov tseg. Tiam sis yam twg yog haum rau txoj kev ntseeg mas Koom Txoos Kav Tos Liv thiaj kom txuag cia tab sis muab hloov kom haum rau txoj kev ntseeg raws li Huab Tais Yes Xus tau hais tias “Nej txhob xav tias kuv tuaj rhuav Txoj Cai thiab cov Yaj Saub. Kuv tsis tuaj rhuav, kuv tuaj qhia ntxiv kom thoob.” (MT5:17)
Vam txog: - บาทหลวงวุฒิเลิศ แห่ล้อม (2012). หลักคำสอนคาทอลิก
- Kou Yang. Commentary: Challenges and Complexity in the Re-Construction of Hmong History. Hmong studies Journal
- LTH. Lauj Vam Thaiv. UA NEEG NTSEEG MUS RAWS KEV TSEEM CEEB
- TP. Nyiaj Pov. KOOM TXOOS KAV TOS LIV KEV NTSEEG LUB NTSIAB
- TP. Nyiaj Pov, Paj Vaj, Yaj Txhiaj Vwj thiab cov lis dej num. NTAWV NTSHIAB 2002
- XH. Yaj Zoov Ntxheb. HMOOB COV DAB QHUAS
- Zoo Tswv Zov Yaj. HMOOB LUB XEEM
- www.khamsonbkk.com
