Cov Hmoob nyob Suav teb ntseeg tias neeg lub neej yog zoo li tej xyoob ntoo txawj yug, txawj mob thiab txawj tuag
Hnub tim 16 lub 6 hli tas los no, lub tsev vas South China Morning Post tso cov lus tawm txog cov Hmoob nyob Suav teb txoj kev ntseeg tias cov Hmoob nyob Suav teb ntseeg tias xyoob ntoo yog lub cim qhia txog neeg txoj sia yog li mas Hmoob thiaj muaj cov kab ke teev hawm xyoob ntoo nyob hauv Hmoob lub neej.
Zim txwv no muaj tshaj 10 plhom leej neeg Hmoob nyob thoob Suav qab teb. Lawv lub neej fab ntsuj plig yog sib haum xeeb nrog tej xyoob ntoo. Lawv pom tias xyoob ntoo yog lub cim ntawm tib neeg txoj sia thiab poj yawm txwv koob. Raws cov Hmoob hais mas neeg txoj sia yog tshwm sim los ntawm tsob ntoo Maple uas tus niam npauj npaim yug los. Tus niam npauj npaim nteg 12 lub qe thiab muaj ib lub qe daug tau tib neeg.
Ntoo yog qhov tseem ceeb hauv zej zog kev ua lub neej. Lub caij dhiav seev cev cav txog paj ntoos quas lub niaj lub xyoo, mas cov neeg yuav dhia seev cev ncig tsob paj ntoos uas lawv npaj tseg mus txog cov kab ke qhia txog kev yug los, kev mob thiab kev tuag. Hauv lub zos Biasha uas yog ib lub zos Hmoob nyob hauv lub xeev Kim Tsawb, mas lawv ntseeg tias txhua tus neeg muaj qhov sib txuas nrog 3 hom ntoo, xws li tsob ntoo loj uas ntov los ua hleb, tsob ntoo loj uas hwm cia ua qhov chaw thov thaum muaj mob los yog ntsib kev txom nyem, thiab tej nroj tsuag ntsuab xiab tas niaj tas xyoo uas cog nyob saum lub ntxa, tej no yog lub cim qhia txog kev muaj txoj sia nyob mus li hauv lub ntiaj teb no.
Cov neeg hauv zej zog no, lawv nyias txuag nyias tej xyoob ntoo zoo kawg. Cov neeg uas lawv nyiag ntov ntoo yam tsis tau txais lus tso cai, mas yuav raug cog ntoo pauj ob npaug. Cov ceg ntoo uas raug txiav yuav tsum nqa pov tseg, kom txhob muaj neeg ntov ntoo ntxiv.
Kev hwm xyoob ntoo yog lub cim hauv Hmoob tej kab lis kev cai uas qhia txog qhov ntseeg tias neeg txoj sia thiab tej xyoob ntoo yog yam sib txuas ua ke thiab cais tsis tau. Cov kab ke no tseem ua kom pom txog kev hwm xyoob ntoo ntawm cov neeg Suav txheej thaud meej kawg. Yog ib qho kev xav uas txhawb kom ib tsoom neeg tig los cog xyoob ntoo, kom tau daws tej kev nyuab siab thiab rov sib haum xeeb nrog xyoob ntoo dua.
