Pob Zeb nyob ntawm no : 400 xyoo ntawm lub tuam tsev teev Ntuj hwm Leej Ntshiab Pob Zeb.

Pob Zeb nyob ntawm no : 400 xyoo ntawm lub tuam tsev teev Ntuj hwm Leej Ntshiab Pob Zeb.

400 xyoo dhau mus lawm, suav txij hnub txhim tsa lub tuam tsev teev Ntuj hwm Leej Ntshiab Pob Zeb nyob Los Mas. Kom tau nco txog tej xwm txheej tseem ceeb no.

Vas Tis Kas tau pib ntau yam hauj lwm tseem ceeb kawg.

Txwm 400 xyoo lawm, suav txij hnub txhim tsa lub tuam tsev teev Ntuj hwm Leej Ntshiab Pob Zeb nyob Los Mas.

Kom tau tsuj xeeb txwm 400 xyoo no, Vas Tis Kas thiaj pib ntau yam hauj lwm tseem ceeb. Muaj kev kho lub tsev dua tshiab kom yooj yim rau cov neeg tuaj tsham tau nkag mus saib. Tej chaw uas muab kaw tseg thiab txwv tsis pub neeg nkag mus saib yav tag los, tam sim no rov qab qhib dua ib zaug. Tej qab khav kho kom dav tuaj thiab rov qhib dua ib txoj kev tawm rooj fiv ntuj tshiab. Yuav soj ntsuam txog Leej Ntshiab Pob Zeb thiab Leej Ntshiab Paj Lug lub neej tau nyob hauv Los Mas. Cov hauj lwm nco txog no pib nyob hauv hnub tim 20 lub 2 hlis, thiab yuav xaus rau hnub tim 18 lub 11 hlis xyoo no. Hauv lub thaj txi Ntuj ntshiab yog Vaj Qhia Leo 14 ua tus coj lub Txoos.

Lub thaj txi Ntuj yog thaj txi Ntuj loj thiab txawv dua txhua lub hmoov tsuj xeeb. Muaj ib kab lus luv luv nyob hauv hnub tseem ceeb txwm xyoo no, yog qhov tias :

“Pob Zeb nyob ntawm no.”

Pob Zeb kuj zoo ib yam li peb.

Hauv phau ntawv muaj lub npe tias : “Pob Zeb, tus txiv neej hauv nthwv cua.”

Roberto Benigni uas yog ib tug neeg Is Tas Lias. Nws yog ib tug tub ua yeeb yam, yog kws sau ntawv thiab yog thawj coj saib kev ua yeeb yam. Nws tau ua kom pom txog Pob Zeb txoj kev ua neeg. Nws sau tias : “Pob Zeb kuj zoo ib yam li peb. Nws txawj chim, txawj ua ywj siab, txawj ua yuam kev, txawj nkag siab yuam kev, txawj quaj, txawj luag, txawj pw tsaug zog, txawj ntxhov siab, txawj zoo siab thiab cia tus kheej raug kev ntxhov siab.”

Lo lus nug uas tseem ceeb.

Tom qab kev sawv rov los, Yes Xus tsis tau kom Pob Zeb piav txog nws txoj kev piam sij. Tab sis Yes Xus nug nws tias  : “Koj puas nyiam kuv ?”

Lo lus nug nyob hauv ntawv Moo Zoo no, nrov mus thoob cov liv xwm. Tsis yog qhov tias : “koj puas tau piam sij dua ? Tab sis yog qhov tias : “koj puas nyiam kuv ?”

Nov yog qhov laij thawj uas Pob Zeb tshwj xeeb tshaj nyob hauv lub Caij Plaub Caug. Lub Caij Plaub Caug ua kom pom txog nws kev ua lub neej: nws piam sij, nws quaj, nws tos, nws tau txais kev zam txim thiab raug xa rov mus dua.

Nov yog lub ntsiab lus tob dua kev tsuj xeeb txwm 400 xyoo. Tsis yog tias nco txog  hnub tseem ceeb nyob hauv liv xwm xwb, tab sis yog kev coj “yam pub txoj sia thiab kev cia siab rov los rau lub siab.”

Cov lus ntawm lub Caij Plaug Caug hauv xyoo tsuj xeeb.

4 tiam neeg tom qab txhim tsa lub tuam tsev teev Ntuj hwm Leej Ntshiab Pob Zeb. Lub tuam tsev teev Ntuj no, tseem ua qhov chaw tos txais cov neeg tawm rooj fiv ntuj nyob thoob ntiaj teb thiab. Hauv qab daim txiag zeb muaj kub ntawd, yog qhov chaw faus tus txiv neej uas tau ntshai ib zaug nyob hauv lub neej, tab sis tom qab no nws sawv ntseg thiab ruaj nreb hauv txoj kev ntseeg.

Cov lus ntawd luv luv, tab sis tob kawg. “Tswv Ntuj txhim nws lub Koom Txoos, tsis yog txhim nyob ntawm ib tus neeg zoo txhij zoo txhua, tab sis yog txhim nyob hauv lub siab uas tau txais kev zam txim.” Hauv lub Caij Plaub Caug no, cov lus hauv lub qab thaj txi Ntuj rov hais dua ib zaug tias : “Pob Zeb nyob ntawm no.”

Pob Zeb nyob ntawm no, tsis hais leej twg yuav ntog thiab rov sawv.

Pob Zeb nyob ntawm no, tsis hais leej twg yuav quaj thiab rov pib dua tshiab.

Pob Zeb nyob ntawm no, tsis hais leej twg yuav qaug zog, tsis kav kuj tuaj yeem hais tau tias : “Kuv tus Tswv Ntuj, koj yeej paub tias kuv nyiam koj.”