ZAJ NYEEM HNUB TIM 8 LUB 8 HLI 2024
HNUB NCO TXOG LEEJ NTSHIAB DOS MIS NIS
COV LUS NYOB HAUV MAS TAIS NTAWV MOO ZOO (MT 16: 13-23)
Kwv tij Hmoob sawv daws, Huab Tais Yes Xus ncig teb chaws,nws kho cov neeg mob kom zoo, kho cov dig muag kom rov pom kev, kho cov tuag ceg kom rov mus taus kev; mas zeej tsoom pib cav ntsuag qees tias Huab Tais Yes Xus yog ib tug Yaj Saub. Hnub no Huab Tais Yes Xus thiaj nug cov thwj tim tias lawv xav tias nws yog leej twg.
Pob Zeb teb tias raws li nws xav mas Huab Tais Yes Xus yog Leej Pleev, yog tus Tswv Ntuj muaj txoj sia Leej Tub.
Kwv tij Hmoob, cov Yus Das lawv hais tias ‘Leej Pleev’ yog tus Tswv Ntuj xa tuaj cawm lawv haiv neeg ntawm cov Los Mas, yuav coj cov Yus Das sawv ua ib haiv neeg twj lij nyob hauv lub ntiaj teb. Cov thwj tim los lawv puav leej xav li ntawd, lawv raws Huab Tais Yes Xus vim lawv xav ntxeev lub teb chaws, lawv xav ntiab cov Los Mas kom tawm hauv lub teb chaws mus. Thaum lawv txeeb tau lub teb chaws lawd, lawv xav tias Huab Tais Yes Xus yuav ua tus vaj His Xas Lais, lawv sawv daws yuav tau ua cov tub ncig sawv nyob sab xis thiab sab laug.
Lawv xav li ntawd, tab sis ntawm Huab Tais Yes Xus mas tsis yog li lawv xav.
Kwv tij Hmoob, peb txhob xav tswv yim xws li cov thwj tim tab tom xav. Peb yuav kawm kom paub Huab Tais Yes Xus zoo, to taub Huab Tais Yes Xus lub siab, mas peb thiaj yuav tsis coj lwm tus mus yuam kev.
Hnub no, peb tseem hnov Huab Tais Yes Xus hais rau Pob Zeb tias “Kuv yuav txhim kuv kub Koom Txoos rau zaum lub pob zeb no. Dab phem tej qhov rooj yuav tiv tsis tau lub pob zeb no.”
Lub pob zeb Huab Tais Yes Xus hais txog yog dab tsi? Yog tus Hauv Paus Xa Lus Pob Zeb uas mloog Huab Tais Tswv Ntuj tshoj nws lub siab.
Tos peb hais li ntawd, vim tias thaum Pob Zeb hnov Huab Tais Yes Xus hais ib zaug ntxiv txog nws txoj kev raug tsim txom nyob pem Yes Lus Xas Les mas Pob Zeb tiv Huab Tais Yes Xus tsis pub kom Huab Tais Yes Xus mus pem Yes Lus Xas Les. Pob Zeb ntshai tsam Huab Tais Yes Xus ua cas ces nws yuav tsis tau ua ib tug tub ncig li nws xav.
Kwv tij Hmoob sawv daws, hnub no peb yog ib tug neeg ntseeg mas peb yuav ua tib zoo txhob cia dab phem txoj kev ntxias tuaj ntxias tau peb lub siab kom ntxeev, peb yuav nquag thov Huab Tais Tswv Ntuj pab peb ua siab ruaj nreb thiab to taub txog Huab Tais Yes Xus kom zoo dua tuaj, mas peb thiaj tsis yuam kev nyob hauv txoj kev ntseeg mog.
