ZAJ NYEEM HNUB TIM 7 LUB 8 HLI 2024
HNUB NCO TXOG LEEJ NTSHIAB VAJ QHIA XIS TUS TIM 2
COV LUS NYOB HAUV MAS TAIS NTAWV MOO ZOO (MT 15: 21-28)
Kwv tij Hmoob sawv daws, lub Moo Zoo hnub no piav tias Huab Tais Yes Xus lawv mus rau Tws Los thiab Xis Doos teb. Cov neeg nyob txawm hauv ob lub teb chaws no yog pej kum neeg, lawv tsis ntseeg txog Tswv Ntuj xws li cov Yus Das, lawv teev lawv cov dab. Tab sis nyaj lawv yuav hnov zej zos cav txog Huab Tais Yes Xus lub koob meej, mas thaum Huab Tais Yes Xus lawv mus txog, tus poj niam Kas Nas Has thiaj tuaj thov Huab Tais Yes Xus cawm nws tus ntxhais.
Qhov peb yuav muab coj los xav hauv hnub no tsis yog qhov tias ua cas Huab Tais Yes Xus thiaj tsis kam pab tus poj niam Kas Nas Has, tab sis qhov peb yuav xav txog mas yog qhov tias ua cas Huab Tais Yes Xus thiaj hais rau tus poj niam Kas Nas Has no tias “Niam phauj, koj lub siab ntseeg loj kawg. Kom koj tau raws li koj lub siab xav.”
Tus poj niam no pom Huab Tais Yes Xus mas nws qw nrov nrov caum Huab Tais Yes Xus tias ‘Huab Tais, Das Vis Leej Tub, thov koj khuv leej kuv.”
Lo lus tias ‘Das Vis Leej Tub’ mas yog lo lus cov Yus Das hais txog tus ‘Mes Xias’ los yog tus ‘Pleev’ los yog tus ‘Cawm Seej’ yuav tau cawm haiv His Xas Lais.
Tus poj niam Kas Nas Has hu Huab Tais Yes Xus ua Das Vis Leej Tub mas yog nws ntseeg tias Huab Tais Yes Xus yog Leej Pleev, yog tus yuav tuaj cawm haiv His Xas Lais, tsis yog cawm cov Kas Nas Has.
Kwv tij Hmoob, kom nej nco tias cov Kas Nas Has thiab cov His Xas Lais los yog cov Yus Das mas lawv ib txwm ua yeeb ncuab sib ntaus sib tua txeeb lub teb chaws. Ib yam li niaj hnub no cov His Xas Lais thiab cov Pas Les Tis Nas.
Tus poj niam no mus thov kom nws cov yeeb ncuab pab cawm nws tus me nyuam! Nws ntseeg tias tus yeeb ncuab nws mus thov ntawd yuav pab nws!
Txawm tias Huab Tais Yes Xus xyeej nws thiab muab nws piv rau ib tug dev, tsis kav nws tsis chim tsis npau taws. Nws ua tiag thov thiab lees tias “Huab Tais, yog li koj hais. Cov me nyuam dev tsuas noj tej tsig mov txeej ntawm lawv tus tswv lub rooj los xwb.”
Tus poj niam Kas Nas Has lo lus no txhais tau tias nws lees tias nws tsis tsim nyog yuav tau kev cawm ntawm ib tug Yus Das tab sis nws tso siab tias tus Yus Das muaj lub siab hlub neeg yuav pab nws.
Huab Tais Yes Xus pom nws lub siab ntseeg li ntawd, mas Huab Tais Yes Xus thiaj hais tias “Kom koj tau raws li koj lub siab xav.”
Kwv tij Hmoob, hnub no thov kom peb sawv daws ua zoo li tus poj niam Kas Nas Has no, peb ua tiag thov thiab tso siab tias Huab Tais Tswv Ntuj yuav mloog, mas muaj ib hnub Huab Tais Tswv Ntuj yuav pub rau peb raws li peb lub siab ntseeg.
