ZAJ NYEEM HNUB TIM 7 LUB 7 HLI 2025
HNUB OB, LIS PIAM 14 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 9: 18-26)
Kwv tij Hmoob sawv daws, lub Moo Zoo hauv hnub no muaj 2 xwm tshwm tuaj.
Yam xwm tim ib; yog tus poj niam tsob ntshav ntseeg tias Huab Tais Yes Xus muaj hwj huam kho tau nws tus mob, tab yog nws kov Huab Tais Yes Xus tw tsho xwb los nws yuav zoo, ces nws tau raws li nws lub siab ntseeg.
Yam xwm tim ob; yog tus nom tswj lub tsev txoos tso siab tias Huab Tais Yes Xus muaj cawm tau nws tus ntxhais nyuam qhuav tuag, ces nws tuaj thov Huab Tais Yes Xus mus tsa tus ntxhais, nws tso siab ces nws tus ntxhais ciaj rov los.
Nyob hauv Mais Xes txoj cai qhia tias cov poj niam tsob ntshav yog cov neeg tsis huv, nws tsum tsis txhob nyob xyaw sawv daws, thiab nws tsis txhob kov los chwv tus twg, tsam nws ua rau tus ntawd tsis huv. Ntawm tsoom sid, mas tsis txhob kov cov neeg tsob ntshav tib yam, kom xwv tus neeg tsob ntshav qhov tsis huv thiab tsis tsuas rau yus.
Tus poj niam tsob ntshav, nws paub ntsoov tias nws tsis tsim nyog yuav thov Huab Tais Yes Xus pab nws, los kov Huab Tais Yes Xus, ces nws thiaj xav tias cia nws kov lub tw tshob xwb ces txaus lawm. Nws tso siab rau yam nws ntseeg txog; qhov no yog nws lub siab ntseeg.
Thaum Huab Tais Yes Xus pom tus poj niam tsob ntshav kov nws lub tw tsho, Huab Tais Yes Xus tsis ntxub, tsis cem, thiab tsis ua txuj tsis pom nws; tab sis Huab Tais Yes Xus hlub nws thiab qhuas nws, mas Huab Tais Yes Xus thiaj hais rau nws tias “Phauj, koj tso siab mog! Koj lub siab ntseeg cawm koj lawm.”
Ntawm tus nom, mas nws yog tus tswj lub tsev txoos, nws yeej ib txwm tau kawm thiab paub tias cov Yaj Saub tau hais tseg tias muaj ib hnub Huab Tais Tswv Ntuj yuav xa tus Pleev tuaj cawm haiv His Xas Lais. Tus Pleev txoj hauj lwm yog ua kom cov ceg tawv mus taus kev, cov dig muag rov pom kev, cov mob ruas rov huv, cov lag ntseg hnov lus, cov tuag sawv rov los. Nws paub li ntawd, ces thaum nws hnov zeej tsoom cav txog Huab Tais Yes Xus mas nws mem tau tias Huab Tais Yes Xus yog tus Pleev tiag, nws ntseeg li ntawd; nws tso siab tias Huab Tais Yes Xus tsa tau nws tus ntxhais tuag lawm kom rov ciaj.
Nyob hauv Mais Xes txoj cai kuj tseem qhia tias tus tug kov tus tuag, tus ntawd kuj yuav tsis huv. Tab sis Huab Tais Yes Xus tuav nws ntxhais tuag txhais tes, ces nws cia li sawv rov los.
Cov kwv tij, txoj cai hais tias tsis txhob cia tus neeg tsis huv kov koj, tsam koj tsis huv ib yam li nws. Txoj cai hais tias koj tsis txhob kov tus neeg tsis huv, mas koj thiaj yuav ntshiab. Huab Tais Yes Xus hlub neeg, nws tsis muab neeg txoj cai los ua chaw xyeej kom txhob tau ua cov hauj lwm pab cov neeg txom nyem.
Ob yam xwm hauv zaj Ntawv Moo Zoo hnub no, peb thiaj pom txog 3 tug yeeb yam zoo rau peb khaws thiab yoog raws.
Tus yeeb yam ib; yog tus tsob ntshav tus yeeb yam. Nws ras tias nws yog ib tug neeg tsis phim yuav tau txais kev cawm ntawm Huab Tais Yes Xus, tab sis nws ntseeg tias Huab Tais Yes Xus muaj hwj chim kho tau nws, ces nws thiaj tuaj nrhiav Huab Tais Yes Xus kom tau kov lub tw tsho. Nws ua neeg me thiab ntseeg txog Huab Tais Yes Xus tiag. Peb yuav ua neeg me thiab ntseeg xws li nws.
Tus yeeb yam ob; yog tus nom tus yeeb yam. Nws yog ib tug nom paub Ntawv Ntshiab thiab xav txog cov Yaj Saub tej lus tsis tseg, ces nws hnov luag hais txog Huab Tais Yes Xus, mas nws ntseeg tias Huab Tais Yes Xus yog tus Pleev cov Yaj Saub hais txog, nws tso siab rau Huab Tais Yes Xus. Nws yog ib tus nom tab sis nws yeem ua tus me tuaj txhos caug thov Huab Tais mus tsa nws tus ntxhais. Peb yuav nyiam twm Tswv Ntuj cov lus hauv Ntawv Ntshiab thiab tso siab rau tus Huab Tais peb ntseeg.
Tus yeeb yam tim peb; yog Huab Tais Yes Xus tus yeeb yam hlub cov neeg txom nyem, nws nco txog cov neeg tuaj vam tuaj khaub zig nws, txawm tias lawv tsis tau tsa suab thov los nws kuj zoo siab pab. Huab Tais Yes Xus saib txoj kev ua cov hauj lwm pab cov neeg txom nyem loj dua neeg txoj cai. Peb yuav tsis txhob muab qhov ub qhov no los ua chaw xyeej kom peb tsis txhob tau nqes tes pab cov neeg tuaj vam txog peb, peb yuav hlub txhua tus neeg peb ntsib hauv peb kev ua neej.
Nyob zoo.
