ZAJ NYEEM HNUB TIM 6 LUB 6 HLI 2025
HNUB NCO TXOG LEEJ NTSHIAB NOS NPAWS
COV LUS NYOB HAUV ZAM NTAWV MOO ZOO (Z 21: 15-19)
Kwv tij Hmoob sawv daws, ob tug neeg thaum nkawd hais tsis haum, nkawd sib cav, nkawd sib ntxub; mas nkawd puas yuav rog sib raug zoo tau. Raws li peb xav mas ntshai yuav pua tau lawm. Tab sis nyob ntawm Tswv Ntuj, mas nkawd rov sib raug zoo, rov sib nyiam sib hlub li qhov qub tau. Peb pom nyob hauv lub Moo Zoo hnub no.
Hmo lawv ntes Huab Tais Yes Xus, Xis Moos Pob Zeb ntshai ces nws hais rau cov nug nws tias nws tsis paub Huab Tais Yes Xus. Pob Zeb tsis lees Huab Tais Yes Xus 3 zaug. Nyob hauv cov Yus Das yog koj hais lo lus twg txog 3 zaug mas txhais tias koj yeej hais tuag nthi tias koj yuav li lo lus koj tau hais ntawd tiag, yog li mas Xis Moos Pob Zeb hais 3 lwm tias nws tsis paub Huab Tais Yes Xus, mas yog nws yeej twv ntuj twv teb hais rau cov nug nws tias ciaj los tuag nws yeej tsis paub Huab Tais Yes Xus.
Kwv tij, thaum koj raug teeb mee, koj tus phooj ywg yeej tsis lees paub koj npaum li Xis Moos Pob Zeb, mas puas yuav txaus chim thiab txaus tu siab! Ntshai koj yuav hais tias txij no mus kuv thiab nws wb kev phoojo ywg ces tsuas xaus li no xwb.
Xis Moos Pob Zeb hnov qaib lub suab qua, ces nws nco dheev tias Huab Tais Yes Xus twb xub tau hais tej ntawd rau nws lawm; Xis Moos Pob Zeb ras tau tias nws ua txhaum loj kawg, ces nws tu siab.
Hnub no, Xis Moos Pob Zeb rov pom Huab Tais Yes Xus dua, nws rov tau nrog Huab Tais Yes Xus nyob ib cag xws li hauv hmo lawv noj pluas Hla. Nyob hauv hmo ntawd, Xis Moos Pob Zeb hais rau Huab Tais Yes Xus tias “Huab Tais, kuv tuaj yeem siv kuv txoj sia rau koj.” Hnub no Huab Tais Yes Xus hais rau Pob Zeb tias “Koj puas nyiam kuv tiag.”
Huab Tais Yes Xus cov lus tsis yog vim nws chim, npau taws, los tu siab rau Xis Moos Pob Zeb. Tab sis Huab Tais Yes Xus xav paub tias Xis Moos Pob Zeb puas tseem ruaj siab rau nws lo lus tau hais nyob hauv hmo lawv noj pluas Hla, Xis Moos Pob Zeb lub siab nyiam puas yuav ruaj nreb xws li lub npe Huab Tais Yes Xus xub tau tis rau nws tias ‘Pob Zeb’.
Huab Tais Yes Xus nug 3 lwm kom Xis Moos Pob Zeb teb 3 lwm, yog kom Xis Moos Pob Zeb lees tuag nthi tias nws tseem nyiam thiab yeem muab tas nws txoj sia pub rau Huab Tais Yes Xus tiag.
Kwv tij Hmoob, lub caij Hla xyoo no tab tom yuav dhau, xav kom Huab Tais Yes Xus lo lus nug Xis Moos Pob Zeb hnub no yog tab tom nug peb, saib peb puas nyiam Huab Tais Yes Xus tiag. Yog peb teb tias peb nyiam tiag, mas xav kom ob hnub no peb muab ua tib zoo xav saib tshuav tus neeg twg peb tseem chim rau, npau taws rau, muaj lus tsis sib haum rau; mas peb zam rau nws, ua siab dav rau, nrog nws tsim kev sib nyiam. Thiaj tsim nyog lo lus peb hais rau Huab Tais Yes Xus tias “Huab Tais, kuv nyiam koj tiag.” Nyob zoo.
