ZAJ NYEEM HNUB TIM 4 LUB 6 HLI 2025
HNUB PLAUB, LIS PIAM 7 CAIJ HLA
COV LUS NYOB HAUV ZAM NTAWV MOO ZOO (Z 17: 11-19)
Kwv tij Hmoob, nyob hauv zaj Ntawv Moo Zoo hnub no, peb rov hnov Huab Tais Yes Xus cov lus thov Ntuj rau cov thwj tim, thov Huab Tais Leej Txiv txuag lawv ntawm tus phem ntxias neeg mus poob rau kev phem, ntxias lawv kom koom ua ib tug tsis tau. Nyob hauv zaj thov Ntuj no Huab Tais Yes Xus kuj qhia peb tias Huab Tais Tswv Ntuj yog tus zov sawv daws, Huab Tais Tswv Ntuj yuav tsis rho lawv tawm hauv lub qab ntuj tab sis Huab Tais Tswv Ntuj yuav pab lawv kom yeej lub qab ntuj.
Kwv tij Hmoob sawv daws, muaj ib yam rub tau sawv daws kom los koom ib lub siab ib lub tswv yim; yam ntawd yog kev sis nyiam sis hlub. Qhov twg muaj kev sis nyiam sis hlub mas Tswv Ntuj tuaj nyob qhov ntawd. Yog peb cov neeg ntseeg peb sib tawg, peb sib cais, peb tsis sib nyiam mas peb yuav hais tsis tau tias peb muaj Tswv Ntuj nrog peb nyob. Yog vim li no, niaj hnub no lub Koom Txoos Kav Tos Liv thiaj hloov lub tswv yim txawv ntau puas xyoo tas los.
Nyob hauv tiam 11 lub Koom Txoos tawg ua Koom Txoos sab hnub tuaj thiab Koom Txoos sab hnub poob vim lawv hais tsis sib haum. Sab hnub tuaj yog lub Koom Txoos Os Thos Dos, sab hnub poob yog lub Koom Txoos Kav Tos Liv. Txog tiam 16 muaj ib cov neeg ntseeg ncaim ntawm lub Koom Txoos Kav Tos Liv mus, cov ntawd yog Plos Tes Taas. Thaum zoo li ntawd, nyias lub Koom Txoos hais lus saib tsis tau lwm lub Koom Txoos, lawv muaj lus sib cav muaj lus tsis sib raug zoo.
Tab sis tom qab no sawv daws pom tias yog lawv yim tawg mas lawv yim ua tsis haum Huab Tais Yes Xus cov lus qhia, lawv yim ua kom Huab Tais Yes Xus lub cev muaj qhov txhab xwb, ces cov Koom Txoos thiaj pib tig rov los tsim kev haum xeeb nyob hauv kev sib nyiam. Txawm tias niaj hnub no tas cov Koom Txoos tig los sib npuab siab tseem tsis tau tau, los nyob hauv txhua txhua xyoo lawv nrhiav tej lub caij nyoog teev Ntuj ua ke kom muaj kev sib haum xeeb.
Nyob hauv peb tsoom pej xeem ntseeg, tsis hais nyob rau lub Koom Txoos twg, xav kom peb muab kev nyiam saib ua qhov hlob, peb tig los sib pab li yuav pab tau, tshwj xeeb mas yog kev pab cov neeg txom nyem. Paub tias yog hais txog tej kab ke kev cai mas kawg yuav muaj lus hais tsis haum, ces thaum nyob ua ke peb tso tseg qhov yuav ua rau muaj lus ntawd.
Hnub no, Huab Tais Yes Xus thov Leej Txiv tias “Leej Txiv Ntshiab, koj zov lawv nyob hauv koj lub npe uas koj muab rau kuv, kom xwv lawv ua ib leeg xws li wb ua ib leeg.”
Kwv tij, nyob hauv peb kev ua neej mas muaj ntau zaus, peb xav kom peb txhob raug xwv txheej, ces thaum peb ntsib teeb meem meb yws Tswv Ntuj tias ua cas Tswv Ntuj tsis pab peb. Hnub no Huab Tais Yes Xus hais tias “Txiv, kuv tsis thov kom koj rho lawv hauv lub qab ntuj neeg mus, kuv thov koj koj txuag lawv ntawm tus phem”, yam li Huab Tais Yes Xus saib kev ntxias neeg poob rau kev txham loj dua tej yam xwm phem tej yem tsis zoo tuaj nphav tuaj raug peb. Peb ua neej nyob mas peb yeej yuav ntsib tus neeg phem tus neeg zoo, ntsib ntau tsav ntau yam. Tej ntawd yog pab peb kom ua tau ib tug neeg ntshiab, pab peb koj coj tau Tswv Ntuj kev nyiam mus pub rau lawv, tej ntawd xyaum peb kom ua tau tus neeg ncaj.
Peb saib Huab Tais Yes Xus lub neej, nws tsis thov kom tau nyob dawb tsis raug kev txom nyem, tsis thov kom txhob raug cov neeg phem hiam. Qhov Huab Tais Yes Xus thov yog kom nws muaj ib lub zog loj ua tau cov hauj lwm Leej Txiv pom zoo rau nws ua, Huab Tais Yes Xus thov kom Leej Txiv pab nws yeej lub siab ntxias kom txhob ua xis Leej Txiv siab.
Ntawm peb mas kuj ib yam, peb yuav thov xws li Huab Tais Yes Xus thov rau cov thwj tim. Thaum peb ntsib kev txom nyem, peb tsis thov Huab Tais Tswv Ntuj rho peb ntawm tej kev txom nyem ntawd, peb yuav thov Huab Tais Tswv Ntuj pab peb kom txhob poob rau tus dab phem tuaj ntxias peb. Nyob zoo.
