ZAJ NYEEM HNUB TIM 4 LUB 3 HLIS 2025
NCO TXOG LEEJ NTSHIAB KAS XIS MIS
(NXL 35: 1-12; MK 10: 28-31)
Kwv tij Hmoob sawv daws, hnub no yog hnub xaus caij Nyob Nruab Xyoo ntu ib hauv lub xyoo no, tam kis mus ces yuav pib dua lub caij tshiab; yog caij Plaub Caug lawm. Ua ntej yuav chaws mus hauv lub caij Plaub Caug peb tau hnov Yes Xus lub Moo Zoo yog ib co lus Huab Tais Yes Xus hais meej thiab tseeb kawg tias “Tus tso txhua yam tseg ces nws los raws kuv, tus ntawd yuav tau txais rov ib puas npaug ntxiv rau kev raug luag hiam thiablwm tiam nws yuav tau txais txoj sia nyob mus li.”
Txhais tias tus neeg ua Yes Xus thwj tim mas lawv nthuav law lub siab dav mus hlub tas sawv daws, lawv saib txhua tus neeg yog lawv tsev neeg, lawv kwv tij tsis yog cov koom niam koom txiv, koom ib caj ces nrog lawv xwb; tab sis yog tas txhua tus neeg Tswv Ntuj tau tsim los. Tus ua Yes Xus thwj tim nws tau txais qhov no nyob rau lub neej tiam no, thiab muaj ib yam nws yuav tau txais ntxiv; yog txoj kev raug hiam.
Kwv tij Hmoob, yog nej nyeem los yog mloog Ntawv Moo Zoo tsis tu ncua mas nej yuav pom tias Huab Tais Yes Xus hais 3 zaug tias nws yuav raug cov txwj laus hiam thiab tua nyob pem Yes Lus Xas Les. Txog qhov kawg muaj li ntawd, Huab Tais Yes Xus raug ntes, raug tsim txom, raug hiam thiab muab dai tuag saum ntoo cuam. Yog li mas tus neeg raws Huab Tais Yes Xus, mas nws kuj yuav raug zoo tib yam li ntawd.
Txhua zaus Huab Tais Yes Xus hais txog nws kev tuag, mas nws kuj yuav xaus rau qhov tias hnub peb nws yuav rov sawv los txais txoj sia tshiab nyob mus li. Qhov no yog ib lo lus zeem tseeb rau cov neeg raws Huab Tais Yes Xus kom lawv vam khom tias tom qab tej xwm phem dhau mus mas lawv yuav txais qhov zoo tshaj ua lawv paj tshab.
Tab sis yog tus twg nws tsis yeem ris kev raug hiam vim Yes Xus lub npe mas tus ntawd kuj yuav tsis tau txoj sia tshiab, Huab Tais Yes Xus thiaj hais tias “Coob leej ua luag ntej yuav tuaj tom qab, coob leej ua luag qab yuav tuaj tom ntej.”
Kwv tij Hmoob sawv daws, nyob rau lub neej nyem no peb pom tseem muaj ntau qhov chaw cov neeg ntseeg txog Yes Xus raug hiam raug tua tsis tseg, tab sis kuj muaj ntau qhov chaw cov ntseeg nyob sov siab tsis raug kev iab hiam, yog li mas lawv puas yuav hais tau tias lawv raws Huab Tais Yes Xus qab taug Huab Tais Yes Xus lw.
Kev raug hiam muaj ntau yam, muaj ntau txoj kev, tsis yog raug luam siv zog los tsim txom los raug luag txov txoj sia xwb. Kev raug lwm tus thuam kuj yog raug luag hiam, kev raug lwm tus ntxub kuj yog kev raug luam hiam, kev raug lwm ua tsis ncaj rau kuj yog raug luag hiam; tseem muaj ntau yam ntxiv.
Huab Tais Yes Xus xav kom peb txaus siab txais yam li hnub Huab Tais Yes Xus txaus siab rau cov Yus Das hiam nws.
Peb tsis txhob tias luag hais lus saib tsis tau ces tsa kiag ncauj nrog luag sib cav, peb tsis txhob tias raug lwm tus ntxub ces ua kiag yeeb ncuab tsa rog nrog tus ntawd, peb tsis txhob tias raug lwm tus caij tsuj ces sawv kiag los khaj cai mua lawv ntxeev kiag tuaj hauv. Peb ua li no tsis tau dab tsi.
Tag kis peb chaws mus hauv lub caij Plaub Caug lawm, peb yuav nrog Huab Tais Yes Xus taug kev mus pem Yes Lus Xas Les, mus txais kev raug hiam thiab kev tuag. Li ntawd, peb ntsia ntsoov saib peb tus Huab Tais tshais ruam li cas mas peb tshais ruam raws li nws, peb tus Huab Tais tsuj qhov twg mas peb tsuj raws nws tus hneev mus mas peb thiaj tsis plam mog. Nyob zoo sawv daws.
