ZAJ NYEEM HNUB TIM 4 LUB 12 HLIS: HNUB NCO TXOG LEEJ NTSHIAB ZAM DAS MAS KIS NOS
COV LUS NYOB PHAU NTAWV HIS XAIS (HX 25: 6-10)
LUB MOO ZOO RAWS LI MAS TAIS (MT 15: 29-37)
Kwv tij Hmoob sawv daws, nyob hauv tus Yaj Saub His Xais cov lus, nws hais tias Huab Tais Tswv Ntuj ua ib rooj qav, nws cia tas txhua haiv neeg tuaj noj. Tos Huab Tais Tswv Ntuj ua nws rooj qav vim tias hnub ntawd Huab Tais Tswv Ntuj tau rhuav kev tuag pov tseg, ces tas sawv daws raug txhiv hauv kev tuag lawm.
Kwv tij, hnub Huab Tais Tswv Ntuj ua roj qav raws li tus Yaj Saub His Xais hais, mas yog hnub ntiaj teb kawg raws li Huab Tais Yes Xus tau hais tseg rau nws cov thwj tim.
Nyob hauv lub Moo Zoo hnub no, peb hnov hais txog Huab Tais Yes Xus ua kom 7 lub ncuav mov thiab 2 tug ntses ntsu tuaj txaus cov neeg coob coob tau noj tsau.
Kwv tij, Huab Tais Yes Xus tsis yog pub mov thiab nqaij rau cov neeg raws nws kom lawv tau noj tsau lawv plab xwb, Huab Tais Yes Xus tseem kho lawv cov txiab mob kom zoo thiab.
Tseem tshuav ib zam tob tob nyob hauv Tswv Ntuj Lo Lus hauv hnub no, yog qhov tias Huab Tais Yes Xus tau muab nws cov cov nqaij thiab ntshav los ua txhiam xws yug peb txoj sia hauv sab ntsuj plig, cawm peb tus plig kom dim hauv txoj kev tuag, ntxuav peb hauv kev txhaum, ces peb thiaj tau mus koom Huab Tais Tswv Ntuj rooj qav saum Tswv Ntuj lub roob.
Kwv tij Hmoob, peb paub tias Huab Tais Yes Xus muab nws txoj sia los theej peb txoj sia, Huab Tais Yes Xus muab nws cev nqaij thiab ntshav los yug peb tus plig. Tseem tshuav dab tsi peb yuav kawm tau ntawm lub Moo Zoo hnub no thiab?
Yam peb kawm tau hauv hnub no yog Huab Tais Yes Xsus tus yam ntxwv. Huab Tais Yes Xus muab nws lub sij hawm los pab cov neeg txom nyem, Huab Tais Yes Xus pom lawv mas nws hlub lawv, Huab Tais Yes Xus ntshai tsam lawv tshaib plab mas nws thiaj txhib cov thwj tim kom thaum lawv cov mov los pub rau sawv daws noj.
Hnub no Huab Tais Yes Xus kuj txhib peb, kom thau yam peb muaj coj los pub rau cov tsis muaj; tsis hais cuab tam, nyiaj txiag, txhiam xws, los peb lub dag zog.
Kwv tij, lub caij Tos Huab Tais yog lub caij rau peb tau hloov siab tshiab, cia peb tau ntxuav qhov phem qhov tsis zoo tawm hauv peb lub siab mus. Ib yam phem tsis xis Tswv Ntuj siab mas yog lub siab qia dub cuaj khaum.
Tsim nyog peb hnov Tswv Ntuj Lo Lus hauv hnub no lawm, peb yuav thov Huab Tais Yes Xus tuaj rhuav tuaj ntxuav peb lub siab lub tswv yim kom tshiab tuaj, kom tsis txhob muaj qhov cuaj khaum qia dub nyob hauv peb ntxiv. Peb tsis yog thov Huab Tais Yes Xus tuaj ntxuav peb lub siab xwb, peb los kuj yuav koom nrog Huab Tais Yes Xus ntxuav peb siab thiab.
Kwv tij, nej kav tsij thaum yam nej muaj coj los pub rau tus tsis muaj mog. Nyob zoo sawv daws.
