ZAJ NYEEM HNUB TIM 3 LUB 8 HLI 2024
HNUB XYA LUB LIS PIAM 17 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 14: 1-12)
Kwv tij Hmoob sawv daws, peb ib txwm paub tias lub Koom Txoos saib thawj tus neeg tuag ua tim khawv txog Yes Xus yog tus tsob hwb Tes Fas Nos, nws raug cov Yus Das muab pob zeb txawb tuag. Tus ua tim khawv txog qhov ncaj yog tus Ntxuav Plig Zam raws li hnub no peb hnov nyob hauv lub Moo Zoo.
Tus Ntxuav Plig Zam raug txiav taub hau vim nws hais ib co lus ntuas tus vaj Hes Los txog qhov tus vaj Hes Los yuav nws tus niam tij los ua nws poj niam.
Lub Moo Zoo tsis qhia tias Hes Los yuav Hes Los Dias tau li cas, tab sis raws li Hes Los cov liv xwm piav tseg, mas hais tias Hes Los pom nws niam tij ntxim nws siab ces nws cia li txeeb nws niam tij ntawm nws tij laug xub ntiag los ua nws poj niam. Tsis ntev mas nws tij laug Fis Lis Pos mam tuag.
Kwv tij Hmoob, thaum peb paub li no lawm peb thiaj pom tias Hes Los tau ua tsis ncaj rau nws tij laug, Hes Los ua ib yam tsis tsim txiaj. Tej zaum Zam Ntxuav Plig kuj paub txog twj no, mas thaum nws ntsib Hes Los, Zam thiaj ntuas Hes Los txog Hes Los qhov txhaum.
Zam tseem paub tias Hes Los yog ib tug vaj tsiv tsaim, yog Hes Los npau taws rau Zam mas Zam kawg tuag xwb, tsis kav Zam tsis ntshai, nws tab meeg hais qhov ncaj thiab qhov yog rau Hes Los. Zam hais li ntawd, mas yog nws xav ntuas kom Hes Los hloov siab.
Kwv tij, Zam tus piv txwv zoo qhia peb kom mob siab ntuas cov neeg peb pom tias lawv tau ua yuam kev kom xwv lawv tig los yuav lub siab tshiab. Txhob ntshai tsam luag ua phem rau peb. Peb yuav tso siab rau Tswv Ntuj tias Tswv Ntuj yuav ua tus txuag peb, thiab tsuas muaj Tswv Ntuj tib tug xwb yuav txo tau peb txoj sia. Yog Tswv Ntuj pom tias peb txoj sia yuav ua tau kom muaj coob leej tig los raws qhov ncaj mas txawm peb yuav tsiv nraim npaum cas los yeej yuav tsis dim. Yog Tswv Ntuj pom tias tsis tau txog peb lub caij, txawm peb raug xwv txheej luaj twg los tsis kav peb yeej tseem muaj txoj sia nyob.
Qhov zoo tshaj mas yog qhov tias peb yuav niaj hnub ua tim khawv txog qhov ncaj thiab ua tim khawv txog peb kev ntseeg txog Yes Xus rau lwm tus.
