Zaj nyeem hnub tim 29 lub 4 hlis 2026
Hnub nco txog Leej Ntshiab Kas Tas Lis Nas nyob Xis As Nas
Cov lus nyob hauv Zam Ntawv Moo Zoo (Z 12: 44-50)
Kwv tij sawv daws, cov His Xas Lais tos ntsoov tus Mev Xias, los yog tus Vaj Pleev uas yuav tuaj cawm lawv. Lawv xav tias, tus Vaj Pleev no yuav tuaj pab kom lawv dim ntawm kev uas raug luag lwm haiv neeg caij tsuj, thiab coj lawv mus rau kev vam meej zoo li yav thaum ub uas tus vaj Das Vis tau coj lawv, lawv tseem xav tias tus Vaj Pleev no yuav ua kom lawv muaj hwj chim zoo dua lwm haiv neeg, lawv yuav ua ib haiv neeg loj nyob rau ntiaj teb no, qhov no yog lawv txoj kev cia siab. Lawv thiaj tsis to taub txog Huab Tais Yes Xus cov lus hnub no uas hais tias : “Huab Tais Leej Txiv xa nws Leej Tub nqes los nyob rau hauv ntiaj teb no, kom tau ua qhov pom kev.” Vim cov His Xas Lais lub tswv yim tseem xav li lub neej yav qub qab, lawv thiaj ntsia tsis pom txog Huab Tais Tswv Ntuj lub luag hauj lwm tseem ceeb uas nyob rau yav tom ntej, uas nws xav cawm lub qab ntuj neeg sawv daws huv tib si. Huab Tais Tswv Ntuj nws nyiam tib neeg thiab nws saib neeg sawv daws puav leej yog nws cov me nyuam puag thaum lub hauv paus los lawm, tab sis, cov His Xas Lais lawv tsuas ntsia Tswv Ntuj yog lawv tus Tswv uas kav lawv haiv neeg xwb, lawv saib Tswv Ntuj zoo li cov vaj kav teb chaws. Vim li ntawd lawv thiaj tsis to taub Huab Tais Yes Xus cov lus qhia. Hos nyem no peb tsoom ntseeg nyob thoob qab ntuj, peb paub lawm tias, Tswv Ntuj yog leej twg, thiab nws yuav pab tau peb zoo li cas. Peb paub lawm hais tias, Tswv Ntuj yog peb tus Tswv kav tas nrho hauv peb lub cev thiab thiab peb tus ntsuj plig, txog qhov kawg peb sawv daws yuav nyob rau ntawm nws xub ntiag.
Nyob zoo sawv daws.
