HNUB TIM 28 LUB 11 HLIS; HNUB TSIB LUB LIS PIAM 34 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 21: 20-28)
Kwv tij Hmoob sawv daws, lub Moo Zoo hnub no Huab Tais Yes Xus hais txog lub caij ntiaj teb kawg. Huab Tais Yes Xus xav qhia peb tias txawm cov kuj cuab ib lub vau hos lwm lub sawv tuaj, lub ntuj yuav nphau lub teb yuav qeeg npaum cas, tsis kav muaj ib yam yuav nyob mus li tsis qaij qaug; yog Tswv Ntuj Leej Tub.
Tswv Ntuj Leej Tub nce mus saum ntuj, nws yuav nyob mus li mus txog hnub kawg ces nws yuav rov los xws li thaum nws nce mus lawm saum ntuj.
Tus twg ntseeg txog Tswv Ntuj Leej Tub mas tus ntawd yuav ua siab loj txhob ntshai tej yam xwv txheej tuaj raug lub ntiaj teb, txawm lawv yuav pom kev quaj kev nyiav, pom kev sib ntaus rog, pom neeg tuag vim kev tshaib thiab mob nkees, txawm lawv yuav pom lub ntiaj teb qeeg npaum cas, los lawv yuav tsis txhob ntshai, lawv yuav tso siab rau Tswv Ntuj Leej Tub mus li.
Kwv tij Hmoob, peb ua neej nyob mas peb ntsia pom yav tas los, tsis muaj leej twg yuav ntsia pom yav tom ntej, tsis muaj leej twg paub tias ib me ntsis tom ntej yuav zoo li cas, tag kis ne ho zoo li cas.
Cov kws txuj ntsuas huab cua thiab lub teb chaws lawv saib hnub saib hli los yog saib huab cua mas lawv ntsuas tau tias nyaj tag kis los nag kis yuav muaj nag xob nag cua, tshav ntuj los pos huab. Lawv ntsuas tau li ntawd tab sis lawv ntsuas tsis tau tias yuav muaj dab tsi tuaj raug neeg txoj sia.
Kwv tij, yog vim peb tsis muaj tus twg paub yav tom ntej mas txhua hnub peb thiaj yuav ua neej kom zoo tshaj, peb ua neej kom xyuam xim, peb feeb meej mus li.
Peb txhob ua xws li cov neeg tsaug zog tsis paub dab tsi, peb txhob ua li cov neeg qaug cawv rhais ruam tsis ruaj.
