Hnub tim 26 lub 3 hlis 2025
Hnub peb, Lis Piam 3 caij Plaub Caug.
MT 5: 17-19
Kwv tij Hmoob, Huab Tais Yes Xus pom tias txoj cai yog qhov zoo rau sawv daws ces nws hais tias nws tsis yog tuaj rhuav txoj cai, nws tuaj qhia kom thoob.
Tos Huab Tais Yes Xus tuaj qhia kom thoob vim cov kws ntawv tsuas qhia lawv raws li ntawv hais xwb, lawv tsis nco pom txog lub ntsiab hauv txoj cai. Qhov no ua kev ceeb laj rau saw daws, ces muaj ib txhia tsis xav ua raws txoj cai ntxiv, yam li txoj cai kom caiv hnub xya mas cov kwv ntawv qhia kom lawv tsis txhob ua dab tsi, txoj cai hais kom coj kab ke yoo mas lawv yoo raws li txoj cai hais. Huab Tais Yes Xus thiaj qhia sawv daws kom pom tias lawv yog lawv paub lub ntsiab hauv txoj cai lawm, lawv yuav tsis muab txoj cai los ua tus quab yuam lawv ntxiv tab sis lawv yuav muab txoj cai los ua tus qauv rau lawv coj kom tau nyiam luag tej, ces Huab Tais Yes Xus thiaj nthuav tias piv li txoj cai tias tus twg tua neeg, nws yuav raug txim mas lub ntsiab yog kom txhob npau taws txhob thuam luag tej; lo lus tias txhob deev luag txij nkawm lub ntsiab yog txhob cia lub siab xav tej yam tsis zoo rau luag tus txij nkawm. Yog thaum paub li no lawm, txoj cai yuav yog yam yooj yim rau peb. Kwv tij, Huab Tais Yes Xus tseem ntuas sawv daws kom tsis txhob hla txoj cai thiab txhob coj lwm tus mus yuam kev thiab. Li ntawd, lub caij Plaub Caug no peb rov tig los muab xav saib peb puas tau ua raws txoj cai, peb puas tau ua tus piv txwv kom luag tej to taub yuam kev. Nyob zoo sawv daws.
