Zaj nyeem hnub tim 25 lub 2 hlis 2026
Hnub Plaub, Lis Piam 1 caij Plaub Caug
Cov lus nyob hauv Lus Kas Ntawv Moo Zoo (LK 11: 29-32)
Kwv tij sawv daws, Tswv Ntuj xa Yos Nas mus qhuab qhia cov neeg nyob lub nroog Nis Nis Vas kom hloov siab thiab txhob ua txhaum ntxiv, lawv thiaj yuav tsis raug kev piam sij. Yos Nas cov lus muaj hwj chim vim muaj Tswv Ntuj lub zog, ua rau tus neeg uas qhib siab mloog ces nws yuav hloov nws lub siab. Hos nyob rau Huab Tais Yes Xus tiam neeg, Yes Xus cov lus muaj hwj chim kawg nkaus, thiab cov neeg uas tau mloog Yes Xus lub Moo Zoo yog nws qhib siab mloog, ces nws yuav hloov tau nws lub siab. Hos tus uas tsis kam qhib nws lub siab los txais Tswv Ntuj cov lus, nws kaw nws lub siab nti, ces nws tseem nyob rau hauv kev tsaus ntuj, thiab txoj kev tuag, nws yuav tsis tau pom Tswv Ntuj txoj kev kaj thiab txoj sia nyob mus li.
Nyob rau lub caij Plaub Caug no, caw peb tsoom ntseeg sawv daws qhib siab los mloog Tswv Ntuj lub Moo Zoo, xyoo no yog xyoo zoo uas peb yuav hloov peb lub siab, thiab pib dua lub neej tshiab, uas peb yuav kho peb lub neej kom zoo dua qub. Thov Tswv Ntuj khuv leej peb sawv daws, thiab foom koob hmoov rau peb sawv daws uas mloog Tswv Ntuj lub Moo Zoo.
Nyob zoo sawv daws.
