ZAJ NYEEM HNUB TIM 24 LUB 9 HLI 2025
HNUB PLAUB, LIS PIAM 25 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 9: 1-6)
Kwv tij sawv daws, Huab Tais Yes Xus txib cov thwj tim mus tshaj lub Moo Zoo, nws txhib cov thwj tim kom txhob nqa dab tsi hlo li, kom lawv coj lub neej pluag, zoo li Huab Tais Yes Xus uas nws tau ua piv txwv rau lawv lawm.
Muaj lus nug tias vim li cas Huab Tais Yes Xus thiaj tsis pub cov thwj tim ris hnab los yog ntim su, tsis pub nqa nyiaj thiab coj lub neej pluag mus tshaj Ntuj Lus. Ces lo lus teb kuj yog tias
1. Huab Tais Yes Xus xav kom cov thwj tim tso siab rau Tswv Ntuj thiab lawv ntseeg ruaj tias, Tswv Ntuj Lo Lus yog lo lus tseeb, txoj kev uas lawv taug yog txoj kev ncaj kev zoo, txoj kev ntshiab. Ces Tswv Ntuj yuav tiv thaiv lawv, li ntawd tus txais tos lawv thiaj yuav yog tus tsim nyog txais ntuj cov txiaj ntsim.
2. Huab Tais Yes Xus tsis xav kom lawv tso siab rau lawv pob nyiaj, vim Huab Tais Yes Xus hais meej tias nyiaj txiag thiab Tswv Ntuj mus ua ke tsis tau, thaum koj hwm koj pob nyiaj lawm, ces koj yuav tsis nco Tswv Ntuj tej txiaj ntsig lawm.
3. Luag tej yuav pom hais tias nej yog Tswv Ntuj cov me nyuam yaj tseeb tiag, vim nej tsis ntshaw nyiaj txiag, nej tsis ntshaw lub neeg ntiaj teb lub hwj chim, ces luag thiaj yuav lees txais nej, thiab mloog nej cov lus.
Kwv tij sawv daws, niaj hnub no peb pom tseeb lawm tias, Huab Tais Yes Xus cov lus qhia yeej yog lus tseeb tiag, vim Huab Tais ua lub kaus tooj kaus hlau tiv thaiv Huab Tais cov tub zog, nws npaj txoj hau kev rau lawv taug. Yog li ntawd, peb yuav tsum muaj kev tso siab rau Huab Tais Yes Xus.
Peb yuav thov Ntuj tias Huab Tais thov koj pub kom peb nrhiav tau txaus peb noj peb haus, koj txhob pub peb tshaib peb nqhis, nyob tsam peb ho mus ua tub sab, koj txhob cia peb nplua nuj dhau, nyob tsam peb tsis nco qab koj uas yog peb tus Tswv lawm. Thov koj pab kom peb dim ntawm dab phem tej kev haub kev ntxias, kom peb txhob qaug rau hauv txoj kev txhaum, thiab koj npo peb dim ntawm tej kev phem uas yuav tuaj raug peb. Ua li.
Nyob zoo sawv daws.
