ZAJ NYEEM HNUB TIM 24 LUB 11 HLIS 2025
HNUB NCO TXOG LEEJ NTSHIAB AS NRES DOOS LAS THIAB COV TIM KHAWV COB TSIB
COV LUS NYOB HAUV LUS KAS NTAWV MOO ZOO (LK 21: 1-4)
Kwv tij sawv daws, neeg feem coob xav tias, kev tso nyiaj rau hauv tsev teev Ntuj, leej twg tso ntau ces tus ntawd tau koob hmoov ntau dua. Tab sis, nyob rau hauv zaj no Huab Tais Yes Xus qhia tseeb rau peb tias, tus uas yuav tau txais koob hmoov ntau yog tus uas nws muab nws tag nrho hauv nws lub neej coj los tso rau Tswv Ntuj.
Kwv tij, neeg thoob ntiaj teb cov neeg muaj nyiaj muaj ntau, tab sis, muaj tsawg leej thiaj li kam muab nws lub cuab tam los faib, los yog los qee rau Tswv Ntuj.
Nyob rau hauv zaj no, Huab Tais Yes Xus ntsia cov neeg tuaj tso nyiaj rau hauv lub txhab ceev nyiaj hauv tsev teev Ntuj. Huab Tais Yes Xus hais qhia cov Thwj Tim tias ; nej saib tus poj ntsuam no, nws pluag pluag nws tso ob lub txiaj tooj xwb, tab sis, qhov ntawd yog tag nrho hauv nws lub neej lawm, hos cov neeg muaj nyiaj lawv tso ntau dua, tiam sis, lawv tsuas muab cov nyiaj seem ntawm lawv tso xwb. Vim li ntawd Huab Tais Yes Xus thiaj hais tias, tus poj ntsuam ntawd tso ntau dua cov.
Tab sis, tsis tau txhais tias qhov lawv ua ntawd lawv tsis tau koob hmoov, tsuas yog Huab Tais Yes Xus qhia peb tias, nyob rau ntawm Tswv Ntuj xub ntiag, Tswv Ntuj tsis tau saib tus muaj los tus pluag, Tswv Ntuj tsuas saib tias, nyob rau hauv peb lub neej, peb tau ua zoo npaum cas rau luag, peb muab tag nrho hauv peb lub neej coj los faib rau cov pluag, los yog peb muab ib nrab, los yog peb muab me me ntawm nws tus kheej xwb. Qhov no thiaj yog qhov ntsuas tias, peb nyiam Tswv Ntuj npaum li cas, thiab peb muaj lub siab hlub luag npaum li cas.
Kev tso nyiaj rau hauv tsev teev Ntuj kuj zoo tib yam li ntawd. Tswv Ntuj tsis tau ntsia tias peb muab npaum cas coj los pab tsev teev Ntuj, tiam sis, Tswv Ntuj yuav ntsia tias, peb muaj siab pab tsev teev Ntuj npaum li cas.
Qee tus tsis muaj nyiaj tuaj tso hauv tsev teev Ntuj, tab sis nws siv nws lub sij hawm thiab nws lub dag zog tuaj pab hauj lwm hauv tsev teev Ntuj, qhov ntawd nws kuj tau txiaj ntsim ib yam thiab. Hos tus uas nws muaj nyiaj thiab nws kam rho nws pob nyiaj los mus pab rau hauv tsev teev Ntuj, los yog pab rau txoj hauj lwm kev tshaj Ntuj lus kom txoj hauj khiav tau, qhov ntawd kuj yog ib lub txiaj ntsim thiab.
Yog li ntawd, Tswv Ntuj tsis tau ntsuas peb tias peb siv nyiaj npaum li cas, los pab hauj lwm hauv tsev teev Ntuj, Tswv Ntuj tsis tau ntsuas tias, peb siv dag zog npaum li cas los pab txoj hauj lwm hauv tsev teev Ntuj, tab sis, Tswv Ntuj tsom hauv peb lub siab tias thaum Tswv Ntuj pub koob hmoov rau peb lawm, saib peb ho zoo siab los cev rov rau Tswv Ntuj li cas xwb.
Kwv tij sawv daws, txawm li cas los xij, peb lub neej muaj tsawg, tiam sis, peb muab los cev rau Tswv Ntuj tas nrho, ces qhov ntawd yog ib qho txim txi Ntuj uas Tswv Ntuj txaus siab rau peb thiab nws txais peb mus los nyob rau ntawm nws lub xub ntiag.
Hnub no kuv tuaj ntsib nej li no xwb. Thov kom Tswv Ntuj foom koob hmoov pub rau nej sawv daws.
