Zaj nyeem hnub tim 23 lub 2 hlis 2026
Hnub nco txog Leej Ntshiab Pos Lis Kas Pos
Cov lus nyob hauv Mas Tais Ntawv Moo Zoo (MT 25: 31-46)
Kwv tij sawv daws, peb tsoom ntseeg yuav tsum xyaum coj lub neej ntshiab.
Kev coj lub neej ntshiab yog zoo li cas ? raws li hauv phau ntawv Les Vis tau sau tseg thiab hauv Yes Xus lub Moo Zoo qhia peb hnub no, yog “txoj kev nyiam kev hlub.” Yog txoj kev nyiam luag tej thiab hlub luag tej, yus nyiam tas nrho ib zeej tsoom neeg sawv daws uas nyob ib ncig yus, los yog cov uas yus tau ntsib tau pom thiab tau paub nyob rau hauv yus lub neej. Thiab tsis yog yus lam hais ntawm lub ncauj, los yog xav hauv lub siab tias yus hlub luag xwb, tiam sis, yuav tsum ua tawm los rau pom xyeem. Tsis hais tus loj tus me, los tus ruam tus ntse, los yus tsis txhob ntxub luag. Yus yuav tsis txhob cia kom muaj txoj kev ntxub ntxaug, los yog kev caub kev chim, nyob rau hauv yus lub siab. Yus yuav cia Tswv Ntuj txoj kev nyiam kev hlub tuaj nyob puv npo rau hauv yus lub siab puv npo, ces yus ua dab tsi, los yus thiaj muaj kev kaj siab lug. Nyob zoo sawv daws.
