ZAJ NYEEM HNUB TIM 23 LUB 1 HLIS 2025
HNUB TSIB LUB LIS PIAM OB, CAIJ NYOB NRUAB XYOO
HN 7: 25-28, 8: 6; MK 3: 7-12
Kwv tij Hmoob zoo nyiam, nyob hauv Yes Xus lub Moo Zoo, Mas Kos tab tom qhia peb kom paub txog Huab Tais Yes Xus kom tseeb tias Huab Tais Yes Xus yog Tswv Ntuj Leej Tub.
Mas Kos sau tias cov neeg nyob xeev Nkas Lis Lais, Yus Das, nyob Yes Lus Xas Les, nyob Is Dus Mias, nyob sab dej Yos Las Das tim ub, nyob ib ncig Tws Los thiab Xis Doos tuaj cuag Yes Xus. Lawv tuaj vim lawv tau hnov hais txog Yes Xus cov hauj lwm hlub thiab cawm cov neeg txom nyem.
Kwv tij, peb puas xav pom Huab Tais Yes Xus, puas xav ntsib Huab Tais Yes Xus, puas xav mus cuag Huab Tais Yes Xus xws li cov neeg coob coob tuaj cuag Huab Tais Yes Xus raws li lub Moo Zoo peb hnov hauv hnub no.
Yog tias peb nyiam Huab Tais Yes Xus tiag, yog tias peb saib Huab Tais Yes Xus yog peb tus Tswv Ntuj, yog peb vam txog Huab Tais Yes Xus pab; mas peb yuav mob siab nrhiav Huab Tais Yes Xus xws li cov neeg nyob hauv lub Moo Zoo peb hnov hnub no.
Thaud Huab Tais Yes Xus muaj lub cev nqaij ua tib neeg rau lawv tuaj pom, tuaj mloog, tuaj kov. Nyem no Huab Tais Yes Xus tsis yog lub cev neeg rau peb pom ntxiv tab sis Huab Tais Yes Xus cov lus, cov hauj lwm tseem nyob rau peb tau hnov tau pom. Huab Tais Yes Xus lub siab hlub tseem niaj hnub tuaj chwv peb tus plig.
Nyob ntawm peb, saib puas nrhiav kev kom tau paub thiab ntsib Huab Tais Yes Xus. Yog peb nyiam Huab Tais Yes Xus tiag, mas ntseeg tau tias peb yuav nrhiav kev paub Huab Tais Yes Xus xwb.
Mas Kos rov sau tias cov dab pom Yes Xus, lawv khoov ti av nyob ntawm nws xub ntiag, lawv qw tias “Koj yog Tswv Ntuj Leej Tub!” ces Yes Xus txwv lawv nruj tsis pub lawv ua kom muaj neeg paub nws.
Huab Tais Yes Xus txwv cov dab vim lawv paub Huab Tais Yes Xus tab sis lawv tsis nyiam Huab Tais Yes Xus thiab lawv tsis saib Huab Tais Yes Xus ua lawv tus Tswv Ntuj.
Kwv tij, peb txhob nrhiav kom tau paub Huab Tais Yes Xus xwb, peb tsum nyiam thiab hwm Huab Tais Yes Xus thiab, mas thiaj tsim nyog qhov Huab Tais Yes Xus hlub peb.
Yog peb paub Huab Tais Yes Xus, peb nyiam Huab Tais Yes Xus, thiab peb saib Huab Tais Yes Xus ua peb tus Tswv Ntuj lawm, hnub ntawd Huab Tais Yes Xus mam kheev cia peb tshaj txog Huab Tais Yes Xus pub rau cov neeg tsis tau paub tau mloog tau hnov.
Peb nyiam Huab Tais Yes Xus, peb thiaj nyeem thiab mloog Yes Xus lub Moo Zoo. Peb hwm Huab Tais Yes Xus ua peb tus Tswv Ntuj mas peb thiaj tshaj txog Yes Xus rau lwm tus. Peb yim mloog thiab tshaj txog Huab Tais Yes Xus mas peb yim paub Huab Tais Yes Xus.
