ZAJ NYEEM HNUB TIM 22 LUB 11 HLIS 2025
HNUB NCO TXOG LEEJ NTSHIAB XES XIS LIAS
COV LUS NYOB HAUV LUS KAS NTAWV MOO ZOO (LK 20: 27-40)
Kwv tij sawv daws, zaj no yog hais txog cov Xas Dus Kais los nug Huab Tais Yes Xus txog kev sawv rov los.
Tos cov Xas Dus Kais los nug li ntawd, yog vim cov Xas Dus Kais, mas lawv tsis ntseeg txog kev sawv rov los. Cov Xas Dus Kais thiab cov Fas Lis Xais mas sib txawv me ntsis. Lawv ob pab no puav leej yog cov tuav Mais Xes Txoj Cai, tiam sis, cov Xas Dus Kais Mas mas lawv yog cov neeg muaj nyiaj, muaj koob nto npe, lawv tsuas lam coj txoj cai saum daim tawv xwb. Lawv tsuas ntseeg raws li cov ntaub ntawv sau tseg xwb, dhau ntawd mas lawv tsis ntseeg lawm. Hos cov Fas Lis Xais mas yog cov ntseeg tob me ntsis thiab lawv ntseeg tias muaj kev sawv rov los.
Li ntawd, txhia niaj txhia zaus peb pom mas cov Fas Lis Xas tab nrhiav lus tuaj nug Huab Tais Yes Xus tas zog, tiam sis, zaum no, yog cov Xas Dus Kais, uas lawv tsis ntseeg txog kev sawv rov los, lawv nrhiav lus tuaj nug Huab Tais Yes Xus. Lawv tsis ntseeg tias thaum txog hnub kawg mas neeg muaj kev sawv rov los. Ces lawv thiaj los nug Huab Tais Yes Xus, lawv muab ib tug poj niam uas nws yuav xya tug kwv tij uas muaj uas raws li cov His Xas Lais kev cai thiab lawv lub neej ib txwm coj los, mas lawv txoj kev cai no kuj muaj ntsis xws peb hmoob li kev cai thiab, thaum tus tij tas sim neej lawm, mas muaj cai cia tus kwv los qaws niam tij ua nws poj niam. Vim li ntawd cov Xas Dus Kais thiaj muab qhov no coj los ua piv txwv nug Huab Tais Yes Xus. Vim lawv xav tias, yog tias Huab Tais Yes Xus teb tsis tau nqe lus no mas txhais tias Huab Tais Yes Xus cov lus qhia yog dag xwb. Lawv los nug Huab Tais Yes Xus tias muaj ib tug poj niam nws yuav ib tug txiv, nws tus txiv tuag lawm tsis tau muaj me tub me nyuam, ces ho muab tus kwv los qhaws, yuav niam tij ua nws poj niam, tsis ntev tus kwv kuj tuag lawm thiab. Lawv xya leej kwv tij puav leej tau yuav tib tug poj niam thiab puav leej tsis muaj me tub me nyuam li.
Yog li no thaum txog lub caij neeg sawv rov los tus poj niam ntawd yuav yog leej twg tug?
Huab Tais Yes Xus thiaj teb meej hais tias kev ua neej, ua niam txiv txij kawm, tsuas yog thaum ua neej nyob xwb, hos thaum tuag mus txog saum ntuj Ceeb Tsheej thiab thaum sawv rov los, lub caij ntawd neeg tsuas zoo li cov dab ntuj los yog Ntuj cov Tshiab lawm xwb, tsis muaj kev sib yuav ua txij ua nkawm ua niam txiv ntxiv lawm.
Kwv tij sawv daws, Huab Tais Yes Xus qhia meej tias kev ua txij ua nkawm yog ua saum yaj ceeb no xwb, Tswv Ntuj pub kom peb muaj txiv neej thiab poj niam nyob rau lub qab ntuj los, thiab muaj cai los sib yuav ua txij ua nkawm kom tsim noob neej rau lub ntiaj teb xwb. Hos thaum txog hnub kawg ces tas lub sij hawm kev ua niam txiv txij kawm lawm. Li ntawd, peb cov uas muaj txij muaj nkawm, peb yuav tsum sib sib hlub thaum ua neej nyob, ib tus yuav hwm ib tug, ib tug yuav hlub ib tug mus kom txog hnub kawm. Vim dhau lub sij hawm saum ntiaj teb no ces tsis muaj lub caij rau peb los ua niam txiv nyob ua txij ua nkawm lub qub ntxiv lawm.
Nyob zoo sawv daws.
