ZAJ NYEEM HNUB TIM 19 LUB 8 HLI 2024
HNUB NCO TXOG LEEJ NTSHIAB ZAM AWS DES
COV LUS NYOB HAUV MAS TAIS NTAWV MOO ZOO (MT 19: 16-22)
Kwv tij Hmoob sawv daws, nyob hauv lub Moo Zoo hnub no muaj 2 lo lus; yog lo lus ‘qhov zoo’ thiab lo lus ‘txoj sia nyob mus li’.
Huab Tais Yes Xus hais tias “Vim li cas koj nug kuv txog qhov zoo?”
Yog peb xav ua qhov zoo tshaj mas Huab Tais Yes Xus hais tias “Koj mus muab txhua txhia yam uas yog koj tug muag, muab pub rau cov pluag. Koj ua qhov ntawd tas mas koj los raws kuv.”
Qhov zoo tshaj mas yog kom peb txhob muab lub siab khi rau cov cuab tam hauv lub ntiaj teb no, xws li nyiaj txiag los suab npe. Peb yuav txawj ua siab dav pub yam peb muaj rau luag tej lwm tus. Peb yuav txiav siab raws Huab Tais Yes Xus qab; yam li ua neeg pluag, ua neeg me, hlub zeej tsoom, yeem ris kev txom nyem.
Huab Tais Yes Xus hais tias “Yog koj xav muaj txoj sia, koj yuav ua raws li cov lus qhia; yog cov lus hauv Huab Tais 10 Lo Lus Qhia yam li: Koj tsis txhob tua neeg, koj tsis txhob zes luag txij nkawm, koj txhob ua tub sab, koj txhob ua tim khawv cuav, koj hwm koj niam koj txiv, koj yuav nyiam tus nyob ze koj ib yam li koj nyiam koj.”
Tseem tshuav lo lus qhia kom teev Huab Tais Tswv Ntuj ib tug xwb thiab nyiam Huab Tais Tswv Ntuj tshaj tas puas tsav yam, koj yuav hwm Huab Tais Tswv Ntuj lub npe, koj yuav caiv Huab Tais Tswv Ntuj hnub.
Huab Tais Yes Xus tsis hais txog cov lus no, vim nyob hauv cov Yus Das mas lawv yeej ib txwm teev Huab Tais tib tug ua lawv tus Tswv Ntuj, lawv yeej ib txwm txwv tsis hu txog Tswv Ntuj lub npe Ntshiab, thiab lawv yeej caiv Hnub Xas Npas Tos uas yog Tswv Ntuj hnub.
Tab sis nyob hauv peb tsoom Hmoob mas tsis zoo li ntawd, peb tseem paub Tswv Ntuj tsis tau txaus, mas tej zaus peb muab lwm yam los ua Tswv Ntuj xws li nyiaj txiag los yog peb tej hauj lwm. Peb saib nyiaj txiag thiab saib hauj lwm loj dua Tswv Ntuj, peb nyiam nyiaj txiag thiab peb cov hauj lwm dua Tswv Ntuj ces niaj hnub chiv peb thiaj tsis nco mus teev Ntuj ua Tswv Ntuj tsaug.
Cov kwv tij Hmoob, kom peb nco tias tsuas yog Huab Tais Tswv Ntuj xwb thiaj yog Tus Zoo Tshaj, Huab Tais Tswv Ntuj yog Txoj Kev Nyiam. Li ntawd, yog peb xav ua qhov zoo tshaj kom tau txoj sia nyob mus li mas thiaj tsis yog txhob tua neeg, txhob zes luag txij nkawm, txhob ua tim khawv cuav, hwm niam hwm txiv thiab hlub luag tej xwb, peb tseem yuav muab tas lub siab npuab Huab Tais Tswv Ntuj, saib Huab Tais Tswv Ntuj ua qhov loj tshaj hauv peb lub neej thiab niaj lis piam mus teev Ntuj raws li Huab Tais Yes Xus hais tias “Ua qhov ntawd tas, mas koj los raws kuv.”
