ZAJ NYEEM HNUB TIM 18 LUB 7 HLI 2025
HNUB RAU, LIS PIAM 15 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 12: 1-8)
Kwv tij Hmoob sawv daws, hnub no cov Fas Lis Xais pom tias Huab Tais Yes Xus cov thwj tim de tej hnab nplej los noj, mas cov Fas Lis Xais hais tias ua cas lawv ua tej yam txwv tsis pub ua nyob hauv hnub Xas Npas Tos.
Huab Tais Yes Xus teb li cas?
Huab Tais Yes Xus hais tias qhov Huab Tais Tswv Ntuj xav yuav ntawm neeg, tsis yog qhov coj rawv txoj cai nruj, tab sis qhov Huab Tais Tswv Ntuj xav tau ntawm neeg mas yog neeg lub siab khuv leej luag tej.
Huab Tais Yes Xus hais kom cov His Xas Lais muab Hnub Xya ua hnub caiv, vim tias Huab Tais Tswv Ntuj hlub lawv, Huab Tais Tswv Ntuj xav kom ib lub lis piam cov His Xas Lais tshwj ib hnub cia so hauj lwm, tsis txhob ua ib yam hauj lwm hnyav; lawv yuav muab hnub ntawd los cav txog Huab Tais Tswv Ntuj. Cov His Xas Lais kuj tseem yuav tsis cia lawv tej tsiaj ua hauj lwm, lawv kuj yuav cia daim teb tau so thiab. Tas txhua yam ntawd vim Huab Tais Tswv Ntuj txoj kev hlub pub rau txhua tsav Huab Tais Tswv Ntuj tsim los.
Tab sis cov Fas Lis Xais muab ntaus nqe txawv, lawv muab tsa ua ib txog cai rau tsoom pej xeem ris, lawv muab ua phab ntsa thaiv neeg kom txhob hlub thiab khuv leej lwm tus.
Huab Tais Yes Xus paub tias nws hais li cas los cov Fas Lis Xais yuav tsis yeem, nws thiaj muab cov xwm piav txog thaum tus vaj Das Vis coj nws cov neeg mus noj cov ncuav mov txi Ntuj, nws hais txog cov leej choj leg kab xwm hauv lub Tuam Tsev Teev Ntuj.
Huab Tais Yes Xus tsum muab cov neeg cov Fas Lis Xais hwm los hais ua piv txwv mas cov Fas Lis Xais thiaj yuav tws lus.
Cov kwv tij, Das Vis thiab nws cov neeg, lawv khiav tus vaj Xas Ws ces lawv tshaib plab, yog lawv tsis noj dab tsi li mas lawv kawg tshaib plab tuag, ces Das Vis thiaj muab cov ncuav mov txi Ntuj los faib rau nws cov neeg noj. Das Vis hla cov Yus Das txoj cai vim nws saib neeg txoj sia yog yam tseem ceeb dua.
Hnub Xas Npas Tos, cov leej choj lis lawv cov hauj lwm txi Ntuj nyob hauv lub Tuam Tsev Teev Ntuj; lawv siv zog ua hauj lwm tab sis lawv tsis txhaum. Yog lawv tseem caiv thiab, mas leej twg yuav cev tsoom pej xeem cov txim rau Tswv Ntuj, yuav pab lawv them txim. Lawv kuj yog saib neeg txoj sia tseem ceeb dua lawv txoj cai.
Huab Tais Yes Xus thiaj hais rau lawv kom ras tias yam Huab Tais Tswv Ntuj xav txais ntawm Tswv Ntuj haiv neeg, mas yog lawv lub siab khuv leej lwm tus.
Lo lus tias ‘khuv leej’ txhais tias ‘xav kom lwm tus tau zoo, ces yus pab lawv’.
Muaj ib tug Txiv Plig hais tias kev khuv leej yog txhawv tawm hauv kev nyiam tuaj. Tswv Ntuj yog kev nyiam, yog li kev khuv leej thiaj yog tuaj ntawm Tswv Ntuj tuaj. Li ntawd, tus neeg muaj Tswv Ntuj nyob hauv nws, mas nws muaj lub siab khuv leej lwm tus. Yog peb tsis khuv leej luag tej, mas Tswv Ntuj tsis nyob hauv peb.
Li ntawd, hnub no Huab Tais Yes Xus thiaj xav kom peb muaj Tswv Ntuj nyob hauv peb, kom peb lub tswv yim tsuas xav pom luag tej tau zoo, thiab ua cov hauj lwm pab lawv.
Peb yuav khuv leej luag tej sab ntsuj plig; yam li yus pab cov neeg txhaum kom hloov siab tshiab, nplij cov neeg quaj ntsuag kom siab kaj, zam rau cov ua phem ua tsis zoo rau yus, thov Ntuj rau yus tus yeeb ncuab.
Peb tseem yuav khuv leej luag tej sab cev nqaij; yam li pub txhiam xws rau tus tshaib, pub dej rau tus nqhis, pub khaub ncaws rau tus tsis muaj hnav, pub chaw nkaum rau tus tsis muaj tsev, tu tus neeg mob, tsham tus raug kaw, zais tus neeg tuag.
Lub Moo Zoo hnub no tseem qhia ib yam li no rau peb ntxiv tias peb txhob txiav txim luag tej raws li peb qhov muag pom, tseem muaj ntau yam tob tob peb qhov muag ntsia tsis cuag. Li ntawd, peb tso lub siab nyiam txiav txim luag tej pov tseg, ces peb tig los hnav lub siab khuv leej mas yuav zoo dua rau peb.
Tswv Ntuj yog tus xub khuv leej peb, ces peb yuav khuv leej lwm tus.
