ZAJ NYEEM HNUB TIM 16 LUB 8 HLI 2024
HNUB NCO TXOG LEEJ NTSHIAB TES FAS NOS NYOB HOOS NQIAS
COV LUS NYOB HAUV MAS TAIS NTAWV MOO ZOO (MT 19: 3-12)
Kwv tij Hmoob sawv daws, hnub no cov Fas Lis Xais tuaj nug tias txiv neej puas muaj cai nrauj poj niam. Lawv nug li ntawd, vim Mais Xes txoj cai hais tias tus txiv neej muaj cai nrauj tau tus poj niam yog nws ua ntawv nrauj.
Tos Mais Xes kom nrauj tau vim tias thaum ib tug txiv neej twg yuav poj niam, nws pom tias tus poj niam ntawd tsis huv los yog ua tej yam txaus rau txaj muag, mas tus txiv neej muaj cai nrauj tau tus poj niam tab sis nws yuav tsum ua ntawv nrauj. Qhov no yog ib qho hau kev daws teeb meem hauv lub cuab. Tab sis vim cov txiv neej muaj lub siab ntshaw yuav lwm tus hluas nkauj los ua lawv poj niam, mas cov txiv neej Yus Das pheej txhob txwm hais ntau yam liam lawv tus poj niam kom tau nrauj mas lawv thiaj yuav mus yuav tau lwm tus.
Huab Tais Yes Xus paub cov txiv neej Yus Das lub tswv yim zoo, nws thiaj hais tias “Yog vim nej lub siab twm xeeb ces Mais Xes thiaj kheev kom nej nrauj poj niam. Ntawm kuv mas kuv hais rau nej tias ‘tus twg nrauj nws poj niam ces nws yuav dua ib tug, mas nws yog ib tug muaj txij nkawm mus deev hluas. Tab sis yog tias nws nrauj nws poj niam vim nws poj niam tau mus deev luag lwm tus ua ntej, los yog nkawd sib yuav tsis raug cai; mas tus txiv neej yuav lwm tus ua nws poj niam yeej tau.’
Kwv tij Hmoob, Huab Tais Yes Xus tseem hais tias txoj lub hauv paus los, Tswv Ntuj tsim tib neeg los ua txij nkawm kom nkawd tsim noob neej, kom nkawd sib sau ua ke sib pab sib nres. Yog li mas tsis tsim nyog peb yuav muaj cai mus muab ntawv nrauj rau lwm tus, los yog hais kom ob niam txiv sib nrauj nyias nyob nyias.
Yog li mas cov kwv tij Hmoob, tshwj xeeb peb cov ntseeg txog Yes Xus, peb hais tias peb ua Ntuj kev cai lawm, mas thaum peb muaj kev sib cav sib ceg, muaj kev tsis sib nkag siab nyob hauv lub cuab, muaj teeb meem tuaj raug tuaj chwv peb lub cuab; mas peb yuav thov Ntuj pab peb daws teeb meem, pab lub zog rau peb kom hla dhau qhov xwv txheej no mus. Tsis txhob hais tias yog li ces wb kav tsij sib nrauj nyias mus nyias yuav zoo dua rau koj thiab kuv.
Kwv tij, qhov ntawd zoo rau neb ob tug ua niam ua txiv, tab sis tsis zoo rau Tswv Ntuj thiab rau neb cov me nyuam.
