ZAJ NYEEM HNUB TIM 16 LUB 5 HLIS 2024
HNUB TSIB LUB LIS PIAM 7 CAIJ HLA
COV LUS NYOB HAUV ZAM NTAWV MOO ZOO (Z 17: 20-26)
Kwv tij Hmoob, Huab Tais Yes Xus lo lus peb tau mloog nyob hauv hnub no yog cov lus kawg Huab Tais Yes Xus tau thov Leej Txiv Tswv Ntuj rau cov neeg ntseeg txog nws, Huab Tais Yes Xus thov tias “Kuv tsis thov koj rau kuv cov thwj tim nyob hauv tiam neeg no xwb, kuv tseem thov koj rau cov uas yuav ntseeg txog kuv vim lawv tau hnov cov neeg tiam no hais txog kuv thiab, kom lawv cov tuaj tom qab ntawd tau koom ua ib leeg nyob hauv koj thiab kuv.” Cov lus no mas yog Huab Tais Yes Xus tab tom thov Ntuj pub rau peb cov ntseeg tom qab no kom peb txawj sib nyiam, txawj koom siab ua ib tug nyob hauv Huab Tais Tswv Ntuj.
Kwv tij, niaj hnub no peb pom tias ntiaj teb neeg tseem tsis txawj koom siab ua ib tug xws li Huab Tais Yes Xus tau thov. Nyob hauv peb tsoom neeg ntseeg hauv lub Koom Txoos, hauv peb lub tseb chaws, los hauv peb lub zos, peb twb tsis tau txawj sib nyiam, thooj siab koom ntsws.
Yog li mas puas tsim nyog peb ahis tau tias peb nyiam Huab Tais Yes Xus!
Kwv tij, Huab Tais Yes Xus xav kom peb sib nyiam sib hlub li ib cuab kwv tij, muaj kev sib haum xeeb li koom ib lub cev ib lub plawv, mas lub qab ntuj neeg thiaj yuav ntseeg tias Huab Tais Yes Xus yog tus Huab Tais Leej Txiv xa tuaj tiag.
Yog li peb tsis txhob ua rau Huab Tais Yes Xus tu siab mog, peb yuav tig los sib pab ua kom Huab Tais Yes Xus lo lus thov Ntuj tsheej xeeb tuaj tiag.
