ZAJ NYEEM HNUB TIM 15 LUB 8 HLI 2024
HNUB TSIB LUB LIS PIAM 19 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 18: 21-19: 1)
Kwv tij Hmoob sawv daws, thaum muaj ib tug ua txhaum rau nej, nws tu siab ces nws los thov kom nej zam txhaumrau nws mas nej puas yuav zam los tsis zam?
Peb ua neeg nyob mas hais tseeb tias ceeb laj ua ib siab zam txhaum rau tus ua txhaum rau peb kawg. Tos peb hais li ntawd, vim peb yog neeg, peb tsis muaj zog tiv tau lub siab phem nyob hauv peb.
Hnub no, lub Moo Zoo thiaj xav hais qhia rau peb tias thaum peb txiav siab los ntseeg txog Yes Xus lawm, peb muaj Tswv Ntuj ua peb tus Huab Tais, ua peb Leej Txiv. Thaum peb ua txhaum mas peb yuav tsum tu siab thiab muaj cuab kav tawm mus thov Huab Tais Tswv Ntuj zam thiab daws peb cov txhaum. Peb thov Huab Tais Tswv Ntuj zam txhaum rau peb nyob hauv lub Cim Daws Txhaum, nyob hauv peb lo lus thov Ntuj, nyob hauv lub Txoos ua Thaj Txi Ntuj.
Tswv Ntuj pom tias peb txawj tu siab thiab muaj cuab kav thov, mas Tswv Ntuj yuav zam rau peb vim tias Tswv Ntuj siab zoo thiab hlub peb, xws li zaj paj lug hauv hnub no; tus tub txib tshuav nuj nqi txhos caug thov tus vaj, ces tus vaj hlub tus tub txib, mas tus vaj thiaj zam tas nrho tus tub txib cov nuj nqi.
Tab sis kwv tij Hmoob, Huab Tais Tswv Ntuj tsis zam dawb dawb rau peb, Huab Tais Tswv Ntuj tseem xav kom peb txawj zam rau lwm tus thiab. Yog tias Huab Tais Tswv Ntuj zam rau peb tab sis peb tsis paub zam rau lwm tus, mas qhov kawg Huab Tais Tswv Ntuj yuav muab txim rau peb hnyav dua qhov peb tsim nyog tau txais vim peb cov txhaum.
Nej saib, hauv zaj paj lug hais li cas: Lwm tus pom nws tsis zam nuj nqi rau tus phooj ywg, ces lawv mus hais qhia tus vaj. Tus vaj hu tus tub txib tuaj thiab hais tias “Tub txib siab phem, cov nuj nqis koj tshuav ntawn kuv, mas kuv twb zam tas huv si rau koj vim koj thov kuv. Ua cas koj tsis hlub koj tus npawg zoo li kuv tau hlub koj? Txij no mus koj yuav raug txim mus txog hnub koj them cov nuj nqi tas huv si.”
Kwv tij Hmoob, Huab Tais Yes Xus xauv nws cov lus qhia tias “Yog nej tsis zam hauv nruab siab rau nej ib tug kwv tij, mas kuv Txiv nyob saum ntuj kuj yuav ua ib yam li ntawd rau nej thiab.”
