ZAJ NYEEM HNUB TIM 15 LUB 5 HLIS 2024
HNUB PLAUB LUB LIS PIAM 7 CAIJ HLA
COV LUS NYOB HAUV ZAM NTAWV MOO ZOO (Z 17: 11-19)
Kwv tij Hmoob, lub Moo Zoo hnub no Huab Tais Yes Xus tau thov Huab Tais Leej Txiv kom ‘zov’ cov neeg tau ntseeg txog nws, vim tias cov neeg hloov siab tshiab tig los ntseeg txog Huab Tais Yes Xus, mas lawv yog cov raug cais tawm los coj ib lub neej ua neeg ntshiab, lawv yuav tsis lo lub ntiaj teb qhov txhaum ntxiv lawm. Cov neeg ntseeg txog Yes Xus, mas lawv tsis yog lub qab ntuj neeg tug lawm, lawv yog Huab Tais Leej Txiv Ntshiab tug lawm.
Cov kwv tij, yeeb vim Huab Tais Yes Xus hlub peb tiag, nws thiaj yeem qee nws qhov ntshiab rau peb, kom peb ntshiab tuaj, mas peb thiaj yuav nyob tau hauv Huab Tais Leej Txiv Ntshiab.
Li ntawd, hnub no peb twb tau txais lub neej tshiab ua ib tug neeg ntshiab lawm, mas peb yuav xyaum coj lub neej kom phim ib tug neeg ntshiab thiab peb yuav nquag thov Huab Tais Leej Txiv kom nws zov peb thiab txuag peb kom txhob poob rau txoj kev phem.
